Read ქართული ბიბლია, სრული ვერსია Psalms 67 Bible Online

Psalms 67 - ქართული ბიბლია, სრული ვერსია bible

Psalms 67

¹გუნდის ლოტბარს. დავითისა. ფსალმუნი საგალობელისა.

²დაე აღდგეს ღმერთი, განიბნენ მისი მტრები, და მისი მოძულენი უკუიქცნენ მისგან!

³როგორც კვამლი იფანტება, ისე გაფანტე; როგორც ცვილი დნება ცეცხლზე, ისე დაიღუპონ ბოროტნი ღმერთის სახის წინაშე!

⁴ხოლო მართლებმა გაიხარონ, ილხინონ ღმერთის წინაშე, სიხარულით იზეიმონ!

⁵ადიდეთ ღმერთი, უგალობეთ მის სახელს! მოუმზადეთ გზა მას, ვინც უდაბნოებს სერავს; უფალია მისი სახელი; ილხინეთ მის წინაშე!

⁶მამა ობოლთა და მსაჯული ქვრივთა არის ღმერთი თავის წმიდათა წმიდაში;

⁷ღმერთი ბინას აძლევს ეულებს, გამოჰყავს ტყვეები საპყრობილედან, ხოლო ურჩნი ხრიოკზე რჩებიან.

⁸ღმერთო, როცა შენი ხალხის წინაშე გამოხვედი, როცა ფეხი დადგი უდაბნოში,

⁹დედამიწა იძრა, ცანიც კი წვეთავდნენ ღმერთის სახის წინაშე; ეს სინაიც ირყეოდა წინაშე ღმერთისა, ისრაელის ღმერთისა.

¹⁰ბარაქიან წვიმას აწვიმებდი, ღმერთო, შენს სამკვიდროს, და როდესაც უძლურდებოდა, შენ ამაგრებდი.

¹¹შენმა სამწყსომ იქ ჰპოვა ბინა; შენი სიკეთით განუმზადე ღარიბს, ო ღმერთო.

¹²უფალი იძლევა სიტყვას, დიდია ამ სიტყვის მახარობელთა გუნდი:

¹³„ჯარების მეფენი გარბიან, გარბიან! შინ მყოფი ქალები კი ნადავლს იყოფენ.“

¹⁴მაშინაც კი, როდესაც ცხვრის ბაკებში წევხართ — მტრედის ფრთები ვერცხლით არის დაფარული და მისი ნაკრტენი მოოქროვილია.

¹⁵როცა ყოვლადძლიერმა გაფანტა იქ მეფეები, დაითოვლა ცალმონი.

¹⁶ბაშანის მთაო, მთაო ღმერთისა, მწვერვალმრავალო მთაო, მთაო ბაშანისა!

¹⁷რატომ შეჰყურებთ შურით, მწვერვალებით მდიდარო მთებო, მთას, რომელიც ღმერთმა ისურვა სამოსახლოდ, რომელსაც უფალი დაიმკვიდრებს სამუდამოდ?

¹⁸ღმერთის ეტლები უთვალავია, ათასეულები; მათ შორის არის უფალი სინაიზე, წმიდა ადგილას.

¹⁹შენ ახვედი მაღლა, დაატყვევე ტყვეობა, მიიღე ძღვენი კაცთა შორს, რათა ურჩებთანაც დაისადგუროს უფალმა ღმერთმა.

²⁰კურთხეულ არს უფალი, რომელიც ყოველ დღე ზრუნავს ჩვენზე, ღმერთი, ჩვენი მხსნელი.

²¹ჩვენი ღმერთი არის ღმერთი დამხმარე, და უფალი ღმერთის ხელში არის ხსნა სიკვდილისაგან.

²²მაგრამ ღმერთი თავს გაუჭეჭყავს მტრებს, აჯაგრულ კეფას — დანაშაულის გზით მოსიარულეს.

²³თქვა უფალმა: ბაშანიდან დავაბრუნებ მათ; დავაბრუნებ ზღვის სიღრმეებიდან,

²⁴რათა ჩადგათ თქვენი ფეხები მტრების სისხლში, და თქვენმა ძაღლებმა ჩაყონ შიგ ენა;

²⁵ნახეს შენი შესვლა, ღმერთო, შესვლა ჩემი ღმერთისა, ჩემი მეფისა, წმიდაში.

²⁶წინ მგალობლები, უკან — მემუსიკენი, შუაში — მედაირე ქალწულები.

²⁷კრებულთა შორის ადიდეთ ღმერთი, უფალი, წყარო ისრაელისა!

²⁸იქ ბენიამინი — უმრწემესი — წინ მიუძღვით; იუდას მთავრები გუნდად, ზებულუნის მთავრები, ნაფთალის მთავრები.

²⁹შენმა ღმერთმა მოგაკუთვნა ძალა, ღმერთო, განამტკიცე ის, რაც მოიმოქმედე ჩვენთვის.

³⁰შენი ტაძრის გამო, რომელიც იერუსალიმშია, ძღვენს მოგართმევენ მეფენი.

³¹შერისხე მხეცი ლერწმიანისა, ხარების ჯოგი ხბორებით, ხალხი, რომელიც იქადის ვერცხლის ზოდებით. მიმოფანტე ომის მოყვარული ხალხები.

³²ბრინჯაოს მოიტანენ ეგვიპტიდან, ქუში გაიწოდებს ხელს ღმერთისაკენ.

³³უმღერეთ ღმერთს ქვეყნიერების სამეფონო, უგალობეთ დიდება უფალს,

³⁴ამაღლებულს ძველთუძველეს ცათა ცაში! აჰა, ის გამოსცემს თავისი ძლიერების ხმას.

³⁵მიანიჭეთ სიძლიერე ღმერთს! მისი სიდიადე ისრაელზეა და მისი სიძლიერე — ღრუბლებში.

³⁶საოცარი ხარ, ღმერთო, შენს ტაძარში. ღმერთი ისრაელისა — ის აძლევს ძალასა და სიმაგრეს თავის ხალხს; კურთხეულ არს ღმერთი!