Read ქართული ბიბლია, სრული ვერსია Wisdom of Solomon 19 Bible Online

Wisdom of Solomon 19 - ქართული ბიბლია, სრული ვერსია bible

Wisdom of Solomon 19

¹უღვთოთა მიმართ კი ბოლომდე გაგრძელდა უწყალო რისხვა, რადგანაც ღმერთი წინასწარ ჭვრეტდა ყველაფერს, რაც უნდა ჩაედინათ.

²მას შემდეგ, რაც წასვლის ნებას დართავდნენ და სასწრაფოდ გაისტუმრებდნენ მის ხალხს, სინანული შეიპყრობდათ და უკან დაედევნებოდნენ.

³და მართლაც, ვიდრე ჯერ კიდევ მგლოვიარენი თავიანთი მკვდრების საფლავებს დასტიროდნენ, უფრო შლეგური რამ განიზრახეს: იმათ, ვისაც ევედრებოდნენ — წადითო, უკან გამოსდევნებოდნენ, როგორც ლტოლვილებს.

⁴ამ უკიდურესობისაკენ უბიძგებდა მათ ბედისწერა, რისი ღირსნიც იყვნენ; ამიტომაც დაივიწყეს, რაც თავს გადახდათ, რათა სასჯელით შეევსოთ, რაც მათ ტანჯვა-წამებას აკლდა;

⁵რათა შენი ხალხი არნახული მგზავრობით გამოგეცადა, მტერი კი უჩვეულო სიკვდილით დაღუპულიყო.

⁶რადგანაც მთელმა ქმნილებამ, შენი ბრძანებისამებრ ბუნება იცვალა, რათა შენი შვილები უვნებელნი დარჩენილიყვნენ.

⁷ბანაკს ღრუბელი ფენდა ჩრდილს, ხოლო იქ, სადაც მანამდე წყალი იდგა, ხმელი გამოჩნდა, მეწამული ზღვა — დაუბრკოლებლად სავალ გზად, ბობოქარი ტალღები კი მწვანე ველად იქცა,

⁸რომლითაც გააღწია მთელმა ხალხმა, შენი ხელით დაცულმა და გამაოგნებელ სასწაულთა მხილველმა;

⁹ცხენებივით დაბალახობდნენ, კრავებივით დახტოდნენ და გადიდებდნენ თავიანთ მხსნელსა და უფალს.

¹⁰რადგან ჯერ კიდევ ახსოვდათ, რომ უცხო მხარეში ყოფნისას, მიწამ ცხოველთა ნაცვლად ჭიაყელები წარმოშვა, ხოლო მდინარემ თევზების ნაცვლად ურიცხვი გომბეშო ამოყარა.

¹¹შემდეგ კი ჩიტების ახალი გვარიც იხილეს, გულისთქმას აყოლილნი ნოყიერ საზრდოს რომ ითხოვდნენ.

¹²რადგან მათდა სანუგეშებლად მწყრები მოფრინდნენ ზღვიდან,

¹³ცოდვილებს კი სასჯელი დაატყდათ თავს, რაც წინასწარვე ეუწყათ მეხთატეხით; სამართლიანად იტანჯებოდნენ თავიანთი ბოროტებისთვის, რაკიღა სასტიკ სიძულვილს იჩენდნენ უცხოთა მიმართ.

¹⁴თუ სხვები თავშესაფარს არ აძლევდნენ მათ კარზე მომდგარ უცხოელებს, ესენი მონებად აქცევდნენ სტუმრებს, რომლებიც მათი კეთილისმყოფელნი იყვნენ.

¹⁵თუმცა, არა მარტო ამათ, არც იმათ ასცდათ სასჯელი, ვინც მტრულად იღებდნენ სტუმრებს.

¹⁶ამათ კი, თუმცა სიხარულით მიიღეს, მაგრამ შემდეგ, როცა მოსულნი უფლებრივად გაუთანაბრდნენ მათ, ქანცგამწყვეტი შრომა დააკისრეს და შავ დღეში ჩაყარეს ისინი.

¹⁷ამიტომაც წაერთვათ თვალისჩინი, როგორც იმათ, მართლის კართან — განუჭვრეტელი უკუნით გარემოცულნი — შესასვლელს რომ ეძებდნენ.

¹⁸რადგან თვით სტიქიონებმაც იცვალეს სახე, როგორც ქნარის სიმთა რხევა ცვლის რიტმის ბუნებას, თუმცა ყოველი ბგერა თავის ჟღერადობას ინარჩუნებს; ამას ადვილად შევნიშნავთ, თუ დავუკვირდებით, რაც მოხდა;

¹⁹ვინაიდან ხმელეთის ცხოველები წყლის ცხოველებად იქცნენ, წყალში მცურავთ კი ხმელეთზე გადმოინაცვლეს.

²⁰ცეცხლი წყალშიც ინარჩუნებდა ძალას, წყალმა კი დაკარგა თავისი დამშრეტი ბუნება.

²¹ალმა, პირიქით, მასში მოარულ ხრწნად ცხოველთა ხორცს ვერა ავნო რა, და ვერც ადვილად დნობადი ყინულის მსგავსი ღვთაებრივი საზრდო დაადნო.

²²რადგანაც ყოველნაირად განადიდე, უფალო, შენი ხალხი და აამაღლე, და არ მიატოვე, არამედ მარად და ყველგან მხარში ედექი.