Read ქართული ბიბლია, სრული ვერსია Psalms 64 Bible Online

Psalms 64 - ქართული ბიბლია, სრული ვერსია bible

Psalms 64

¹გუნდის ლოტბარს. ფსალმუნი დავითისა. გალობა.

²შენ შეგშვენის ხოტბა, ღმერთო, სიონზე; შენ აღგისრულებენ აღთქმებს,

³შენ, შემსმენო ლოცვისა! შენთან მოვა ყველა ხორციელი.

⁴ჩადენილმა ცოდვებმა დაგვჯაბნეს, შენ შეგვინდობ ჩვენს დანაშაულს.

⁵ნეტარია, ვისაც ამოირჩევ და დაიახლოვებ, რომ იცხოვროს შენს ეზოებში! გავძღებით შენი სახლის, შენი წმიდა ტაძრის სიკეთით!

⁶დანაშაულზე ხსნით გვპასუხობ, ღმერთო, ჩვენო მხსნელო, დედამიწის ყველა კუთხისა და შორეული ზღვის მცხოვრებთა სასოებავ;

⁷შენ დადგი მთები შენი ძალით, გარს შემოირტყი ძლიერებით;

⁸შენ აწყნარებ ზღვათა ღრიალს, ტალღების ხმაურს, ერების მღელვარებას.

⁹აძრწუნებს კიდეთა მცხოვრებთ შენი სასწაულები; დილას და საღამოს აღვიძებ შენს სადიდებლად.

¹⁰კეთილად იხსენებ მიწას და რწყავ, დიდად ამდიდრებ მას; ნაკადი ღვთისა სავსეა წყლით; აძლევ ადამიანებს პურს, რადგან ასე მოამზადე იგი.

¹¹მის კვლებს არწყულებ, ასწორებ მის ბელტებს, ჟუჟუნა წვიმით ალბობ, მის აღმონაცენს აკურთხებ.

¹²აკურთხებ წელიწადის გვირგვინს შენი სიკეთით, შენი ნაკვალევიდან წვეთავს პოხიერება.

¹³წვეთავენ უდაბნოს საძოვრები, ქედები ლხენით იმოსებიან.

¹⁴საძოვრები ცხვრით აჭრელდებიან, დაბლობები მარცვლით იფარება; ღაღადებენ და მღერიან სიხარულით.