Read ქართული ბიბლია, სრული ვერსია Wisdom of Solomon 15 Bible Online

Wisdom of Solomon 15 - ქართული ბიბლია, სრული ვერსია bible

Wisdom of Solomon 15

¹ხოლო შენ, ღმერთო ჩვენო, კეთილი და ჭეშმარიტი ხარ, სულგრძელი და ყოვლის გამრიგე წყალობით.

²თუნდაც ვცოდოთ, მაინც შენი ვართ, რაკიღა ვაღიარებთ შენს ძალმოსილებას, მაგრამ არ ვცოდავთ, რადგანაც შენად ვართ შერაცხილნი.

³შენი შეცნობა სრული ჭეშმარიტებაა, ხოლო შენი ძალმოსილების აღიარება — უკვდავების ფესვი.

⁴ვერ გვაცთუნა კაცთა უკეთურმა ზრახვამ და ვერც მხატვართა უნაყოფო შრომამ: ნაირფერად შეთხიპნილმა ფუჭმა გამოსახულებებმა,

⁵რომლის ჭვრეტაც ვნებას აღუძრავს და სურვილით მიაქცევს უგუნურთ უსულო სახეების მიმართ.

⁶მისი შემქმნელნიც, მისი ტრფიალნიცა და თაყვანისმცემელნიც ბოროტის მოყვარენი არიან, ამნაირ სასოებათა ღირსნი.

⁷მეთუნე რბილ თიხას ზელს და გულმოდგინედ გვიძერწავს ნაირგვარ ჭურჭელს; ერთიდაიმავე თიხისაგან იზილება, როგორც წმიდა, ისე უწმი დური საქმისათვის სახმარი ჭურჭელი — ორივე ერთნაირად; მაგრამ როგორც ერთის, ისე მეორის დანიშნულებაც იმავე მეთუნემ იცის.

⁸იმავე თიხით ამაო ღმერთს ძერწავს ფუჭად მაშვრალი, ცოტა ხნის წინათ თვითონაც მიწიდან შობილი, იმავე მიწას რომ დაუბრუნდება მალე, და მოეკითხება მისი სულის ვალი.

⁹მაგრამ ის კი არ ადარდებს, რომ ქანცგამწყვეტი შრომა მოელის, არც ის, რომ უდღეურია სიცოცხლე, არამედ ოქრომჭედლებსა და ვერცხლის მდნობელებს ეჯიბრება, სპილენძის მჭედელთ ბაძავს და სასახელოდ მიაჩნია სიბილწის ძერწვა.

¹⁰ფერფლია მისი გული, მიწაზე უბადრუკია მისი იმედი და ტალახზე საზიზღარი — მისი ცხოვრება.

¹¹რადგან ვერ შეიცნო თავისი შემოქმედი, რომელმაც ჩაუდგა ქმედითი სული და სიცოცხლის სუნთქვა შთაბერა.

¹²მის თვალებში სიცოცხლე თამაშია, ცხოვრება კი — სარფიანი აღებ-მიცემობა, რადგანაც ამბობს, რომ ყველაფერი გამორჩენის წყაროდ უნდა მიგაჩნდესო, თვით ბოროტებაც.

¹³ყველაზე უკეთ თვითონვე იცის, რომ სცოდავს, როცა თიხისაგან მყიფე ჭურჭელს ზელს და ფუჭ სახეებს ძერწავს.

¹⁴მაგრამ ყველაზე უგუნურნი და ჭკუით ბალღებზე უსუსურნი შენი ხალხის მტრები არიან, მისი მჩაგვრელნი.

¹⁵რადგანაც ღმერთებად მიაჩნიათ წარმართთა სახეები, რომელთაც არც თვალები აქვთ სამზერად, არც ნესტოები სასუნთქად, არც ყურები სასმენად, არც თითები შესახებად და არც ფეხები სავალად.

¹⁶რადგანაც ადამიანმა შექმნა და ნასესხებმა სულმა გამოძერწა ისინი, ამიტომ კაციშვილს არ შეუძლია თავისი ნამდვილი სახით წარმოაჩინოს ღმერთი.

¹⁷თავად მოკვდავი მკვდარს აკეთებს ურჯულო ხელით და ამიტომაც აღემატება თავის სათაყვანებელ კერპებს, რადგან ის ცოცხალი მაინც არის, მათ კი არასდროს ღირსებიათ სიცოცხლე.

¹⁸და აღმერთებენ უსაზიზღრეს ცხოველებს, თავიანთი უგუნურებით ყველაზე უარესთ

¹⁹და იერსახითაც მახინჯთ, ასე რომ, სხვა ცხოველებივით ვერ გვიზიდავენ, რაკიღა აკლიათ ღვთის დასტური და კურთხევა.