Read ქართული ბიბლია, სრული ვერსია Proverbs 2 Bible Online

Proverbs 2 - ქართული ბიბლია, სრული ვერსია bible

Proverbs 2

¹შვილო ჩემო, თუ მიიღებ ჩემს ნათქვამს და ჩემს მცნებებს დაიუნჯებ,

²ყურადღებით თუ მოუსმენ სიბრძნეს, შენს გულს მიაპყრობ გონიერებას,

³თუ გონებას მოუხმობ და აიმაღლებ ხმას საზრიანობისთვის,

⁴თუ მიელტვი მას, როგორც ვერცხლს, და ეძიებ მას, როგორც დაფარულ საუნჯეს,

⁵მაშინ შეიგნებ უფლის შიშსა და უფლის შეცნობას ჰპოვებ.

⁶რადგან უფალი იძლევა სიბრძნეს, მისგანაა ცოდნა და გონიერება.

⁷ის აგროვებს საზრიანობას პატიოსანთათვის, ის ფარია უბიწოდ მავალთათვის,

⁸ის იცავს სამართლის გზებს და წმიდათა ბილიკებს უფრთხილდება.

⁹მაშინ შეიცნობ სამართალსა და სიმართლეს და პატიოსნებას — სიკეთის ყველა ბილიკს.

¹⁰მაშინ შევა სიბრძნე შენს გულში და ცოდნა ეამება შენს სულს,

¹¹განსჯა დაგიფარავს და საზრიანობა დაგიცავს,

¹²რათა გიხსნას ბოროტი გზისაგან, სიცრუის მეტყველი კაცისაგან,

¹³მათგან, რომელნიც ტოვებენ სწორ გზებს, რათა იარონ სიბნელეში,

¹⁴რომლებიც ხარობენ ბოროტმოქმედებით და ილხენენ ბოროტი უკუღმართობით,

¹⁵რომელთა გზები მრუდეა და რომელთა ბილიკები უკუღმართია;

¹⁶მაშინ გადარჩები უცხო ქალისაგან, მრუშისაგან, რომელიც მლიქვნელი ენით გხიბლავს,

¹⁷რომელმაც დატოვა თავისი სიჭაბუკის მეგობარი და თავისი ღმერთის აღთქმა დაივიწყა,

¹⁸რადგან მისი სახლი სიკვდილის მახეა და მისი ბილიკები შავეთის აჩრდილებისკენ მიემართება.

¹⁹ვერც ერთი იქ ჩასული უკან ვერ ბრუნდება და ვეღარ ჰპოვებს სიცოცხლის გზას.

²⁰ამიტომ იარე კეთილთა გზით და მართალთა ბილიკებს არ გადაუხვიო.

²¹რადგან წრფელნი ქვეყანას დაიმკვიდრებენ და უბიწონი დარჩებიან მასში;

²²ბოროტნი კი ქვეყნიდან მოიკვეთებიან და მზაკვარნი აღმოიფხვრებიან მისგან.