Read ქართული ბიბლია, სრული ვერსია Sirach (Ecclesiasticus) 49 Bible Online

Sirach (Ecclesiasticus) 49 - ქართული ბიბლია, სრული ვერსია bible

Sirach (Ecclesiasticus) 49

¹იოშიას ხსოვნა შეზავებული საკმეველია, მემირონის ხელით შეკაზმული სიტკბოებად რომ ადნება ბაგეს, როგორც თაფლი; საამო, როგორც სიმღერა ღვინის სმისას.

²წრფელი გზით იღვწოდა ხალხის მოსაქცევად და შემუსრა ურჯულოთა სიბილწე.

³უფლისკენ მიიქცა გულით და ურჯულოების ჟამს ღვთისმოსაობა განამტკიცა.

⁴დავითის, ხიზკიასა და იოშიას გარდა ყველამ სცოდა ცოდვით, რადგანაც დაუტევეს უზენაესის სჯული; იუდას მეფენი გადაეგნენ,

⁵რადგანაც სხვებს მისცეს თავიანთი რქა, და თავიანთი დიდება — უცხო ტომს.

⁶მტრებმა ცეცხლს მისცეს სიწმიდის რჩეული ქალაქი და გაუკაცურდა მისი გზები,

⁷როგორც იწინასწარმეტყველა იერემიამ, რომელიც შეურაცხყვეს, თუმცა დედის საშოშივე იკურთხა წინასწარმეტყველად, რათა ამოეძირკვა, ამოეგდო და მოესრა, მაგრამ ამასთანავე ეშენებინა და დაენერგა კიდეც.

⁸ეზეკიელმა იხილა დიდების ხილვა, ღმერთმა რომ უჩვენა ქერუბიმის ეტლზე.

⁹თავსხმით შეახსენა მას მტრები და კეთილად მოექცა სწორ გზაზე დამდგართ.

¹⁰ამოყვავილდნენ თავიანთი საფლავებიდან 12 წინასწარმეტყველის ძვლები, რადგანაც ანუგეშეს იაკობი და სარწმუნო სასოებით იხსნეს ისინი.

¹¹როგორ ვადიდოთ ზერუბაბელი? ის იყო როგორც ბეჭედი მარჯვენა ხელზე.

¹²ასევე იესოც, იოცადაკის ძე: მათ თავიანთ სიცოცხლეში ააგეს სახლი და აღუმართეს უფალს წმიდა ტაძარი, საუკუნო დიდებისთვის გამზადებული.

¹³დიდია ხსოვნა ნეემიასიც, დაქცეული გალავანი რომ აღგვიდგინა, დაუტანა ბჭენი და საკლიტურნი და შეაკეთა ჩვენი სახლები.

¹⁴ამ ქვეყნად არავინ შობილა ენოქის მსგავსი, მიწიდან რომ იქნა ატაცებული.

¹⁵არც იოსების მსგავსი კაცი დაბადებულა, ძმების წინამძღოლი, ხალხის მეოხი. პატივი მიეგო მის ძვლებს.

¹⁶განითქვა კაცთა შორის სემისა და სეთის სახელი, მაგრამ შექმნილთაგან ადამია ყველა ცოცხალზე უმეტესი.