Read ქართული ბიბლია, სრული ვერსია Sirach (Ecclesiasticus) 25 Bible Online

Sirach (Ecclesiasticus) 25 - ქართული ბიბლია, სრული ვერსია bible

Sirach (Ecclesiasticus) 25

¹სამი რამით შევიმკე და დამშვენებული წარვსდექ უფლისა და კაცთა წინაშე: ძმათა ერთსულოვნებით, მოყვასთა სიყვარულითა და მეუღლეთა თანხმობით.

²სამგვარი ხალხი შეიძულა ჩემმა სულმა და შემზიზღდა მათი ცხოვრება: ქედმაღალი გლახაკი, ცრუ მდიდარი და ჭკუანაკლი ბებერი მრუში.

³რაც სიჭაბუკეში არ შეგიგროვებია, როგორღა შეიძენ სიბერეში?

⁴რარიგ შეშვენის ხანდაზმულს განკითხვა და თმაჭაღარას — რჩევის მოცემა.

⁵რა მშვენიერია მხცოვანთა სიბრძნე და დიდებულთა აზრი და რჩევა.

⁶მოხუცთა გვირგვინია მრავალნაცადობა და მათი სიქადული — უფლის შიში.

⁷ცხრა აზრი დავლოცე გულში და მეათეს ენით ვიტყვი: ნეტავი იმას, ვინც შვილებში ხარობს და მოესწრო მტრების დაცემას.

⁸ნეტავი იმას, ვისაც ჭკვიანი ცოლი ჰყავს, ვინც არა სცოდა ენით და თავისზე უღირსს არ ემსახურა.

⁹ნეტავი იმას, ვინც მოიხვეჭა სიბრძნე და გადასცემს მას მსმენელთ.

¹⁰დიდია სიბრძნის მომხვეჭი, მაგრამ უფლის მოშიშზე უმეტესი არავინაა.

¹¹უფლის შიში ყველაფერს აღემატება, ვინ შეიძლება შეედაროს მის მქონეს?

¹³შეიძლება ყველა ჭრილობა აიტანო, გარდა გულის ჭრილობისა და გაუძლო ყველა სიავეს, მაგრამ არა სიავეს ქალისას;

¹⁴ყოველგვარ თავდასხმას, მაგრამ არა თავდასხმას მოძულეთა, და ყოველგვარ შურისძიებას, მაგრამ არა შურისძიებას მტერთა.

¹⁵არ არსებობს უფრო შხამიანი თავი, ვიდრე თავი გველისა, და არ არსებობს რისხვა უფრო მძაფრი, ვიდრე რისხვა მტრისა.

¹⁶მერჩია ლომსა და დრაკონთან მეცხოვრა, ვიდრე ანჩხლ ცოლთან.

¹⁷სიავე ქალს იერს უცვლის: რაღა მისი პირქუში სახე და რაღა დათვისა.

¹⁸დაჯდება მისი ქმარი ახლობლებს შორის და თავისდა უნებურად მწარედ ამოიოხრებს.

¹⁹ვერავითარი სიავე ვერ შეედრება ქალის სიავეს; ცოდვილის ხვედრი ნუ აშოროს ღმერთმა.

²⁰რაღა ქვიშიან აღმართზე სიარული ბერიკაცისათვის და რაღა ანჩხლი ცოლი თვინიერი ქმრისთვის.

²¹ნუ მოგნუსხავს ქალის სილამაზე, ნუ დაგიმონებს ვნება.

²²სიმწარე, სირცხვილი და აუგია, როცა ცოლი ბატონობს ქმარზე.

²³მჭმუნვარე გული, სევდიანი სახე და გულის წყლულია კაპასი ცოლი; უღონოდ ჩამოშვებული ხელები და მოკვეთილი მუხლებია ცოლი, რომელიც ქმარს არ აბედნიერებს.

²⁴ქალია ცოდვის სათავე და ჩვენი სიკვდილის მიზეზი.

²⁵ნუ მისცემ წყალს სადინარს და ანჩხლ ქალს — სიტყვის უფლებას.

²⁶თუკი ვერ მოგითოკავს, მოიკვეთე შენი ხორცისგან.