Read ქართული ბიბლია, სრული ვერსია Wisdom of Solomon 10 Bible Online

Wisdom of Solomon 10 - ქართული ბიბლია, სრული ვერსია bible

Wisdom of Solomon 10

¹პირველშობილი მამა სამყაროსი, მარტოდ შექმნილი, მან დაიფარა და იხსნა იგი დაცემისაგან.

²მანვე მისცა ყველაფერზე მბრძანებლობის ძალა.

³მაგრამ წარწყმდა მისგან წყრომით გამდგარი უსამართლო, როცა რისხვამორეულმა ძმა მოკლა.

⁴მის გამო წარღვნით წალეკილი მიწა კვლავ სიბრძნემ იხსნა, ხის ნაპობით რომ გადაარჩინა მართალი.

⁵ბოროტებით ერთსულოვნად შეკრულ ხალხთა შორის მანვე ამოიცნო მართალი, უბიწოდ დაიცვა იგი ღვთის წინაშე და მისცა ძალა, უფრო მეტი სიმტკიცე გამოეჩინა, ვიდრე სიბრალული შვილის მიმართ.

⁶უღვთოთა წარწყმედისას სწორედ მან იხსნა მართალი, რომელიც გადაურჩა ცეცხლს, ხუთ ქალაქზე გარდმოვლენილს,

⁷რომელთა უკეთურების მოწმედ აკვამლებული უდაბნოღა დარჩა, ნაყოფის უდროოდ გამომღები მცენარეები და ურწმუნო სულის სახსოვრად აღმართული მარილის სვეტი.

⁸სიბრძნის უგულებელმყოფელებმა მარტო იმით როდი ავნეს თავს, რომ ვერ შეიცნეს სიკეთე, არამედ თავიანთი სიშლეგის ხსოვნაც დაუტოვეს ცოცხალთ, რადგანაც ვერ შეძლეს დაეფარათ ის, რაც შესცოდეს.

⁹სიბრძნემ კი უბედურებისგან იხსნა თავისი მსახურნი.

¹⁰სწორი გზით უწინამძღვრა მართალს, ძმის რისხვას რომ გაურბოდა, ღვთის სასუფეველი უჩვენა და სიწმიდეთა ცოდნა მიჰმადლა, გასაჭირში შეეწია და ღვაწლის ნაყოფი უმრავლა.

¹¹როცა სიხარბით ჩაგრავდნენ, მხარში ამოუდგა და გაამდიდრა.

¹²მტრებისგან დაიფარა, ავისმზრახველთაგან დაიხსნა და სასტიკ ბრძოლაში გაამარჯვებინა, რათა სცოდნოდა, რომ ღვთის მოსაობით შეიძლება ყველაფერს სძლიო.

¹³ხელი არ ააღო გაყიდულ მართალს, არამედ ცოდვისაგან დაიხსნა იგი.

¹⁴მასთან ერთად ჩავიდა ხაროში და შებორკილი როდი დატოვა, შემდეგ კი მოუპოვა კვერთხი მეფობისა და მბრძანებლობა მის მტარვალებზე, გაამტყუნა მისი ბრალმდებელნი, თვითონ მას კი საუკუნო დიდება მიანიჭა.

¹⁵წმიდა ერი და უბიწო მოდგმა იხსნა მისი მჩაგვრელი ხალხისაგან.

¹⁶შევიდა უფლის მსახურის სულში და ნიშნებითა და სასწაულებით წინ აღუდგა სასტიკ მეფეებს.

¹⁷მათი ღვაწლის საზღაური მიაგო ღვთისმოსავთ, საკვირველი გზით ატარა ისინი, საფარველად ექცათ დღისით, ღამით კი — ვარსკვლავთა ნათებად.

¹⁸მეწამული ზღვა გაატარა და დიდ წყლებს შორის გასვლა შეაძლებინა.

¹⁹მათი მტრები კი წარღვნა და უფსკრულის სიღრმიდან ამოანთხია.

²⁰ამიტომაც იყო, რომ მართლებმა საჭურველი აჰყარეს უღვთოთ, შენს წმიდა სახელს უგალობეს, უფალო, და ერთხმად აქეს შენი მსახვრალი ხელი.

²¹რადგანაც სიბრძნემ ბაგენი გაუხსნა მუნჯებს და გასაგები გახადა ჩვილთა ტიტინი.