Read ქართული ბიბლია, სრული ვერსია Psalms 5 Bible Online

Psalms 5 - ქართული ბიბლია, სრული ვერსია bible

Psalms 5

¹ლოტბარს. სალამურზე. დავითის ფსალმუნი.

²ყურად იღე, უფალო, ჩემი სიტყვები, ჩასწვდი ჩემს გულისთქმას.

³ისმინე ჩემი ღაღადი, მეუფევ ჩემო და ღმერთო ჩემო!

⁴შენს მიმართ ვლოცულობ, უფალო! განთიადზე გესმის შენ ჩემი ხმა, განთიადზე ვამზადებ ჩემს მსხვერპლს და გელოდები.

⁵რადგან შენ არა ხარ ბოროტების მოყვარული ღმერთი; ცოდვილი ვერ დაისადგურებს შენთან;

⁶ვერ დადგებიან ქედმაღალნი შენს წინაშე: შენ გძულს უსამართლობის ჩამდენნი.

⁷შენ ანადგურებ სიცრუის მთქმელებს; სისხლისმსმელებს და მაოხრებლებს განიშორებს უფალი.

⁸მე კი შენი უხვი წყალობით მოვალ შენს სახლში, ვეთაყვანები შენს წმიდა ტაძარს — შენდამი შიშით.

⁹უფალო, მატარე შენი სიმართლის გზით ჩემს მტერთა გამო, გაასწორე შენი გზა ჩემს წინაშე.

¹⁰რადგან არ არის ჭეშმარიტება მათ ბაგეებზე, ბილწია მათი შიგნეულობა, მათი ხორხი ღია საფლავია, მათი ენები — მაცდუნებელნი.

¹¹განსაჯე ისინი, ღმერთო, დაე დაღუპონ ისინი მათმა ზრახვებმა; მათი ცოდვების სიმრავლის გამო განიშორე ისინი, რადგან აღდგნენ შენს წინააღმდეგ.

¹²ყველა შენზე მონდობილმა კი იხაროს, იმხიარულოს უკუნისამდე; შენ დაიცავ მათ, გაიხარებენ შენით შენი სახელის მოყვარულნი.

¹³რადგან შენ აკურთხებ მართალს, უფალო, ჯავშანივით მოსავ მას შენი წყალობით.