Read ქართული ბიბლია, სრული ვერსია Proverbs 24 Bible Online

Proverbs 24 - ქართული ბიბლია, სრული ვერსია bible

Proverbs 24

¹ნუ შეგშურდება ბოროტებისა და ნუ ისურვებ მათთან ყოფნას,

²რადგან ძალადობაზე ფიქრობს მათი გონება და მათი ბაგენი მავნებლობაზე ლაპარაკობენ.

³სიბრძნით შენდება სახლი და გონიერებით მტკიცდება;

⁴ცოდნის წყალობით ივსება ოთახები ყოველგვარი ძვირფასი და საუცხოო სიმდიდრით.

⁵ბრძენი მეომარი ღონიერზე ძლიერია და მცოდნე კაცი — ძალ-ღონით სავსეზე.

⁶გონივრულად წარმართე ომი და ხსნა მრჩეველთა სიმრავლის წყალობით გექნება.

⁷სულელი ძნელად მისწვდება სიბრძნეს, კარიბჭესთან ენას ვერ დაძრავს.

⁸სიავის განმზრახველს ბოროტმოქმედი ჰქვია.

⁹ბრიყვის განზრახვა ცოდვაა და უზნეო კაცი სიძულვილს იმკის.

¹⁰თუ გასაჭირის დღეს დაეცემი, უძლური ყოფილხარ.

¹¹იხსენ სასიკვდილოდ წაყვანილნი და ნუ მიატოვებ სასიკვდილოდ განწირულთ;

¹²თუ იტყვი: „ჩვენ ხომ არ ვიცოდით,“ — განა გულთამხილავი ვერ გაიგებს? შენი სულის მფარველმა განა არ იცის და არ მიუზღავს ადამიანებს მათი საქმისამებრ?

¹³ჭამე, შვილო, თაფლი, რადგან კარგია იგი და გოლეულიც ეტკბობა შენს სასას.

¹⁴ასეთივეა ცოდნა და სიბრძნე შენი სულისათის: თუ იპოვი, მომავალი გექნება და შენი იმედი არ გაწბილდება.

¹⁵ნუ ჩაუსაფრდები, უკეთურო, მართლის სახლს, თავს ნუ დაესხმი მის სამყოფელს,

¹⁶რადგან შვიდჯერაც რომ დაეცეს მართალი, მაინც ადგება, უკეთურნი კი დაიღუპებიან.

¹⁷შენი მტრის დაცემისას ნუ გაიხარებ, და ფეხს რომ წაიტეხავს, ნუ გაიხარებს შენი გული,

¹⁸თორემ იხილავს უფალი და ცუდად გამოჩნდება მის თვალში, და მოაქცევს მისგან თავის რისხვას.

¹⁹ნუ გაეჯიბრები ბოროტმოქმედთ და ნუ შეგშურდება უკეთურთა,

²⁰რადგან მომავალი არა აქვს ბოროტებას; უკეთურთა სანთელი ჩაქრება.

²¹გეშინოდეს, შვილო, უფლისა და მეფისა, და მეამბოხეებში ნუ გაერევი,

²²რადგან უცაბედად მოვა მათგან დაღუპვა, და ვინ იცის, რა უბედურებას დაგატეხენ?

²³ესეც ბრძენთა ნათქვამია: მიკერძოებით განსჯა ცუდია.

²⁴ვინც დამნაშავეს ამართლებს, ხალხი დასწყევლის და ერი შეაჩვენებს;

²⁵ხოლო დამნაშავეთა განმსჯელნი სათნო იქნებიან და მათზე კეთილი კურთხევა გადმოვა.

²⁶ვინც მართალ სიტყვას ამბობს, ის პირზე კოცნის.

²⁷ჯერ გარეთ მოათავე შენი საქმე, მინდვრად ხვნა-თესვას მორჩი და მერე ააშენე სახლი.

²⁸ნუ დადგები შენი მოძმის წინააღმდეგ ცრუ მოწმედ, შენი ენა ნუ იტყვის სიცრუეს.

²⁹ნუ იტყვი: „როგორც ის მომექცა, მეც ისე მოვექცევი, რაც გამიკეთა, იმას გავუკეთებ.“

³⁰ზარმაცი კაცის ყანასთან გავიარე და მცონარას ვენახთან,

³¹და აჰა, მთლად ღვარძლით იყო სავსე, ეკალ-ბარდებს დაეფარა მთლიანად და ღობე მორღვეულიყო.

³²და ეს რომ ვნახე, ჩავფიქრდი და ჭკუა ვისწავლე:

³³ცოტას წაუძინებ, ცოტას წასთვლემ, თავქვეშ ამოიწყობ ხელებს,

³⁴და სიღატაკე ყაჩაღივით დაგადგება თავს და სიღარიბე — იარაღასხმული მეომარივით.