Read ქართული ბიბლია, სრული ვერსია Proverbs 7 Bible Online

Proverbs 7 - ქართული ბიბლია, სრული ვერსია bible

Proverbs 7

¹შვილო ჩემო, დაიცავი ჩემი სიტყვები და დაიუნჯე ჩემი მცნებები.

²თვალისჩინივით დაიცავი ჩემი მცნებები და ჩემი რჯული და იცოცხლე.

³დაიბნიე თითებზე და დაიბეჭდე გულის ფიცარზე.

⁴უთხარი სიბრძნეს: „ჩემი და ხარ შენ,“ და საუკეთესო მეგობრად გაიხადე გონიერება,

⁵რათა დაგიფარონ მათ სხვისი ცოლისაგან, უცხო ქალისაგან, რომელიც დაშაქრული ენით ცდილობს მოხიბვლას.

⁶ერთხელ, როცა ჩემი სახლიდან დარაბაში გავიჭვრიტე,

⁷ბრიყვთა შორის დავინახე, ჭაბუკთა შორის შევნიშნე უგუნური ყმაწვილი,

⁸რომელიც ქუჩაზე გადადიოდა მისი სახლის კუთხესთან და იმ ქალის სახლისაკენ წავიდა

⁹საღამოს მწუხრში, ღამის სიბნელესა და წყვდიადში.

¹⁰და აჰა, გამოდის ქალი მის შესახვედრად, მეძავის სამოსითა და მზაკვარი გულით.

¹¹თავხედია ის და თავშეუკავებელი, ფეხი შინ არ უჩერდება:

¹²ხან ქუჩაშია, ხან მოედნებზე და ყოველ კუთხესთანაა ჩასაფრებული.

¹³აჰა, დაიჭირა, ჰკოცნის და ურცხვი სახით ეუბნება:

¹⁴„სამადლობელო მსხვერპლი მქონდა შესაწირი, დღეს შევასრულე ჩემი აღთქმა,

¹⁵ამიტომ გამოვედი შენს შესახვედრად, შენი სახის საძებრად და გიპოვე კიდეც;

¹⁶საფენები დავაგე ჩემს სარეცელზე, ეგვიპტური ფერადი ქსოვილი;

¹⁷ჩემს საწოლს მური ვაპკურე, ალოე და დარიჩინი.

¹⁸შემოდი, გავძღეთ დილამდე სიყვარულით, დავტკბეთ ალერსით,

¹⁹რადგან ჩემი ქმარი შინ არ არის, შორ გზაზეა წასული,

²⁰ფულით სავსე ქისა აიღო ხელში და მხოლოდ სავსე მთვარეობისას დაბრუნდება შინ.“

²¹და აცდუნა თავისი სიტყვებით, თავისი დაშაქრული ენით მოხიბლა იგი.

²²მაშინვე გაჰყვა ყმაწვილი, როგორც დასაკლავი ხარი, როგორც შეპყრობილი ცხოველი,

²³სანამ ისარი არ გაუვლის ღვიძლში, ფრინველივით მიისწრაფვის ის მახისკენ და არ იცის, რომ თავს იღუპავს.

²⁴ახლა კი მისმინეთ, ჩემო შვილებო, მომისმინეთ მე და ყური დაუგდეთ ჩემს ბაგეთა ნათქვამს:

²⁵ნუ მიბრუნდება თქვენი გული მისი გზებისკენ, ნუ იხეტიალებთ მის ბილიკებზე,

²⁶რადგან მრავალი განგმირული დასცა მან და რიცხვი არა აქვს მის მსხვეპლთ.

²⁷მისი სახლი შავეთის გზაა, მკვდართა სავანეში ჩამავალი.