Read ქართული ბიბლია, სრული ვერსია Wisdom of Solomon 3 Bible Online

Wisdom of Solomon 3 - ქართული ბიბლია, სრული ვერსია bible

Wisdom of Solomon 3

¹მართალთა სულები ღვთის ხელთ არიან და ტანჯვა ვერ ეწევა მათ.

²უგუნურებს კი მკვდრები ჰგონიათ და უბედურებად შეურაცხავთ მათი აღსასრული;

³ჩვენგან განშორება — იავარქმნად, ისინი კი მშვიდად სუფევენ.

⁴რადგან, თუმცა ხალხის თვალში დასჯილნი ჩანან, მათი სასოება უკვდავებითაა სავსე.

⁵მცირედ დასჯილებს დიდი სიკეთე მიეგებათ სანაცვლოდ, რადგანაც ღმერთმა გამოსცადა და თავის ღირსად შერაცხა ისინი.

⁶გამოსცადა, როგორც ოქრო — ქურაში და შეიწყნარა როგორც დასაწველი მსხვერპლი.

⁷ნაცვლისგების ჟამს გაბრწყინდებიან ისინი, როგორც ლერწმიდან ავარდნილი ნაპერწკლები.

⁸განსჯიან ტომებს და იმბრძანებლებენ ხალხებზე, ხოლო თვით მათზე სამარადისოდ იმეფებს უფალი.

⁹უფლის მოსავნი შეიცნობენ ჭეშმარიტებას და სიყვარულში ურყევნი მასთან დარჩებიან, რადგანაც რჩეულთათვისაა მისი მადლი და წყალობა.

¹⁰უღვთონი კი მათი ზრახვისამებრ მიიღებენ სასჯელს, რადგან მართალიც უგულებელყვეს და უფალსაც განუდგნენ.

¹¹ვინაიდან უბედურია ყველა, ვინც შეიძულა სიბრძნე და სწავლა; ამაოა მათი იმედი, უნაყოფოა მათი შრომა და ურგებია მათი საქმე.

¹²მათი ცოლები უგუნურნი არიან, ხოლო შვილები — უკეთურნი; დაწყევლილია მათი მოდგმა.

¹³ნეტარია უნაყოფო და უბიწო ქალი, ვისაც არ გაუზიარებია ცოდვის სარეცელი; იგი მიიღებს ნაყოფს სულთა მოხილვისას.

¹⁴თვით საჭურისსაც, ვისაც არ ჩაუდენია ურჯულოება და არ განუზრახავს ბოროტება უფლის მიმართ, მიეცემა გამორჩეული მადლი რწმენისა და სასურველი წილი უფლის ტაძარში.

¹⁵სასახელოა კეთილი შრომის ნაყოფი და ურყევია ფესვი სიბრძნისა.

¹⁶მემრუშეთა შვილები სრულწლოვანებას ვერ მიაღწევენ და თესლი ურჯულო სარეცლისა წარიხოცება.

¹⁷დღეგრძელნიც რომ იყვნენ, მაინც არარად შეირაცხებიან და საბოლოოდ უპატიო იქნება მათი სიბერეც.

¹⁸ხოლო თუ ნაადრევად აღესრულნენ, იმედი და ნუგეში არ ეღირსებათ განკითხვის დღეს.

¹⁹რადგან მძიმეა უსამართლო მოდგმის აღსასრული.