Read ქართული ბიბლია, სრული ვერსია Sirach (Ecclesiasticus) 44 Bible Online

Sirach (Ecclesiasticus) 44 - ქართული ბიბლია, სრული ვერსია bible

Sirach (Ecclesiasticus) 44

¹ახლა კი ვაქოთ სახელოვანი ვაჟკაცნი და ჩვენი მოდგმის მამა-პაპანი.

²მრავალი სასახელო რამ მოიმოქმედა უფალმა მათი მეოხებით, უკუნისიდანაა მისი სიდიადე.

³ისინი მეფობდნენ თავიანთ საბრძანებელში, ძლიერებით სახელგანთქმულნი, ბრძენი მრჩეველნი და წინასწარმეტყველებათა მაუწყებელნი;

⁴თათბირისას ხალხის წინამძღოლნი, მისი მოძღვარნი და ბრძნული სიტყვებით აღმზრდელნი;

⁵ტკბილი ჰანგების მთხზველნი და ჩაწერილ თქმულებათა წარმომთქმელნი;

⁶მდიდარნი და ძალმორჭმულნი, თავიანთ ჭერქვეშ მშვიდად მცხოვრებნი;

⁷თავიანთ თაობებში პატივდებულნი და თავიანთი დროის სიქადულნი.

⁸ზოგიერთმა სადიდებლად დატოვა სახელი;

⁹ზოგიერთისა კი სახსენებელიც არ დარჩენილა, ისე გაქრნენ, თითქოს არც ყოფილიყვნენ, ისე განქარდნენ, თითქოს არც შობილიყვნენ, ისევე, როგორც მათი შვილები.

¹⁰მაგრამ, აი, მოწყალე კაცნი, რომელთა მართალი საქმენი დავიწყებას არ მისცემია.

¹¹მათ თესლს გადაეცა მათი სიკეთე, მათი მემკვიდრეობა — მათსავ ნაშიერთ.

¹²მათი შთამომავლობა აღასრულებს თავის ვალს, და მათი შვილები — მათი წყალობით.

¹³უკუნისამდე იქნება მათი თესლი, და მათი დიდება არ წაიშლება.

¹⁴მშვიდობით განისვენეს მათმა ცხედრებმა და თაობებში იცოცხლებს მათი სახელი.

¹⁵ხალხები მოგვითხრობენ მათ საქმეს და საკრებულო გვაუწყებს მათ ქებას.

¹⁶ენოქი ესათნოვა უფალს და ცად აყვანილ იქნა, ნიმუში სინანულისა თაობებისთვის.

¹⁷ნოე სრულყოფილი და მართალი აღმოჩნდა; რისხვის ჟამს შეწყალებულ იქნა და, როცა წარღვნა მოხდა, ნატამალად დარჩა მიწაზე.

¹⁸და მიეცა საუკუნო აღთქმა, რომ აღარცერთი ხორციელი წარიხოცებოდა წარღვნით.

¹⁹აბრაამი — დიდი მამა ხალხთა სიმრავლისა, რომელსაც ვერავინ შეედრებოდა დიდებით;

²⁰მან დაიცვა უზენაესის სჯული და აღთქმით შეეკრა მას; თავისი ხორცით განამტკიცა აღთქმა და არ შერყევია რწმენა განსაცდელში.

²¹ამიტომაც ფიცით აღუთქვა უფალმა, რომ ხალხები იკურთხებოდნენ მის თესლში, რომ ქვიშასავით გაამრავლებდა და ვარსკვლავებამდე აამაღლებდა მას, რომ ზღვიდან ზღვამდე და მდინარიდან მიწის კიდემდე მისცემდა მას სამკვიდროს.

²²და ისააკსაც იგივე აღუთქვა მამამისის — აბრაამის გამო;

²³ყოველი ადამიანის კურთხევა და აღთქმა იაკობის თავზე დაავანა, სცნო იგი თავისი კურთხევით, მისცა სამკვიდრო; განუსაზღვრა წილხვედრი და თორმეტ ტომში დაანაწილა.