Read ქართული ბიბლია, სრული ვერსია Psalms 7 Bible Online

Psalms 7 - ქართული ბიბლია, სრული ვერსია bible

Psalms 7

¹გალობა დავითისა, ბენიამინელი ქუშის სიტყვების გამო რომ უმღერა უფალს.

²უფალო, ღმერთო ჩემო! შენზე ვარ მონდობილი; მიხსენ ყველა მდევნელისაგან და გადამარჩინე,

³რათა არ დაგლიჯონ, ვითარცა ლომებმა, სული ჩემი, დაფლითონ და არ იყოს მხსნელი.

⁴უფალო, ღმერთო ჩემო! თუ რამ ჩავიდინე, თუ უსამართლობა გამოვიდა ჩემი ხელიდან,

⁵თუ ჩემთვის მშვიდობის მსურველს ბოროტებით მივუზღე და გავაგდე თუნდაც ჩემი მტერი ხელცარიელი, —

⁶დაე, დევნოს მტერმა სული ჩემი და წამოეწიოს, დაე, დედამიწაზე დაანარცხოს სიცოცხლე ჩემი, და მტვრად აქციოს ღირსება ჩემი.

⁷აღსდექ, უფალო, შენი რისხვით, წამოიმართე გულისწყრომით ჩემს მტრებზე, გამოიღვიძე ჩემთვის სამართლის დასადგენად, რომელიც შენ დადე მცნებად.

⁸გარს შემოიხვიე გუნდი ხალხებისა, მათ ზემოთ ამაღლდი მწვერვალზე!

⁹უფალი განსჯის ხალხებს; განმიკითხე, უფალო, ჩემი სიმართლით და უბიწოებით,

¹⁰შეწყდეს ბოროტება ბიწიერთა, ხოლო მართალი გაამართლე, რადგან შენა ხარ გულისა და ზრახვების შემმოწმებელი, ღმერთო მართალო!

¹¹ჩემი ფარი უპყრია ღმერთს, გულმართალთა მხსნელს.

¹²ღმერთი მართალი მსაჯულია, არ ჩქარობს რისხვას.

¹³მაგრამ თუ არ მორჯულდა, შერისხავს; გალესავს მახვილს, მშვილდს მოზიდავს და დაუმიზნებს;

¹⁴მომაკვდინებელ იარაღს ამზადებს, ცეცხლს უკიდებს ისრებს.

¹⁵აჰა, შეხედე: ბოროტს ჩაესახა სიმრუდე, დაორსულდა უკუღმართობით და შვა სიცრუე.

¹⁶ორმო თხარა და ღრმად ამოკვეთა, სხვისთვის გაამზადა და თვითონ ჩავარდა.

¹⁷მისი ავგულობა მის თავს დაუბრუნდება და მისი ბოროტება — მის თხემს დაეცემა.

¹⁸ვადიდებ უფალს მისი სიმართლით და ვუგალობებ უზენაესის სახელს.