Read ქართული ბიბლია, სრული ვერსია Sirach (Ecclesiasticus) 42 Bible Online

Sirach (Ecclesiasticus) 42 - ქართული ბიბლია, სრული ვერსია bible

Sirach (Ecclesiasticus) 42

¹აი, რისი ნუ შეგრცხვება, რომ პირფერობის გამო არ სცოდო:

²უზენაესის სჯულისა და აღთქმის აღსრულებისა და ურჯულოსათვის მსჯავრის გამოტანისა;

³ამხანაგებსა თუ თანამოაზრეებთან დავისა და მეგობრებისათვის მემკვიდრეობის დატოვებისა;

⁴ზომა-წონაში სიზუსტისა და ბევრისა თუ ცოტას მოგებისა;

⁵ვაჭრობაში გამორჩენისა, შვილების მკაცრად აღზრდისა და უხეირო მსახურისთვის გვერდების დასისხლიანებისა.

⁶სადაც ცუდი ცოლია, იქ კარგია ბეჭედი, და სადაც ბევრი ხელია — საკეტი.

⁷თუ გასცემ, ანგარიშითა და ზომით გაეცი, და ყოველი გაცემა თუ მიღება აღნუსხე.

⁸ნუ გრცხვენია ჭკუა დაარიგო უგუნურს, ბრიყვს და ბერიკაცს, ჭაბუკებს რომ ეჯიბრება, და ჭეშმარიტად ზრდილი და ყველას მოსაწონი იქნები.

⁹ქალიშვილია მამისათვის უძილობის ფარული მიზეზი, მასზე ზრუნვაა თეთრად რომ ათენებინებს ღამეებს: ყმაწვილქალობაში — ვაითუ გაუთხოვარი დამრჩესო; გათხოვდება და — ვაითუ ქმარს შესძულდესო;

¹⁰ქალწულია და, ვაითუ შემიგინონ და მამის სახლში დაორსულდესო; ქმრიანია და, ვაითუ უღალატოს ან უნაყოფო გამოდგესო.

¹¹თავნება ასულს ფხიზლად ადევნე თვალი, რომ მტრების დასაცინად, ქალაქის საჭორაოდ და ხალხის საკიცხველად არ გაქციოს.

¹²ნურავის სილამაზეზე ნუ გრჩება თვალი და ქალებში ნუ დაჯდები.

¹³რადგანაც სამოსიდან ჩრჩილი გამოდის, ქალიდან კი — ქალური ცბიერება.

¹⁴კაცის სიავე სჯობს ქალის სიკეთეს; ქალია, რომ გარცხვენს და გაყივნებს.

¹⁵ახლა უფლის საქმეთაც გავიხსენებ და გაუწყებთ, რაც მინახავს; უფლის სიტყვითაა მისი საქმენი.

¹⁶მანათობელი მზე ყველაფერს ხედავს, და მთელი მისი საქმე სავსეა უფლის დიდებით.

¹⁷წმიდათაც არ მისცა უფალმა იმისი ნება, რომ განეცხადებინათ ყოველი სასწაული მისი, რაც აღასრულა ყოვლისმპყრობელმა, რათა სამყარო მტკიცედ მდგარიყო მისი დიდებით.

¹⁸ის ჩასწვდა უფსკრულის სიღრმესაც და კაცის გულსაც, და იხილა ყოველი ხვეული მათი, რადგანაც უზენაესმა შეიცნო მთელი საცოდნელი და განჭვრიტა საუკუნის ნიშანი.

¹⁹იგია წარსულისა თუ მომავლის მაუწყებელი და დაფარულთა კვალის გამცხადებელი.

²⁰არ გამოეპარება არც ერთი ნაფიქრალი, და არც ერთი სიტყვა დაფარული არ არის მისგან.

²¹მან განალაგა წესრიგით თავისი სიბრძნის დიადი საქმენი, რადგანაც არის უკუნითი უკუნისამდე; არცრა შეჰმატებია და არცრა დაჰკლებია, არც ვინმე მრჩეველი დასჭირვებია.

²²რარიგ სანუკვარია მისი ყოველი საქმე, თვით პაწაწინა ნაპერწკლამდე, რისი დანახვაც კი შეიძლება.

²³ყველაფერი ცოცხლობს და არსებობს სამარადისოდ, ყოველგვარი საჭიროებისათვის, და ყველა მას ემორჩილება.

²⁴ყველაფერი წყვილ-წყვილადაა, ერთიმეორის პირისპირ, და არაფერი შეუქმნია ნაკლულევანი.

²⁵ერთი ამტკიცებს მეორის სიკეთეს, და ვის მობეზრდება მათი დიდების ცქერა?