Read ქართული ბიბლია, სრული ვერსია Proverbs 16 Bible Online

Proverbs 16 - ქართული ბიბლია, სრული ვერსია bible

Proverbs 16

¹გულის ზრახვანი კაცისგანაა, პასუხი კი უფლისგან მოდის.

²კაცის ყველა გზა სუფთაა მის თვალში, მაგრამ უფალი წონის სულს.

³მიანდე უფალს შენი საქმენი და შენი გეგმები აღსრულდება.

⁴უფალმა ყველაფერი თავისი მიზნისათვის შექმნა, თვით უკეთურიც კი — უბედური დღისათვის.

⁵ყველა ქედმაღალი სძულს უფალს; ნამდვილად ვერ გაექცევიან ისინი სასჯელს.

⁶წყალობითა და პატიოსნებით განიწმიდება ცოდვა; და უფლის შიშით განუდგება კაცი სიავეს.

⁷როდესაც მოსაწონია უფლისთვის კაცის გზები, მტრებსაც კი დაუშოშმინებს მას.

⁸სჯობს სიმართლით მცირედი უსამართლობით მონახვეჭ მრავალს.

⁹ადამიანი ირჩევს გზას, უფალი კი წარმართავს მის ნაბიჯებს.

¹⁰შთაგონებული სიტყვაა მეფის ბაგეებზე, სამსჯავროში არ შესცოდავს მისი პირი.

¹¹სწორი სასწორი და საწონები უფლისაა.

¹²სძაგთ მეფეებს ბოროტმოქმედება, რამეთუ სამართლით ფუძნდება ტახტი.

¹³სათნოა მეფისათვის მართალი ბაგენი და წრფელად მოუბარი უყვარს მას.

¹⁴მეფის გულისწყრომა სიკვდილის მაცნეა, ხოლო ბრძენკაცი დააცხრობს მას.

¹⁵მეფის სახის ნათელი სიცოცხლეა, მისი წყალობა კი გაზაფხულის წვიმის მომტანი ღრუბელივითაა.

¹⁶სიბრძნის შეძენა ოქროზე უკეთესია და გონიერების მოპოვება — ვერცხლზე.

¹⁷მართალთა გზა ბოროტებისგან გარიდებულია; თავისი გზის დამცველი სიცოცხლეს იცავს.

¹⁸ამპარტავნება წინ უსწრებს დაღუპვას, და ქედმაღლობა — დაცემას.

¹⁹ღატაკთან ერთად სულიერი მორჩილება გერჩივნოს ამაყის ნადავლში მოწილეობას.

²⁰საქმეში ფრთხილი სიკეთეს ჰპოვებს, უფალს მინდობილი ბედნიერია.

²¹გულით ბრძენს გონიერს უწოდებენ და ტკბილი ბაგენი დამარწმუნებელია.

²²სიბრძნე სიცოცხლის წყაროა მფლობელისთვის, ბრიყვთა სასჯელი კი სიბრიყვეა.

²³ბრძენის გული გონიერს ხდის მის მეტყველებას, და მის ბაგეებს დამარწმუნებლობას მატებს.

²⁴საამო სიტყვა გოლეული თაფლია, სულის სიტკბოა და ხორცის კურნება.

²⁵არის გზა, რომელიც სწორი ჰგონია კაცს, მისი ბოლო კი სიკვდილის გზაა.

²⁶მადა მშრომელის მამოძრავებელია, შიმშილი უბიძგებს შრომისაკენ.

²⁷უღირსი კაცი ბოროტებას იზრახავს და მის ბაგეებზე მწველი ცეცხლი გიზგიზებს.

²⁸უკუღმართი კაცი შუღლს ავრცელებს და ჭორის გამავრცელებელი მეგობრების გამყრელია.

²⁹მოძალადე მოყვასს აცდუნებს და უკეთურ გზაზე აყენებს;

³⁰ვინც თვალს ჭუტავს, უკუღმართობას ზრახავს, ვინც ტუჩებს იკვნეტს — სიავე მოაქვს.

³¹ჭაღარა დიდების გვირგვინია, სიმართლის გზაზე მოიპოვება იგი.

³²ნელი რისხვაში ძლიერს სჯობს, ხოლო ვინც საკუთარ თავს დაიურვებს — ქალაქის დამპყრობს.

³³წილისყრა კალთიდან ხდება, მაგრამ გადაწყვეტა უფლისგანაა.