Read ქართული ბიბლია, სრული ვერსია Wisdom of Solomon 5 Bible Online

Wisdom of Solomon 5 - ქართული ბიბლია, სრული ვერსია bible

Wisdom of Solomon 5

¹მაშინ მართალი თამამად წარსდგება მათ წინაშე, რომელნიც შეურაცხყოფდნენ და აბუჩად იგდებდნენ მის ღვაწლს.

²მისი მხილველნი კი საშინლად შეძრწუნდებიან და განაცვიფრებთ მისი მოულოდნელი ხსნა.

³ერთმანეთს ეტყვიან მონანულნი, მგმინავნი და სულშეხუთულნი:

⁴ეს იყო, ვისაც დავცინოდით და მასხრად ვიგდებდით უგუნურნი; ვისი ცხოვრებაც სიშლეგედ მიგვაჩნდა, აღსასრული კი — უღირსად.

⁵როგორღა შეირაცხა უფლის ძეთა შორის და წმიდათა ხვედრს ეზიარა?

⁶ასე რომ, ავცდით ჭეშმარიტების გზას, აღარ გვინათებდა სამართლიანობის ნათელი და აღარც მზე ამოდიოდა ჩვენთვის.

⁷ურჯულოებისა და წარწყმედის ბილიკებით ვიარებოდით, გაუვალ უდაბნოებში ვიდოდით და უფლის გზა კი ვერ შევიცანით.

⁸რა გვარგო ჩვენმა ქედმაღლობამ, ან სიმდიდრით სიქადულმა რა მოგვიტანა?

⁹განქარდა ყოველივე ეს, როგორც აჩრდილი და როგორც მითქმა-მოთქმა, სწრაფად მიმწყდარი;

¹⁰როგორც კვალი ხომალდისა, მფრთონავ ტალღებს რომ მიაპობს, ან როგორც მისი ფსკერის ურნატი;

¹¹როგორც არ რჩება ცაში მფრინავი ჩიტის ნაკვალევი, გარდა ფრთებისფართქუნით გაპობილი ჰაერის მსუბუქი ჭავლისა;

¹²როგორც მიზანში ნატყორცნი ისრით გაპობილი ჰაერი მყისვე შეიკრავს პირს, ისე რომ, ვერ მიხვდები, სად გაიქროლა,

¹³ჩვენც ასევე ვიშვით და მსწრაფლ აღვესრულეთ, ვერ დავტოვეთ სიქველის კვალი, ჩვენივე ბიწით დაწრეტილებმა.

¹⁴რადგანაც უღვთოს სასოება ქრება, როგორც ქარით ატაცებული მტვერი, როგორც გრიგალით მიმოფანტული ჭირხლი ან ქარიშხლით ნაწეწი კვამლი, და იშლება ერთი დღით წვეული სტუმრის ხსოვნა.

¹⁵მართალნი კი საუკუნოდ იცოცხლებენ, მათი საზღაური უფლის ხელთაა და უზენაესი ზრუნავს მათზე.

¹⁶ამიტომაც მიიღებენ დიდებულ სამეფოს და მშვენიერების შარავანდს უფლის ხელიდან, მარჯვენით რომ იფარავს და თავისი მკლავით შეეწევა მათ.

¹⁷საჭურვლად აისხამს თავის მრისხანებას და აღჭურავს ქმნილებასაც, რათა შური იძიოს მტრებზე.

¹⁸აბჯრად შეიმოსავს სიმართლეს და მუზარადად პირუთვნელ სამართალს დაიდგამს თავზე.

¹⁹უძლეველ ფარად ხელთ იპყრობს სიმართლეს.

²⁰ორლესული მახვილივით ალესავს რისხვას და მასთან ერთად სამყაროც აღიძვრის შლეგთა წინააღმდეგ.

²¹ღრუბლებიდან, როგორც მოზიდული მშვილდიდან, დასხლტებიან მარჯვედ ნატყორცნი ელვის ისრები, რათა გაფრინდნენ მიზნისკენ.

²²როგორც ლოდსატყორცნიდან, რისხვით წამოუშენს სეტყვა, აბორგდებიან ზღვის ტალღები და მდინარეთა მძვინვარება წალეკავს მათ.

²³აღდგება მათ წინააღმდეგ სიმძლავრის სული და გრიგალივით მიმოფანტავს უკეთურთ; ურჯულოება მოაოხრებს მთელ ქვეყანას და ბოროტმოქმედება დაამხობს მბრძანებელთა ტახტებს.