Read ქართული ბიბლია, სრული ვერსია Sirach (Ecclesiasticus) 43 Bible Online

Sirach (Ecclesiasticus) 43 - ქართული ბიბლია, სრული ვერსია bible

Sirach (Ecclesiasticus) 43

¹სიდიადე სიმაღლისა — წმიდა ცამყარი, ხედი ზეცისა — დიდების სახილველი.

²მზე ამოსვლისთანავე გვიცხადებს თავისი მოვლინებით, რარიგ საკვირველია უზენაესის საქმე.

³თავისი შუადღისას ახმობს ქვეყანას, და მის მცხუნვარებას წინ ვინ დაუდგება?

⁴ქურას ახურებენ ნაკეთობათა გამოსადნობად, მზე კი სამმაგად ბუგავს მთებს; ცეცხლის ალს აფრქვევს და თვალებსა გვჭრის სხივთა ბრწყინვალებით.

⁵დიდია უფალი, მისი შემოქმედი, ვისი სიტყვითაც მიმოიქცევა თავის სარბიელზე.

⁶მთვარეც დროულად უჩვენებს ყველას ჟამსა და საუკუნის ნიშანს.

⁷მთვარე გვაუწყებს დღესასწაულის ნიშანს, მისი ნათელი იკლებს გავსების შემდეგ.

⁸თვე მისი სახელიდან მოდის. საოცარია მისი ზრდა მისივე ცვალებადობით; ციური მხედრობის საჭურველი, ცამყარზე მანათობელი.

⁹ცის მშვენება ვარსკვლავთა დიდებაა, სხივოსანი სამკაული უფლის ზესკნელში.

¹⁰წმიდის სიტყვით დამდგარან მწყობრად, და არ იღლებიან თავიანთ საგუშაგოზე.

¹¹შეხედე ცისარტყელას და აკურთხე მისი შემოქმედი, რა მშვენიერია თავისი ელვარებით.

¹²დიდებულ რკალად გაჰკვრია ზეცას, უზენაესის ხელმა მორკალა იგი.

¹³თავისი სიტყვით მოავლენს თოვლს და აელვებს ელვას თავისი მსჯავრისას.

¹⁴ამისთვის გაიხსნენ საგანძურნი და ფრთოსნებივით გამოეფინენ ღრუბლები.

¹⁵თავისი სიდიადით გაამკვრივა ღრუბლები და მტვრად აქცია სეტყვის ლოდები.

¹⁶მისი მზერით ირყევიან მთები და მისი ნებით ქრის სამხრეთის ქარი.

¹⁷მისი გრგვინვის ხმა ათრთოლებს მიწას, ისევე, როგორც ჩრდილოეთის ქარიცა და გრიგალიც.

¹⁸თავქვე დაშვებული ფრთოსნებივით ჩამოჰყრის თოვლს, კალიასავით რომ ეფინება მიწას; თვალი შეჰხარის მის სისპეტაკეს და გულს აოცებს მისი ბარდნა.

¹⁹მარილივით მოაფრქვევს მიწაზე ჭირხლს, გაყინული ეკალივით რომ იჩხვლიტება.

²⁰დაბერავს ჩრდილოეთის სუსხიანი ქარი და წყალი ყინულად იქცევა, რომელიც მოსარკავს წყალთა ყოველ შესაკრებელს და აბჯარივით შემოსავს წყალს.

²¹გადაჭამს მთებს, გადახრუკავს უდაბნოს და ცეცხლივით გადატრუსავს ბალახს.

²²მაგრამ ყველაფერს სწრაფად კურნავს ნისლი და ჩამოყრილი ცვარი აგრილებს ხვატს.

²³თავისი ბრძანებით დააცხრო უფსკრული და კუნძულებით მოფინა იგი.

²⁴ზღვაოსნები მოგვითხრობენ იქაური განსაცდელის ამბავს, და გვაოცებს, რასაც ვისმენთ ჩვენი ყურით.

²⁵რადგანაც იქ არის ათასგვარი უცნაურობა და საოცრება, ყოველი ჯურის ცხოველი და ზღვის ურჩხულნი.

²⁶მისი წყალობით იგნებენ გზას მისი მაცნენი და მისივე სიტყვით წესრიგდება ყოველი.

²⁷ბევრი რამ შეგვეძლო გვეთქვა, მაგრამ ვერ მივწვდებით მას; მოკლედ რომ მოვჭრათ, ის არის ყოველი.

²⁸სად ვპოვოთ ძალა მის სადიდებლად? რადგანაც ყველა თავის ქმნილებას აღემატება სიდიადით.

²⁹საშინელია უფალი და უდიადესი, საოცარია მისი ძალმოსილება.

³⁰უფლის მადიდებელნო, როგორც შეგიძლიათ, აღამაღლეთ იგი; ის მაინც უფრო მაღლა იქნება; მოიკრიბეთ ძალა მის სადიდებლად, თუმცა ფუჭია ძალისხმევა: ვერ მისწვდებით.

³¹ვის უხილავს, რომ წარმოგვიჩინოს? ვის უდიდებია იმგვარად, როგორიც არის?

³²ყოველივე ამაზე გაცილებით უფრო მეტი დაფარულია, ჩვენ მხოლოდ მის საქმეთა მცირე ნაწილი თუ ვიხილეთ.

³³ყველაფერი უფალმა შექმნა და ღვთისმოსავებს უბოძა სიბრძნე.