Read ქართული ბიბლია, სრული ვერსია Psalms 34 Bible Online

Psalms 34 - ქართული ბიბლია, სრული ვერსია bible

Psalms 34

¹დავითისა. ედავე, უფალო, ჩემს მოდავეებს, შეებრძოლე ჩემს წინააღმდეგ მებრძოლთ!

²აიღე ფარი და საჭურველი, და აღსდექ ჩემს შესაწევნად!

³იშიშვლე მახვილი და გზა გადაუკეტე ჩემს მდევნელებს! უთხარი ჩემს სამშვინველს: „შენი მხსნელი ვარ!“

⁴შერცხვნენ და გაწბილდნენ ჩემი სიკვდილის მაძიებელნი; უკუიქცნენ და გაწბილდნენ ჩემთვის სიავის მსურველნი!

⁵შეიქნენ, ვითარცა მტვერი ქარის წინაშე, უფლის ანგელოზმა უკუაგდოს ისინი!

⁶იყოს მათი გზა ბნელი და მოლიპული, უფლის ანგელოზი სდევნიდეს მათ!

⁷რადგან უმიზეზოდ დამიგეს მახე, უმიზეზოდ გაუთხარეს ორმო ჩემს სამშვინველს.

⁸ეწიოს მათ უეცარი უბედურება! მახეში, რომელიც მოამზადეს, გაებან თვითონ, დასაღუპავად ჩაცვივდნენ შიგ!

⁹მაშინ ჩემი სამშვინველი გაიხარებს უფლით, ილხენს მისი შემწეობით.

¹⁰ყოველი ჩემი ძვალი იტყვის: უფალო, ვინ არის შენი მსგავსი, შენი, რომელიც იხსნი საწყალს ძლიერისგან, ღარიბს და ღატაკს — მძარცველისაგან?

¹¹აღსდგნენ ჩემს წინააღმდეგ ავი ცრუმოწმენი; რაც არ ვიცი, იმას მეკითხებიან.

¹²სიკეთის წილ ბოროტებით მიზღავენ, ჩემი სულის დაობლება სურთ.

¹³მე კი მათი სნეულების ჟამს ძაძებს ვიცვამდი, ჩემს სულს მარხვით ვაძაბუნებდი, მაგრამ ჩემი ლოცვა უკან მიბრუნებოდა.

¹⁴ისე ვწუხდი, როგორც მეგობრისა ან ძმისთვის, დედას რომ დასტირის კაცი, ისეთი თავდახრილი და მგლოვიარე.

¹⁵ისინი კი ჩემი მარცხის ჟამს ხარობდნენ, იკრიბებოდნენ; იკრიბებოდნენ ჩემს წინააღმდეგ სულმდაბალნი, და არ ვიცი, რატომ; სულს მიფლეთდნენ და არ მეშვებოდნენ.

¹⁶პირფერი მანჭვითა და დაცინვით აღრჭენდნენ კბილებს ჩემს წინააღმდეგ.

¹⁷უფალო, როდემდე უყურებ ამას? მიხსენ გაპარტახებისაგან, ლომებისაგან იხსენ ჩემი სიცოცხლე!

¹⁸მადლობას შემოგწირავ დიდ კრებულში, ხალხთა სიმრავლეში შეგასხამ ხოტბას.

¹⁹არ გაიხარონ ჩემზე მტრებმა ტყუილუბრალოდ, ნუ ანიშნებენ უმიზეზოდ ჩემი მოძულენი თვალით ერთმანეთს.

²⁰რადგან მშვიდობაზე არ ლაპარაკობენ, არამედ ქვეყნიერების მორჩილთა მიმართ მზაკვრობას განიზრახავენ.

²¹ფართოდ აღებენ პირს ჩემზე, ყვირიან: ოჰო! ოჰო! იხილა თვალმა ჩვენმა.

²²შენ ხომ იხილე, უფალო, ნუ დადუმდები! უფალო, ნუ განმერიდები მე;

²³აღსდეგ, გამოიღვიძე ჩემს დასაცავად, ჩემი დავის გასარჩევად, ღმერთო ჩემო და უფალო ჩემო!

²⁴გამასამრთლე შენი სიმართლით, უფალო, ჩემო ღმერთო, და ნუ გაიხარებენ ჩემზე!

²⁵ნუ იტყვიან თავიანთ გულში: ოჰო! სწორედ ასე გვენება! ნუ იტყვიან: ჩავყლაპეთ იგი!

²⁶შერცხვეს და გაწბილდეს ყველა, ვისაც ჩემი ავი უხარია; სირცხვილით შეიმოსოს, ვინც მე მედიდურად მექცევა!

²⁷იგალობონ და იხარონ ჩემი გამართლების მსურველებმა და თქვან მარადჟამს: დიდია უფალი, მისი მორჩილისათვის მშვიდობის მსურველი!

²⁸ჩემი ენა კი იღაღადებს სიმართლეს შენსას და ქებას შენსას დღენიადაგ.