Read ქართული ბიბლია, სრული ვერსია Proverbs 10 Bible Online

Proverbs 10 - ქართული ბიბლია, სრული ვერსია bible

Proverbs 10

¹ბრძენი შვილი მამას ახარებს, უგუნური შვილი კი დედის საწუხარია.

²უკეთურთა საუნჯენი უსარგებლოა, სიმართლე კი სიკვდილისაგან იხსნის.

³უფალი არ დაამშევს მართალის სულს, უკეთურთა სიხარბეს კი უკუაგდებს.

⁴ზარმაცი ხელი აღარიბებს, გამრჯე ხელი კი ამდიდრებს.

⁵ვინც ზაფხულში აგროვებს, გონიერი შვილია, სამკალში მძინარა კი შემარცხვენელია.

⁶უფლის კურთხევაა მართლის თავზე, უკეთურთა ბაგენი კი ძალადობას ქადაგებენ.

⁷მართლის ხსოვნა კურთხეულ იქნება, ხოლო უკეთურთა სახელიც კი იხრწნება.

⁸გულით ბრძენი რჩევებს მიიღებს, სულელურად მოლაქლაქე კი უბედურებას გადაეყრება.

⁹სწორი გზით მოარული უშიშრად ივლის, გზის გამმრუდებელი კი გამომჟღავნდება.

¹⁰თვალის ჩამკვრელს წუხილი მოაქვს, ბრიყვულად მეტყველი კი უბედურებას გადაეყრება.

¹¹მართლის ბაგენი სიცოცხლის წყაროა, უკეთურთა ბაგენი კი ძალადობას ქადაგებენ.

¹²სიძულვილი შუღლის აღმძვრელია, სიყვარული კი ყველა ცოდვას ფარავს.

¹³გონიერის ბაგეებზე სიბრძნეა, უგუნურის ზურგს კი წკეპლა ელის.

¹⁴ბრძენი ცოდნას იუნჯებს, სულელის სიტყვები კი დაღუპვას აახლოებს.

¹⁵მდიდრის ქონება მისთვის ციხე-სიმაგრეა, ხოლო ღარიბთა სიღატაკე დამღუპველია მათთვის.

¹⁶მართლის შრომა სიცოცხლისთვისაა, უკეთურის მონახვეჭი კი — ცოდვისათვის.

¹⁷შეგონებათა დამცველი სიცოცხლის გზით დადის, მისი უკუმგდებელი კი გზააბნეული დაეხეტება.

¹⁸სიძულვილს ვინც მალავს, ცრუ ბაგეები აქვს, ჭორების დამყრელი კი სულელია.

¹⁹მრავალსიტყვაობისას ცოდვა გარდაუვალია, გონიერი კი ბაგეებს ალაგმავს.

²⁰მართლის ენა რჩეული ვერცხლია, უკეთურის გონება კი არად ფასობს.

²¹მართლის ბაგენი მრავალთ მწყემსავენ, სულელნი კი უჭკუობით იხოცებიან.

²²უფლის კურთხევა ამდიდრებს მართალს და მწუხარება არ ეწევა მას.

²³ავის ქმნა ბრიყვის გასართობია, ხოლო სიბრძნე — გონიერის.

²⁴რაც უკეთურს აშინებს, სწორედ ის შეემთხვევა, მართალს კი წადილი აუსრულდება.

²⁵გადაივლის ქარიშხალი და აღარ დარჩება უკეთური, მართალი კი საუკუნოდ დაფუძნდება.

²⁶რაც ძმარია კბილთათვის და კვამლი თვალთათვის, იგივეა მცონარა მისი დამსაქმებლისთვის.

²⁷უფლის შიში სიცოცხლეს ახანგრძლივებს, უკეთურთა სიცოცხლე კი მოკლეა.

²⁸მართალთა სასოებას სიხარული მოსდევს, უკეთურთა იმედი კი დაიღუპება.

²⁹გზა უფლისა სიმტკიცეა მართალთათვის, ხოლო ავისმქნელთ ანადგურებს უფალი.

³⁰მართალი არ შეირყევა უკუნისამდე, უკეთურნი კი ვერ დაიმკვიდრებენ ქვეყანას.

³¹მართლის პირს სიბრძნე მოაქვს, უკუღმართი ენა კი მოიკვეთება.

³²მართალთა ბაგეებიდან სიკეთე მოედინება, ბოროტთა პირიდან კი უკუღმართობა.