Read ქართული ბიბლია, სრული ვერსია Sirach (Ecclesiasticus) 41 Bible Online

Sirach (Ecclesiasticus) 41 - ქართული ბიბლია, სრული ვერსია bible

Sirach (Ecclesiasticus) 41

¹ო, სიკვდილო, რა მწარეა შენი გახსენება ადამიანისათვის, მშვიდად რომ ცხოვრობს თავის სამყოფელში; უზრუნველი და უბედნიერესი კაცისათვის, ვისაც ჯერ კიდევ შეუძლია სმა-ჭამით ტკბობა.

²ო, სიკვდილო, საამურია შენი განაჩენი გაჭირვებული, ძალადაწრეტილი, მიხრწნილი და ზრუნვით შეურვებული, სასომიხდილი და თმენადაკარგული კაცისთვის.

³ნუ გეშინია სიკვდილის განაჩენისა, გაიხსენე შენი წინაპარნი და შთამომავალნი.

⁴ესაა უფლის განაჩენი ყოველი ხორციელის მიმართ; მაშ, რად ეურჩები იმას, რაც ესათნოება უფალს? რა ათი, ან ასი, თუ ათასი წელი? — საიქიოში არ აღირიცხება სიცოცხლის ჟამი.

⁵ცოდვილთა შვილნი საძულველნი არიან და ურჯულოთა ხშირი სტუმარნი.

⁶ცოდვილთა შვილების სამკვიდრო გაპარტახდება და სამუდამო სირცხვილი იქნება მათ შთამომავალთა ხვედრი.

⁷ურჯულო მამებს შვილები გმობენ, რადგან მათ გამო ჩაცვივან სირცხვილში.

⁸ვაი თქვენ, ურჯულონო, რომელთაც დაუტევეთ უზენაესი ღვთის სჯული.

⁹როცა იბადებით, შესაჩვენებლად იბადებით, და როცა კვდებით, შეჩვენებაა თქვენი ხვედრი.

¹⁰ყოველივე, რაც მიწიდანაა, მიწად მიიქცევა; ასევე ურჯულონიც — შეჩვენდებიან წარსაწყმედად.

¹¹ადამიანები თავიანთ სხეულებს გლოვობენ, ხოლო ცოდვილთა უკეთური სახელიც კი წარიხოცება.

¹²იზრუნე სახელზე, რადგან ის უფრო დიდხანს იქნება შენთან, ვიდრე ათასობით დიდი საგანძური ოქროსი.

¹³კეთილდღეობის დღეები დათვლილია, კეთილი სახელი კი სამარადისოდ რჩება.

¹⁴მშვიდობით შეინახეთ შეგონება, შვილებო; დაფარული სიბრძნეც ფუჭია და უჩინარი განძიც.

¹⁵თავისი სიბრიყვის დამფარველი კაცი სჯობს თავისი სიბრძნის დამფარველს.

¹⁶მე გეტყვით, რისი უნდა გრცხვენოდეთ, რადგანაც ყოველგვარი სირცხვილის შენახვა როდია კარგი, და ყველაფერი ყველას მიერ ჭეშმარიტებით როდი ფასდება.

¹⁷გრცხვენოდეთ დედ-მამის წინაშე უზნეობისა, და სიცრუისა — წინამძღოლისა და მბრძანებლის წინაშე.

¹⁸დანაშაულისა მსაჯულისა და მთავრის წინაშე, და ურჯულოებისა — საკრებულოს და ხალხის წინაშე;

¹⁹უსამართლობისა ნაცნობ-მეგობართა წინაშე, და ქურდობისა — მეზობლების წინაშე; ამისვე გრცხვენოდეს ღვთის სიმართლისა და აღთქმის წინაშე; აგრეთვე სუფრაზე იდაყვით დაყრდნობისა;

²⁰სიცრუისა ვალის აღებისას თუ დაბრუნებისას, და დუმილისა მის წინაშე, ვინც გესალმებათ;

²¹მეძავის ცქერისა, და ნათესავისაგან პირის ბრუნებისა;

²²წილისა თუ ძღვნის წართმევისა, და გათხოვილი ქალის მიმართ გულისთქმისა;

²³საკუთარ მოახლესთან არშიყობისა — ახლოს არ გაეკარო მის საწოლს.

²⁴მეგობრებისადმი ყვედრებისა, და გაცემის შემდეგ — დამადლებისა;

²⁵ჭორის გამეორებისა, და დაფარულ სიტყვათა გამჟღავნებისა;

²⁶და იქნები ჭეშმარიტად მოკრძალებული და ყველას სიყვარულს მოიპოვებ.