Read ქართული ბიბლია, სრული ვერსია Psalms 90 Bible Online

Psalms 90 - ქართული ბიბლია, სრული ვერსია bible

Psalms 90

¹უზენაესის საფარქვეშ დამკვიდრებული ყოვლადძლიერის ჩრდილქვეშ განისვენებს.

²ეტყვის უფალს: „ჩემი ფარი და სიმაგრეა ღმერთი ჩემი, რომელსაც ვესავ.“

³ის გიხსნის მონადირის მახისაგან, მომსრავი ჭირისაგან;

⁴ბუმბულს გადაგაფარებს, და მის ფრთებქვეშ შეაფარებ თავს; ფარი და ბურჯია მისი ჭეშმარიტება.

⁵არ შეგაშინებს საშინელება ღამისა, ისარი — დღისით გაფრენილი,

⁶შავი ჭირი — ბნელში მოარული, სენი — შუადღისას მძვინვარე.

⁷დაეცემა შენს გვერდით ათასი და 10 ათასი შენს მარჯვნივ, შენ კი არ მოგეკარება.

⁸მხოლოდ შენი თვალით შეხედავ და დაინახავ საზღაურს ბოროტთა.

⁹რადგან შენა ხარ, უფალო, ჩემი თავშესაფარი, — შენს საცხოვრისად აირჩიე უზენაესი,

¹⁰არ შეგემთხვევა სიავე, წყლული ვერ მიეკარება შენს კარავს.

¹¹რადგან თავის ანგელოზებს უბრძანებს დაგიცვან შენ ყველა შენს გზაზე.

¹²ხელში აყვანილს გატარებენ, ფეხი რომ არ წამოჰკრა ქვას.

¹³ლომსა და ასპიტს ფეხს დაადგამ, ლომის ბოკვერს და ურჩხულს გაქელავ.

¹⁴რაკი შემიყვარა, ვიხსნი მას, დავიფარავ, რადგან შეიცნო სახელი ჩემი.

¹⁵მომიხმობს და ვუპასუხებ, მასთან ვიქნები გასაჭირში; გამოვიხსნი და განვადიდებ.

¹⁶დღეთა ხანგრძლივობით გავაძღებ და შემწეობას ვუჩვენებ ჩემსას.