Read ქართული ბიბლია, სრული ვერსია Sirach (Ecclesiasticus) 45 Bible Online

Sirach (Ecclesiasticus) 45 - ქართული ბიბლია, სრული ვერსია bible

Sirach (Ecclesiasticus) 45

¹და წარმოშვა მისგან მოწყალე კაცი, მადლის მპოვნელი ყველა ხორციელის თვალში, რომელიც უყვარდათ ღმერთსაც და კაცთაც; კურთხეულია მისი სახელი.

²დიდებით წმიდათ გაუტოლა და მტრების დასაშინებლად განადიდა საქმეთა წყალობით.

³მისი სიტყვებისამებრ მოავლინა ნიშები და განადიდა მეფეთა წინაშე; მისი მეშვეობით გასცემდა ბრძანებას თავისი ხალხისადმი და მასვე უჩვენა თავისი დიდებაც.

⁴ერთგულებისა და თვინიერებისათვის წმიდაყო იგი და ყოველი ხორციელისაგან გამოარჩია.

⁵ასმინა თავისი ხმა, შეიყვანა ნისლში და პირისპირ მისცა მცნებანი, სჯული სიცოცხლისა და შემეცნებისა, რათა იაკობისთვის ესწავლებინა აღთქმა და ისრაელისათვის — მისი ბრძანებანი.

⁶აღამაღლა აარონი, სიწმიდით მისი სწორი, და მისივე ძმა ლევის ტომიდან.

⁷საუკუნო აღთქმა დაუდო და ერის მღვდლობა ჩააბარა, საგანგებო სამკაულით აკურთხა და შემოარტყა სარტყელი დიდებისა.

⁸სრულყოფილებითა და სასალუქო სამოსით — საწმერთულით, ტალავარითა და ეფოდით შემოსა იგი,

⁹ბურთულები შემოარტყა და მრავალი ეჟვანიც შემოავლო, რათა ფეხის გადადგმისას ხმა გამოეცათ და მთელი ტაძარი აევსოთ წკრიალით, მისი ხალხის შვილთა სამახსოვროდ;

¹⁰წმიდა სამოსით, ოქსინოთი, იაკინთითა და პორფირით, ჭრელად ნაქარგი ქსოვილით, მსჯავრის სიტყვით, ურიმ-თუმიმით, ოსტატურად ნაქსოვი მოსასხამით

¹¹და ნაირფერად მოციმციმე პატიოსანი თვლებით მოოჭვილი, ოქრომჭედლის ნახელავი ბეჭდით შეამკო იგი, რომელზედაც სამახსოვროდ ამოეკვეთათ წარწერა ისრაელის ტომთა რიცხვის მიხედვით.

¹²თავსაბურავზე — ოქროს გვირგვინი, სიწმიდის ნიშანი, დიდება ღირსებისა, დიდებული სამკაული, ნატიფი ხელოვნებით ნაჭედი, ამოდ სახილველი.

¹³მანამდე არ ყოფილა მსგავსი მშვენება და არც უცხოტომელი შემოსილა ასე, არამედ მხოლოდ მისი ძენი და მისი შთამომავალნი სამარადჟამოდ.

¹⁴მისი მსხვერპლი მთლიანად შეიწირება, დღემუდამ ორჯერ.

¹⁵მოსემ აუვსო ხელი და წმიდა ზეთი სცხო; მიეცათ მასაც და მის თესლსაც საუკუნო აღთქმა სამარადისოდ, რათა ემსახურონ უფალს და იმავდროულად აკურთხევდნენ ხალხს მისი სახელით.

¹⁶გამოარჩია იგი ცოცხალთა შორის, რათა უფლისთვის მიერთმია ძღვენი: საკმეველი და კეთილსურნელება იმის სახსოვრად, რომ შეიწყალა თავისი ხალხი.

¹⁷მისცა მას თავისი მცნებებით უფლება მსჯავრის გამოტანისა, რათა ესწავლებინა იაკობისთვის მისი მოწმობანი და თავისი სჯულით გაენათლებინა ისრაელი.

¹⁸წინ აღუდგნენ მას უცხონი, მისდამი შურით აღძრულნი უდაბნოში — დათანისა და აბირამის ხალხი, აგრეთვე კორახის ხროვა, მრისხანებითა და სიშმაგით.

¹⁹იხილა უფალმა და არ მოეწონა ეს, ამიტომაც დაიღუპნენ თავიანთი მრისხანებითა და სიშმაგით; სასწაულები მოახდინა მათ წინააღმდეგ და თავისი ცეცხლის ალით მოსრა ისინი.

²⁰ამრავლა აარონის დიდება და მისცა მას მემკვიდრეობა — უწილადა პირველმოწეული ნაყოფი, უწინარეს ყოვლისა კი გაუმზადა პური ძღომაზე;

²¹რადგანაც ისინი ჭამენ უფლის მსხვერპლს, რომელიც მისცა მას და მის შთამომავალთ.

²²მაგრამ არ აქვს მემკვიდრეობა ხალხის ქვეყანაში და არც წილი — ხალხს შორის, რადგანაც უფალია მისი წილიც და სამკვიდროც.

²³ფინხასი, ელეაზარის ძე, მესამეა დიდებით, მისი გულმოდგინების გამო ღვთისმოშიშებაში, რაკიღა მტკიცედ იდგა ხალხის განდგომისას თავისი სულის სიქველით და ასე გამოითხოვა შეწყალება ისრაელისთვის.

²⁴ამიტომაც მიეცა მშვიდობის აღთქმა, რომ სათავეში ჩასდგომოდა საწმიდარსა და მის ხალხს, რათა მას და მის შთამომავალთ საუკუნოდ ჰქონოდათ მღვდელმთავრობა.

²⁵ასევე მიეცა აღთქმა დავითსაც, იესეს ძეს, იუდას ტომიდან, რომ სამეფო მემკვიდრეობა გადავიდოდა მხოლოდ შვილიდან შვილზე, როგორც აარონის და მის შთამომავალთა მემკვიდრეობა.

²⁶ღმერთმა თქვენც ჩაგიდოთ სიბრძნე გულში, რომ სიმართლით განიკითხოთ მისი ხალხი, რათა არ წარიხოცოს მისი სიკეთე და თაობიდან თაობას გადაეცეს დიდება მისი.