Read ქართული ბიბლია, სრული ვერსია Psalms 95 Bible Online

Psalms 95 - ქართული ბიბლია, სრული ვერსია bible

Psalms 95

¹უგალობეთ უფალს გალობა ახალი, უგალობე უფალს, მთელო ქვეყნიერებავ!

²უგალობეთ უფალს, ადიდეთ მისი სახელი, ახარეთ დღითი დღე ხსნა მისმიერი.

³აუწყეთ ერებს მისი ღირსება, ყველა ხალხებს — მისი სასწაულები!

⁴რადგან დიდია უფალი და ღირსსაქები მეტად, ყველა ღმერთებზე საშიშია ის.

⁵რადგან ერების ყველა ღმერთები კერპებია, ხოლო უფალმა შექმნა ცანი.

⁶ღირსება და ბრწყინვალებაა მის წინაშე, სიმძლავრე და მშვენება — მის ტაძარში.

⁷შესწირეთ უფალს, ტომებო ერთა, შესწირეთ უფალს ქება და დიდება!

⁸შესწირეთ უფალს მისი სახელის დიდება. წაიღეთ ძღვენი და მიდით მის ეზოებში!

⁹თაყვანი ეცით უფალს მოწიწებით; ათრთოლდი მის წინაშე, მთელო ქვეყნიერებავ!

¹⁰უთხარით ერებს: უფალი მეფობს! ამიტომ მტკიცეა სამყარო, არ შეირყევა. ის განიკითხავს ხალხებს სისწორით.

¹¹გამხიარულდნენ ცანი და ილხინოს ქვეყანამ; იხმაუროს ზღვამ და სავსებამ მისმა.

¹²გაიხაროს ველმა და ყოველმა, რაც მასზეა, მაშინ იზეიმებენ ყოველნი ხენი ტყისანი

¹³უფლის წინაშე, რადგან ის მოდის, რადგან ის მოდის ქვეყნიერების განსასჯელად; განსჯის სამყაროს სიმართლით და ხალხებს — თავისი ჭეშმარიტებით.