Read ქართული ბიბლია, სრული ვერსია Sirach (Ecclesiasticus) 5 Bible Online

Sirach (Ecclesiasticus) 5 - ქართული ბიბლია, სრული ვერსია bible

Sirach (Ecclesiasticus) 5

¹ნუ გაქვს იმედი შენი ქონებისა და ნუ იტყვი — სამყოფი მაქვსო.

²ნუ აჰყვები შენს გულისთქმას და შენს ძალას, ნუ ივლი სურვილთა კვალზე.

³ნუ იტყვი, ვინ მიყმობსო? რადგან უფალი მოგაგებს შენი თავგასულობის სანაცვლოს.

⁴ნუ იტყვი, შევცოდე, ეს რა დამემართაო, რადგან სულგრძელია უფალი.

⁵შეწყალების მოიმედე უშიშრად ნუ იქნები და ცოდვას ნუ მიუმატებ ცოდვას.

⁶ნუ იტყვი, დიდია მისი გულმოწყალება და მრავალ ცოდვას მომიტევებსო, რადგანაც მასთანაა წყალობაცა და რისხვაც და ცოდვილებს თავს დაატყდება მისი გულისწყრომა.

⁷ნუ აყოვნებ და სამერმისოდ ნუ გადასდებ მიქცევას უფლის მიმართ, რადგანაც ანაზდეულად შეგმუსრავს მისი რისხვა და წარწყმდები შურისგების ჟამს.

⁸ნუ გაქვს უსამართლოდ მონახვეჭის იმედი, რადგანაც ვერას გარგებს უკანასკნელ დღეს.

⁹ნუ აჰყვები ყველა ქარს და ნუ გაჰყვები ყველა ბილიკს, როგორც ორპირი ცოდვილი.

¹⁰მტკიცე იყავ შენი ცოდნით და ერთი იყოს სიტყვა შენი.

¹¹სწრაფი იყავ სმენად და სულგრძელად გაეცი პასუხი.

¹²თუ რამ იცი, მიუგე მოყვასს, თუ არა და, ბაგეზე გედოს ხელი.

¹³სიტყვებშია პატივიც და უპატიობაც, და ენაა კაცის დამმხობი.

¹⁴ნურავინ გიცნობს დამსმენად და ნუ იმზაკვრებ ენით, რადგანაც ქურდის ხვედრი სირცხვილია, ორპირისა კი — მკაცრი გმობა.

¹⁵ნუ იქნები უგუნური ნურც დიდსა და ნურც მცირეში, რადგანაც აუგიანი სახელი სირცხვილსა და კიცხვას მოგიტანს ორპირი შემცოდესავით.