Read ქართული ბიბლია, სრული ვერსია Sirach (Ecclesiasticus) 14 Bible Online

Sirach (Ecclesiasticus) 14 - ქართული ბიბლია, სრული ვერსია bible

Sirach (Ecclesiasticus) 14

¹ნეტა იმ კაცს, ვინც არა სცოდა თავისი ბაგით და ცოდვის წუხილმა არ მოსწყლა.

²ნეტავი იმას, ვისაც არ ამწუხრებს თავისი სული და ვისაც არ წარკვეთია სასო.

³ძუნწის სიმდიდრეს სიკეთე არ ეთქმის; ქონება რად უნდა ბოროტს?

⁴ვინც საკუთარ სულს აკლებს და სხვებისთვის აგროვებს, მის ნაამაგარს სხვები შეიტკბობენ.

⁵თავისი თავისთვის ბოროტი ვისთვისღა იქნება კეთილი? ვერ იხარებს თავისი ავლადიდებით.

⁶არავინაა იმაზე უარესი, ვინც თავის თავსა მტრობს; აი, საზღაური მისი ბოროტებისა.

⁷სიკეთესაც რომ იქმოდეს, გულმავიწყობით იქმს და ბოლოს გამოამჟღავნებს თავის ბოროტებას.

⁸ბოროტია მოშურნე თვალის პატრონი, ზიზღით იბრუნებს პირს სულისაგან.

⁹ანგარის თვალს ვერ აძღებს ვერავითარი წილი; უსამართლობა ბოროტისა დააჭკნობს სულს...

¹⁰უკეთური თვალი პურსაც იშურებს და მწირია იმისი სუფრა.

¹¹შვილო, შეძლებისდაგვარად კეთილი უყავ შენს თავს და უფალსაც ღირსეულად მიართვი შესაწირავი.

¹²გახსოვდეს, სიკვდილი არ დაახანებს და ჯოჯოხეთის აღთქმა ჯერაც დაფარულია შენთვის.

¹³ვიდრე პირში სული გიდგას, კეთილი უყავ მეგობარს, ხელი გაუწოდე და რაც შეგიძლია, უწილადე.

¹⁴ნუ მოიკლებ სიკეთის დღეს და წილი კეთილი ნატვრისა გვერდს არ აგივლის.

¹⁵განა სხვებს არ დაუტოვებ შენს ნაღვაწსა და ნაჯაფარს, რათა წილისყრით გაიყონ?

¹⁶გაეცი და მიიღე; ანუგეშე შენი სული, რადგანაც ჯოჯოხეთში ვეღარა ჰპოვებ სიამეს.

¹⁷ყოველი ხორცი, როგორც სამოსი, გაცვდება, რადგანაც უკუნისიდან ასეა: სიკვდილით უნდა მოკვდე.

¹⁸როგორც მწვანე ფოთლები დაბურული ხეზე — ზოგი ცვივა, ზოგი იშლება, ასევეა მოდგმაც სისხლისა და ხორცისა: ზოგი კვდება, ზოგი იბადება.

¹⁹ყოველი ნახელავი ხრწნადია და წარმავალი, ხოლო მასთან ერთად კვდება მისი შემქმნელიც.

²⁰ნეტავი იმ კაცს, სიბრძნეს რომ ეწაფება და თავისი გონიერებით მსჯელობს,

²¹ვინც თავის გულში მოიაზრებს მის გზებს, მის იდუმალებასაც ეზიარება.

²²მდევარივით მისდიე მას და გზად ჩაუსაფრდი.

²³ვინც მის სარკმელში შეიხედავს, ის მის კართანაც მოისმენს.

²⁴ვინც მის სახლთანა ტრიალებს, ის ჩააჭედებს მის კედელში ლურსმანს.

²⁵მის გვერდით გამართავს თავის კარავს და კეთილ სავანეში განისვენებს.

²⁶მის ჭერქვეშ დასხამს თავის შვილებს და მის წიაღში დაივანებს.

²⁷მისი წყალობით დაიფარავს თავს სიცხისაგან და მის დიდებაში იცხოვრებს.