Read ქართული ბიბლია, სრული ვერსია Sirach (Ecclesiasticus) 19 Bible Online

Sirach (Ecclesiasticus) 19 - ქართული ბიბლია, სრული ვერსია bible

Sirach (Ecclesiasticus) 19

¹მემთვრალე მუშა ვერ გამდიდრდება და მცირედის არად ჩამგდები თანდათანობით დაკნინდება.

²ღვინო და ქალები რყვნიან გონიერთ და მეძავთა ტრფიალი სულ უფრო აღვირახსნილი ხდება.

³ხრწნილება და მატლი იქნება მისი ხვედრი და აღვირახსნილი სული წარწყმდება.

⁴მალემრწმენი თავქარიანია და შემცოდე თავის თავსავე ვნებს.

⁵გულისთქმის ამყოლი განისჯება.

⁶ლაყბობის მოძულე თავს დააღწევს ბოროტს.

⁷ნურასოდეს გაიმეორებ სიტყვას და არასდროს დაკარგავ რამეს.

⁸ნურც მტერს და ნურც მეგობარს ნურაფერს ეტყვი და, თუ ცოდვად არ ჩათვლი, ნურც გაუმჟღავნებ.

⁹რადგანაც ის მოგისმენს და შეიძლება აღარ გენდოს, და როცა იქნება, თავის სიძულვილს გამოამჟღავნებს.

¹⁰მოისმინე სიტყვა? შენთან ერთად მოკვდეს. ნუ გეშინია, არ დაგფლეთს.

¹¹ბრიყვს ისევე სტანჯავს სიტყვა, როგორც მშობიარეს — ჩვილი.

¹²რაღა ბარძაყში ჩარჭობილი ისარი და რაღა სიტყვა ბრიყვის გულში.

¹³ჰკითხე მეგობარს, იქნებ არა ჩაუდენია, ხოლო თუ ჩაიდინა, ნუღარ ჩაიდენს.

¹⁴ჰკითხე მეგობარს, რადგან ხშირად იბადება ცილისწამება, და ყველაფერს ნუ ერწმუნები.

¹⁵ჰკითხე ახლობელს, იქნებ არ უთქვამს, და თუ თქვა, ნუღარ გაიმეორებს.

¹⁶ზოგი სცოდავს, მაგრამ არა სულით; ენით კი ვის არ შეუცოდავს?

¹⁷ჰკითხე შენს მოყვასს, ვიდრე დაემუქრებოდე, და გზა მიეცი უზენაესის კანონს.

²⁰ყოველი სიბრძნე შიშია უფლის მიმართ და ყოველ სიბრძნეში უფლის კანონის აღსრულებაა.

²²ბოროტის ცოდნა არ არის სიბრძნე და არც შემცოდის რჩევაშია გონიერება.

²³არის ცბიერება, რომელიც სისაძაგლეა, და არის უგუნური, რომელსაც სიბრძნე აკლია.

²⁴უფლის მოშიში უგუნური სჯობს მაღალგონიერს, მაგრამ კანონის დამრღვევს.

²⁵არის დახვეწილი, მაგრამ ურჯულო ცბიერება, მზაკვრულად რომ იღვწის თავისი კანონის დასადგენად.

²⁶არის ვერაგი, მწუხარედ ქედმოხრილი რომ დაიარება, მაგრამ შიგნით სავსეა მზაკვრობით.

²⁷სახეს მალავს და თავს ყრუდ გვაჩვენებს, მაგრამ სადაც არ ელი, იქ დაგასწრებს.

²⁸და თუ ძალა არ ეყოფა საიმისოდ, რომ სცოდოს, დროს იპოვის და ცოდვას მაინც ჩაიდენს.

²⁹კაცი გარეგნობით იცნობა, ხოლო გონიერი, შეხვდრისას — სახის გამომეტყველებით.

³⁰სამოსი, სიცილი და სიარული ამჟღავნებს ადამიანს.