Read ქართული ბიბლია, სრული ვერსია Sirach (Ecclesiasticus) 1 Bible Online

Sirach (Ecclesiasticus) 1 - ქართული ბიბლია, სრული ვერსია bible

Sirach (Ecclesiasticus) 1

¹წინასიტყვა რაკი ბევრი დიდებული რამ გადმოგვეცა რჯულის, წინასწარმეტყველთა და სხვათა, და მათ მიმდევართა წყალობით, რის გამოც ქების ღირსია ისრაელი, მისი მოძღვრებისთვის და მისი სიბრძნისთვის; და რაკი აუცილებელია, რომ არა მხოლოდ თავად მკითხველებმა მიიღონ ცოდნა, არამედ სწავლის მოყვარულებმა გარეთ მცხოვრებნიც უნდა დამოძღვრონ ზეპირი სწავლებით და წერილობით, ამიტომაც ჩემმა პაპამ, იესომ, მას შემდეგ, რაც დიდის გულმოდგინებით შეისწავლა რჯულის, წინასწარმეტყველთა და მამათა სხვა წიგნები, და შეიძინა საკმარისი ცოდნა, გადაწყვიტა თავადაც დაეწერა რაიმე მოძღვრებაში და სიბრძნეში, რათა სწავლის მოწადინენი ჩაღრმავებოდნენ მის ნაშრომს და წარმატება ჰქონოდათ რჯულიერ ცხოვრებაში. მაშ მოგიწოდებთ ყურადღებით წაიკითხოთ ეს წიგნი და შემინდოთ, თუ ზოგჯერ, მიუხედავად ჩემი სიბეჯითისა, სწორად ვერ მითარგმნია ზოგიერთი სიტყვა. რადგან იგივე მნიშვნელობა არა აქვს შერჩენილი ებრაულ სიტყვებს, როცა ისინი სხვა ენაზეა გადატანილი. არა მხოლოდ ეს წიგნი, არამედ თავად რჯული, წინასწარმეტყველნი და დანარჩენი წიგნები მცირედ როდი განსხვავდებიან მათი დედნისგან. (...)

²ვინ დათვალოს ზღვაში ქვიშა, წვიმის წვეთები და მარადისობის დღენი?

³ვინ გამოიკვლიოს ზეცის სიმაღლე, მიწის სიფართოვე და სიბრძნის უფსკრული?

⁴უწინარეს ყოვლისა აღმოცენდა სიბრძნე და კეთილგონიერება უკუნისიდან.

⁵ვის გამოუჩნდა ფესვი სიბრძნისა და ცბიერება ვინ შეიცნო?

⁶ერთია ბრძენი, ფრიად საშიში, თავის ტახტზე დაბრძანებული.

⁷უფალმა თავად შექმნა სიბრძნე, იხილა, აღნუსხა და თავის ყველა საქმეს აპკურა იგი,

⁸ნიჭად მიმადლა ყოველ ხორციელს და უპირატესად — თავის მოყვარულთ.

⁹უფლის შიში დიდება და პატივია, ლხენა და გვირგვინი სიხარულისა.

¹⁰უფლის შიში დაატკბობს გულს, შვებას, სიხარულსა და დღეგრძელობას მიანიჭებს.

¹¹უფლის მოშიშს ბოლო კეთილი ექნება და იკურთხება თავისი აღსასრულის დღეს.

¹²უფლის შიში სიბრძნის სათავეა და საშოდანვე თან დაჰყვება მორწმუნეთ.

¹³კაცთა შორის დაიდო საუკუნო საფუძველი და მიენდობა მათ შთამომავლებს.

¹⁴უფლის შიში სიბრძნის სისავსეა, და გააძღებს მათ თავისი ნაყოფით,

¹⁵მთელ სახლს აუვსებს იმით, რაც სურთ, და სათავსებს — თავისი მონაგრით.

¹⁶უფლის შიში სიბრძნის გვირგვინია, მშვიდობისმყოფელი და განმკურნებელი.

¹⁷იხილა და აღნუსხა იგი, წვიმასავით ასხურა ცოდნა და გონიერება, და აამაღლა მისთა მფლობელთა დიდება.

¹⁸უფლის შიში სიბრძნის ფესვია და მისი კენწერო — დღეგრძელობა.

¹⁹ვერ გამართლდება უსამართლო რისხვა, რადგანაც თვით მრისხანებაა კაცის დაცემა.

²⁰დრომდე დაითმენს სულგრძელი და ბოლოს სიხარულს მოიმკის ჯილდოდ.

²¹დრომდე შეინახავს თავის სიტყვებს და მრავალთა ბაგენი იტყვიან კეთილგონიერებას მისას.

²²უფლის შიში გაფანტავს ცოდვებს, არმოშიში კი ვერ გამართლდება.

²³სიბრძნის საგანძურშია გონიერების იგავნი, ცოდვილს კი სძულს შიში უფლისა.

²⁴თუ გსურს სიბრძნე, დაიცავი მცნებანი და უფალი მოგმადლებს მას.

²⁵რადგანაც უფლის შიში სიბრძნეა და ცოდნა, ხოლო სასოება მისდამი — რწმენა და სიმშვიდე.

²⁶ნუ განუდგები უფლის შიშს და ორგულობით ნუ მიეახლები მას.

²⁷პირში ნუ ელაქუცები ხალხს და დაუკვირდი შენს ბაგეებს.

²⁸ნუ აიმაღლებ თავს, რომ არ დაეცე და შენს სულზე უპატიობა არ მოაწიო, რადგანაც უფალი გააცხადებს შენს საიდუმლოს და საკრებულოში დაგამხობს, რადგანაც შიშით არ მიეახლე მას და გული სავსე გქონდა მზაკვრობით.