Read ქართული ბიბლია, სრული ვერსია Psalms 33 Bible Online

Psalms 33 - ქართული ბიბლია, სრული ვერსია bible

Psalms 33

¹დავითისა. როცა სიგიჟე მოიგონა აბიმელექის წინაშე, განიდევნა და წავიდა.

²ვადიდებ უფალს ყოველ ჟამს, მარად იქნება მისი ქება ჩემს ბაგეებზე.

³უფლით იქადის ჩემი სული; ისმინონ მშვიდებმა და გაიხარონ.

⁴ადიდეთ უფალი ჩემთან ერთად, ვადიდოთ მისი სახელი ერთად!

⁵მოვიძიე უფალი და მიპასუხა მან და მიხსნა ყველა განსაცდელისგან.

⁶უმზირეთ მას და გასხივოსნდით; არასოდეს არ შერცხვება პირი თქვენი.

⁷აგერ გლახაკმა მოუხმო მას და უფალმა ისმინა მისი და ყველა გასაჭირისგან იხსნა იგი.

⁸დაივანებს უფლის ანგელოზი მის მოშიშთა ირგვლივ და იხსნის მათ.

⁹განიცადეთ და ნახეთ, რომ კეთილია უფალი! ნეტარია ის, ვინც მასზეა მინდობილი.

¹⁰გეშინოდეთ უფლისა, წმიდანო მისნო, რადგან არა აქვთ შეჭირვება მის მოშიშთ!

¹¹ლომის ბოკვერები იტანჯებიან და შიმშილობენ, ხოლო უფლის მაძიებლებს არავითარი სიკეთე არ მოაკლდებათ.

¹²მოდით, შვილებო, მისმინეთ! უფლის მოშიშებას გასწავლით თქვენ.

¹³ვინ არის კაცი, რომელსაც სურს სიცოცხლე, უყვარს დღეგრძელობა სიკეთის სანახავად?

¹⁴შეიკავე შენი ენა სიავისაგან და ბაგენი შენნი — ცბიერ სიტყვათაგან.

¹⁵ერიდე ბოროტებას და ჰქმენ სიკეთე; ეძიე მშვიდობა და მიჰყევი მას.

¹⁶უფლის თვალები მიპყრობილია მართალთაკენ და მისი ყურები — მათი ღაღადისაკენ.

¹⁷პირი უფლისა — ბოროტმოქმედთა წინააღმდეგ, რათა წარხოცოს დედამიწიდან მათი სახსენებელი.

¹⁸მართალნი მოუხმობენ და ისმენს უფალი, იხსნის მათ ყველა გასაჭირისგან.

¹⁹ახლოა უფალი გულმოდრეკილებთან, და სულით მორჩილებს იხსნის ის.

²⁰მრავალია სიძნელე მართლისა; მაგრამ ყველაფრისაგან იხსნის უფალი.

²¹ის იცავს მის ყოველ ძვალს, მათგან ერთიც არ შეიმუსრება.

²²მოკლავს ცოდვილს ბოროტება, ხოლო მართლის მოძულენი დაიგმობიან.

²³იხსნის უფალი თავის მორჩილთა სულებს, არ განისჯება მასზე მინდობილი.