Read ქართული ბიბლია, სრული ვერსია Wisdom of Solomon 14 Bible Online

Wisdom of Solomon 14 - ქართული ბიბლია, სრული ვერსია bible

Wisdom of Solomon 14

¹ვიღაც მეორე, სანაოსნოდ და მძვინვარე ტალღების გადასალახავად რომ ემზადება, შემწეობას შესთხოვს ხეს, იმ ხომალდზე გაცილებით უფრო მსხვრევადს, რომლითაც მგზავრობას აპირებს.

²რადგან ხომალდი მომხვეჭელობის სურვილმა ჩაიფიქრა, ხოლო ოსტატის ხელოვნებამ ხორცი შეასხა ამ ჩანაფიქრს.

³მაგრამ ხომალდს შენი განგება მართავს, მამაო, რადგან შენ მონიშნე გზა ზღვაში და საიმედო ბილიკი ტალღებს შორის.

⁴რითაც გვიჩვენე, რომ ყოველგვარი ხიფათისაგან შეგიძლია იხსნა თვით სრულიად გამოუცდელიც, წინდაუხედავად რომ შევიდეს ზღვაში.

⁵შენ გსურს, რომ ფუჭად არ დარჩეს შენი სიბრძნის ნამოქმედარი; ამიტომაცაა, რომ ზღვაოსნები სიცოცხლეს ანდობენ მყიფე ხეს, და მაინც თავს აღწევენ ხიფათს, მძვინვარე ტალღების გადამლახველნი ტივით.

⁶ასე, იმთავითვე, როცა მოისრნენ ქედმაღალი ბუმბერაზები, ქვეყნის იმედმა ტივს შეაფარა თავი და შენი ხელით წარმართულმა მომავალს შეუნარჩუნა ახალი მოდგმის თესლი.

⁷კურთხეულია ძელი, რომლითაც აღესრულა სამართალი.

⁸ხელითქმნილი კერპი კი დაწყევლილია, კერპიც და მისი შემქმნელიც; შემქმნელი იმიტომ, რომ გამოთალა, კერპი კი იმიტომ, რომ ხრწნადი ქმნილება ღმერთად იწოდა.

⁹რადგან უფლისთვის თანაბრად საძულველია ღვთისმგმობიც და მისი ღვთისმგმობლობაც.

¹⁰ხოლო შექმნილი შემქმნელთან ერთად დაისჯება.

¹¹ამიტომ წარმართთა კერპებიც ვერსად წაუვლენ განკითხვას, რადგანაც ღვთის ქმნილებათა შორის სიბილწედ, კაცთა სულების საცთურად და უგუნურთა ფეხისათვის მახედ იქცნენ.

¹²რადგანაც ჩანაფიქრი კერპთა შექმნისა გარყვნილების სათავედ იქცა, ამ ჩანაფიქრის ხორცშესხმა კი — ცხოვრების ხრწნილებად.

¹³ვინაიდან არც დასაბამიდან ყოფილან და არც უკუნისამდე იქნებიან.

¹⁴კაცთა ცუდმედიდობამ შემოიყვანა ისინი ქვეყნად და ამიტომაც დიდი დღე არ უწერიათ.

¹⁵უდროოდ დაკარგულ შვილზე მგლოვიარე მამამ ჯერ მისი, როგორც მიცვალებულის, გამოსახულება გააკეთებინა, მერე კი პატივი მიაგო მას, როგორც ღვთაებას, და თავის ქვეშევრდომებს მისტიური ღვთისმსახურების წესები გადასცა.

¹⁶დროთა განმავლობაში ეს ღვთისმგმობლური ჩვეულება სჯულად იქცა,

¹⁷ასე რომ, მეფეთა ბრძანებით ეთაყვანებოდნენ ქანდაკებებს; რაკი არ შეეძლოთ უშუალოდ თაყვანი ეცათ იმისთვის, ვისგანაც დიდი მანძილი ჰყოფდათ, ადამიანებმა მეფის ხილული ხატი შექმნეს სათაყვანებლად, რათა ისე ეპირფერათ მის მიმართ, თითქოს მათ გვერდით ყოფილიყოს.

¹⁸ხელოვანთა პატივმოყვარეობა იყო იმის მიზეზი, რომ თვით უცნობებმაც კი თაყვანისცემის საგნად დასახეს იგი.

¹⁹ალბათ, მბრძანებლის საამებლად ძალ-ღონე არ დაიშურა, რომ თავისი ხელოვნებით მეტი სილამაზე მიენიჭებინა მისი მსგავსებისათვის.

²⁰ხალხმა კი, ქმნილების ხიბლით მონუსხულმა, ღმერთად შერაცხა ის, ვისაც ცოტა ხნის წინათ პატივს სცემდა, როგორც ადამიანს.

²¹ასე გაება სიცოცხლე მახეში, როცა უბედურებითა თუ მძლავრობით დათრგუნულმა ადამიანებმა წმიდა სახელი უწოდეს ქვებსა და ხეებს.

²²თუმცა ღმერთის შემეცნებაში დაშვებული შეცდომაც არ იკმარეს და უმეცრებით გამოწვეულ ფიცხელ ბრძოლაში ჩართულნი მშვიდობას უწოდებდნენ ესოდენ დიდ ბოროტებას.

²³მსხვერპლად რომ სწირავენ ბავშვებს, საიდუმლო მისტერიებს ასრულებენ ან უჩვეულო წეს-ჩვეულებათამებრ აღვირახსნილ ღრეობებს მართავენ,

²⁴არც სიცოცხლეს უფრთხილდებიან და არც ქორწინების სიწმიდეს, არამედ მზაკვრულად ხოცავენ ან მრუშობით შეურაცხყოფენ ერთმანეთს.

²⁵ყველაფერი ერთმანეთშია აღრეული: სისხლი და მკვლელობა, ძარცვა-გლეჯა და ვერაგობა, გარყვნილება და მუხანათობა, მშფოთვარება და ცრუ ფიცი,

²⁶სიკეთის უგულებელყოფა, უმადურება, სულთა შებღალვა, სქესთა გაუკუღმართება, უწესო ქორწინებანი, სიძვა და აღვირახსნილება,

²⁷რადგანაც უსახელო კერპთა მსახურებაა დასაბამი, მიზეზი და ბოლო ყოველგვარი ბოროტებისა.

²⁸ვინაიდან მათი თაყვანისმცემელნი ან აღტყინებით შმაგობენ, ან სიცრუეს წინასწარმეტყველებენ, ან უსამართლოდ ცხოვრობენ და ურცხვად ტეხენ ფიცს.

²⁹უსულო კერპებზე რომ ამყარებენ იმედს, დარწმუნებულნი არიან, რომ ცრუ ფიცისათვის პასუხი არ მოეკითხებათ.

³⁰მაგრამ ორმაგი სასჯელი ელით: იმის გამო, რომ კერპების მიმართ მიქცეულნი უკეთურად ფიქრობდნენ ღმერთზე და იმის გამოც, რომ ცრუ ფიცილს არ ერიდებოდნენ, სიწმიდის მზაკვრულად მოძულენი.

³¹ვინაიდან იმათი ძალა კი არა, ვისაც ისინი იფიცებენ, არამედ ცოდვილთა მსჯავრია, კუთვნილს რომ მიაგებს სჯულის უსამართლო დამრღვევთ.