Read ქართული ბიბლია, სრული ვერსია Sirach (Ecclesiasticus) 50 Bible Online

Sirach (Ecclesiasticus) 50 - ქართული ბიბლია, სრული ვერსია bible

Sirach (Ecclesiasticus) 50

¹სიმონმა, ონიასის ძემ, დიდმა მღვდელმა, შეაკეთა სახლი და თავისი სიცოცხლის განმავლობაში გაამაგრა ტაძარი.

²მის მიერ დაედო საფუძველი ორმაგ სიმაღლეს — აღიმართა ტაძრის მაღალი გალავანი.

³მის დროს დაიკლო წყალსაცავმა, დაპატარავდა ზღვისხელა ტბა.

⁴ხალხისთვის რომ უბედურება აეცილებინა თავიდან, ალყისგან თავდასაცავად გაამაგრა ქალაქი.

⁵რა დიდებული სანახავი იყო, ხალხით გარშემორტყმული რომ გამოდიოდა კრეტსაბმელიდან.

⁶როგორც ღრუბლებში ცისკრის ვარსკვლავი, როგორც მთვარე გავსების დღეებში;

⁷როგორც მზე, თავს რომ დანათის უზენაესის ტაძარს; როგორც დიდების ღრუბლებში შუქმფენი ცისარტყელა.

⁸როგორც ვარდის კოკორი გაზაფხულზე; როგორც შროშანი წყლის პირას; როგორც საკმევლის ხის ტოტი ზაფხულის დღეს;

⁹როგორც საკმეველი, რომელიც იწვის საცეცხლურში; როგორც ოქროს ჭურჭელი, პატიოსანი თვლებით შემკული;

¹⁰როგორც ზეთისხილის ხე, ნაყოფით დახუნძლული; როგორც კიპარისი, ღრუბლებამდე ამაღლებული,

¹¹როცა დიდების სამოსს ისხამდა და იმოსებოდა დიდებული სამკაულებით, წმიდა საკურთხეველზე ასვლისას დიდებას ჰფენდა მთელ ტაძარს.

¹²როცა საკურთხევლის კერასთან მდგარი წილობს იღებდა მღვდლების ხელიდან, ირგვლივ გვირგვინივით შემოსდგომოდნენ ძმები და როგორც ლიბანის კედარს პალმის რტონი, გარს ეხვივნენ.

¹³აარონის ძენი თავიანთი დიდებითა და საუფლო შესაწირავით ხელში, ისრაელის მთელი საკრებულოს წინაშე.

¹⁴საკურთხეველზე მსახურების დასასრულს ძღვენს მიართმევდა უზენაეს ყოვლისმპყრობელს,

¹⁵სამსხვერპლო თასისაკენ იწვდიდა ხელს, ყურძნის სისხლს ასხამდა შიგ და საკურთხევლის კვარცხლბეკზე ღვრიდა, რათა სამყაროს უზენაესი მეუფე დამტკბარიყო მისი ყნოსვით.

¹⁶მაშინ შეჰღაღადებდნენ აარონის ძენი, ჩაჰბერავდნენ ნაჭედ საყვირებს და გასახსენებლად აიმაღლებდნენ ხმას უზენაესის წინაშე.

¹⁷მაშინ მთელი ხალხი სწრაფად ემხობოდა პირქვე, რათა თაყვანი ეცა თავისი უფლისათვის, უზენაესი და ყოვლისმპყრობელი ღმრთისთვის.

¹⁸მგალობლები ქებას ასხამდნენ თავიანთი ხმებით და ტაძარში გუგუნებდა ტკბილი საგალობელი.

¹⁹ხალხი ევედრებოდა უზენაეს უფალს და ლოცულობდა მისი მოწყალების წინაშე, ვიდრე ისმოდა უფლის ქება, და ასე მთავრდებოდა ღვთისმსახურება.

²⁰მერე ჩამოსვლისას ხელს გაიწვდიდა ისრაელის მთელი საკრებულოს თავზე, რათა უფლის მიერ ეკურთხებინა ხალხი თავისი ბაგით და მოწიწებით წარმოეთქვა მისი სახელი.

²¹ხალხი ხელახლა ემხობოდა პირქვე, რათა უზენაესისაგან მიეღო კურთხევა.

²²მაშ, ადიდეთ სამყაროს გამრიგე ღმერთი, ყოველგან დიად საქმეთა შემოქმედი, დედის საშოდანვე რომ გვიგრძელებს სიცოცხლის ყავლს და თავისი წყალობისამებრ გვექცევა.

²³დაე, სიხარული მოჰფინოს ჩვენს გულს და იყოს მშვიდობა ისრაელში დღეიდან უკუნისამდე.

²⁴მოწყალება ნუ მოგვაკლოს და გვიხსნას ჩვენს დღეებში.

²⁵ორი ხალხი მოიძულა ჩემმა სულმა, მესამეს კი არც ეთქმის ხალხი.

²⁶სეყირის მთის მკვიდრნი, ფილისტიმელნი და შექემის ბრიყვი მცხოვრებნი.

²⁷მოძღვრება ცოდნისა და გონიერებისა გადმოსცა ამ წიგნში იესო იერუსალიმელმა, შვილიშვილმა ელეაზარისა და ძემ ზირაქისა, ვინც წვიმასავით გვაწვიმა თავისი გულის სიბრძნე.

²⁸ნეტავი იმას, ვინც თავს გაიწაფავს მასში და ვინც გულში ჩაიდებს, განიბრძნობა.

²⁹ხოლო ვინც აღასრულებს, ყოვლისმძლე გახდება, რადგანაც უფლის ნათელი არის მისი გზა.