Read ქართული ბიბლია, სრული ვერსია Psalms 50 Bible Online

Psalms 50 - ქართული ბიბლია, სრული ვერსია bible

Psalms 50

¹გუნდის ლოტბარს. დავითის ფსალმუნი.

²რაჟამს მივიდა მასთან ნათან წინასწარმეტყველი, მას შემდეგ, რაც ბათშებაყთან შევიდა.

³შემიწყალე, ღმერთო, შენი სათნოებისამებრ, შენი მრავალმოწყალებით წაშალე ჩემი დანაშაული.

⁴სრულად განმბანე ჩემი ბრალისგან და ჩემი ცოდვისაგან განმწმინდე მე!

⁵რადგან ვიცი ჩემი დანაშაული, და ჩემი ცოდვა მუდამ ჩემს თვალწინაა.

⁶შენ, მხოლოდ შენ შეგცოდე და ბოროტება შენს თვალ წინ ჩავიდინე, ამიტომ მართალია შენი მსჯავრი და სწორია შენი სამართალი.

⁷აჰა, უკანონოდ ჩავისახე და ცოდვით დაორსულდა დედაჩემი ჩემზე.

⁸აჰა, შენ შეიყვარე ჭეშმარიტება გულით, შენ მასწავლი დაფარულ სიბრძნეს.

⁹მასხურე მე უსუპით და განვიწმინდები; განმბანე და თოვლზე მეტად განვსპეტაკდები.

¹⁰აღმავსე ლხენითა და სიხარულით, გაახარე ჩემი ძვლები, შენ რომ დათრგუნე.

¹¹აარიდე სახე ჩემს შეცდომებს და ყველა ჩემი ბრალი წაშალე.

¹²წმიდა გული შეჰქმენ ჩემში, ღმერთო, და წრფელი სული განმიახლე ჩემს სხეულში.

¹³ნუ უკუმაგდებ შენგან და ნუ წამართმევ შენი სიწმინდის სულს.

¹⁴დამიბრუნე შენი ხსნის სიხარული, და მძლავრი სულით განმამტკიცე.

¹⁵მაშინ ვასწავლი დამნაშავეებს შენს გზებს, და ცოდვილნი შენთან დაბრუნდებიან.

¹⁶მიხსენ სისხლთაგან, ღმერთო, ღმერთო ჩემი ხსნისა, და ჩემი ენა ხოტბას შეასხამს შენს ხსნას.

¹⁷უფალო, გახსენი ჩემი ბაგენი, და ჩემი პირი იტყვის შენს ქებას.

¹⁸რადგან მსხვერპლი არა გსურს, და სრულადდასაწველს არ ინებებ.

¹⁹შესაწირავი ღმერთისა არის სული მოდრეკილი; მოდრეკილსა და მორჩილ გულს არ დაამცირებ, ღმერთო.

²⁰სიკეთე უყავ შენი კეთილგანწყობით სიონს, აღადგინე გალავნები იერუსალიმისა.

²¹მაშინ ისურვებ სიმართლის შესაწირავებს და სრულადდასაწველს; მაშინ აიტანენ შენს სამსხვერპლოზე ზვარაკებს.