Read ქართული ბიბლია, სრული ვერსია Psalms 93 Bible Online

Psalms 93 - ქართული ბიბლია, სრული ვერსია bible

Psalms 93

¹უფალო, ღმერთო შურისგებისა, ღმერთო შურისგებისა, გამოჩნდი!

²წამოიმართე, ქვეყნიერების მსაჯულო, მიუზღე საზღაური ამპარტავნებს!

³ვიდრემდე იზეიმებენ, უფალო, ბოროტნი, ვიდრემდე უნდა ილხენდნენ ბოროტნი?

⁴სიცრუეს ამბობენ ქედმაღლად, ტრაბახობენ სიმრუდის მოქმედნი.

⁵ჩაგრავენ შენს ხალხს, უფალო, ტანჯავენ შენს სამკვიდროს.

⁶ქვრივსა და ხიზანს ხოცავენ და ობლებს ჟლეტენ.

⁷ამბობენ: ვერ იხილავს უფალი, ვერც გაიგებს ღმერთი იაკობისა.

⁸გონს მოდით, უგუნურნო ხალხისა! უმეცარნო, როდის დაბრძენდებით?

⁹ყურის დამნერგავს განა არ ესმის? თვალის შემქმნელი განა ვერ ხედავს?

¹⁰ერთა გამრიგე განა ვერ ამხილებს — ის, ვინც აწვდის ადამიანს ცოდნას?

¹¹უფალმა იცის ზრახვანი კაცისა, რომ ამაოა ისინი.

¹²ნეტარია კაცი, რომელსაც სწვრთნი, უფალო, და შენს რჯულს ასწავლი.

¹³შენ ასვენებ მას ავი დღეებისაგან, ვიდრე ბოროტს ორმო გაეთხრებოდეს.

¹⁴რადგან არ გასწირავს უფალი თავის ხალხს და თავის სამკვიდროს არ მიატოვებს;

¹⁵რადგან სამართალი დაბრუნდება მართლებთან, და მას გაჰყვება ყველა გულმართალი.

¹⁶ვინ აღუდგება ჩემს გამო ბოროტებს? მხარში ვინ ამომიდგება სიმრუდის მოქმედთა წინააღმდეგ?

¹⁷უფალი რომ არ ყოფილიყო ჩემი შემწე, ცოტაც და, დასახლდებოდა ჩემი სული დუმილის ქვეყანაში.

¹⁸როდესაც ვთქვი: „მომიცურდა ფეხი,“ შენმა წყალობამ განმამტკიცა, უფალო.

¹⁹როცა ზრუნვით მევსება გული, შენი ნუგეში მიამებს სულს.

²⁰ნუთუ შემოგიერთდება უკუღმართობის ტახტი, უსამართლობას რომ სჩადის შენი რჯულის წინააღმდეგ?

²¹ილაშქრებენ მართლის სულზე, და წმიდა სისხლს ბრალში ხვევენ.

²²მაგრამ უფალი არის ჩემი მტკიცე სიმაგრე, ღმერთია ჩემი თავშესაფრის კლდე.

²³უკან მიუბრუნებს მათ თავიანთ უსამართლობას და მათი სიავისათვის მოსპობს მათ, მოსპობს მათ უფალი, ღმერთი ჩვენი!