Read ქართული ბიბლია, სრული ვერსია Sirach (Ecclesiasticus) 7 Bible Online

Sirach (Ecclesiasticus) 7 - ქართული ბიბლია, სრული ვერსია bible

Sirach (Ecclesiasticus) 7

¹ნუ იქმ ბოროტს და არც შენ გეწევა ბოროტი.

²ერიდე უსამართლოს და ისიც გაგერიდება.

³შვილო, ნუ თესავ უსამართლობის კვლებს და არ მოიმკი შვიდმაგად მის ნაყოფს.

⁴ნუ სთხოვ უფალს ხელმწიფებას და ნურც მეფეს — საპატიო ადგილს.

⁵თავს ნუ იმართლებ უფლის წინაშე და ნურც მეფის წინაშე ბრძენობ.

⁶ნუ მიელტვი მსაჯულობას, რათა უმწეო არ აღმოჩნდე უსამართლობის წინაშე, არ შეუდრკე ძალმოსილს და არ დაიჩრდილოს შენი სიწრფელე.

⁷ნუ სცოდავ მოქალაქეთა მიმართ და ბრბოს წინაშე თავს ნუ დაიმცირებ.

⁸ორჯერ ნუ სცოდავ, რადგან ერთხელაც ვერ წაუხვალ სასჯელს.

⁹ნუ იტყვი: მოხედავს ჩემი ძღვენის სიმრავლეს და როცა მაღალ ღმერთს მივართმევ, შეიწირავს.

¹⁰ნუ სულმოკლეობ ლოცვისას და მოწყალების გაცემას ნუ უგულუბელყოფ.

¹¹ნუ დასცინი სულგამწარებულ კაცს, რადგან არსებობს დამამცრობელიც და ზეამზიდველიც.

¹²ნუ თესავ ტყუილს შენს ძმაზე და ნურც მეგობარს ექცევი ასე.

¹³ნუ შეთხზავ ნურავითარ სიცრუეს, რადგან სიკეთეს არ მოგიტანს მისი სიხშირე.

¹⁴მხცოვანთა საკრებულოში ნუ მრავალსიტყვაობ და ნურც სიტყვას გაიმეორებ ვედრების დროს.

¹⁵ნუ ითაკილებ მძიმე შრომას და ნურც მიწისმუშაკობას, უზენაესის მიერ დაწესებულს.

¹⁶ნუ შეერთვი ცოდვილთ სიმრავლეს. გახსოვდეს, რისხვა არ დაახანებს.

¹⁷მკაცრად დაიურვე სული შენი, რადგანაც ცეცხლი და მატლია მკრეხელთა სასჯელი.

¹⁸ნუ გაცვლი მეგობარს ფულზე, ნურც ღვიძლ ძმას — სუფირის ოქროზე.

¹⁹ნუ მიატოვებ ჭკვიან და კეთილ ცოლს, რადგანაც მისი მადლი ოქროზედაც უმეტესია.

²⁰ბოროტს ნუ უყოფ ალალად მშრომელ მსახურს, ნურც შენთვის თავდადებულ მოჯამაგირეს.

²¹გონიერი მსახური შეიყვაროს შენმა სულმა, და ნუ აღუკვეთ მას თავისუფლებას.

²²საქონელი გყავს? მიხედე, და თუ გჭირდება, დაიტოვე.

²³ვაჟები გყავს? ასწავლე და სიყრმიდანვე მოახრევინე ქედი.

²⁴ქალები გყავს? იზრუნე მათ ტანმრთელობაზე და ნუ უჩვენებ მხიარულ პირს.

²⁵ქალი გაათხოვე და დიდ საქმეს აღასრულებ; გონიერ კაცს მიეცი იგი.

²⁶სასურველი ცოლი გყავს? ნუ გაუშვებ და საძულველს ნუ მიენდობი.

²⁷მთელი გულით განადიდე მამაშენი და ნუ დაივიწყებ დედაშენის ტკივილებს.

²⁸გახსოვდეს, რომ მათი ნაშიერი ხარ. რას მიუზღავ მათ ამის სანაცვლოდ?

²⁹მთელი სულით გწამდეს უფალი და პატივი მიაგე მის მღვდლებს.

³⁰მთელი ძალით გიყვარდეს შენი შემოქმედი და ნუ მიატოვებ მის მსახურთ.

³¹გეშინოდეს უფლისა და პატივი მიაგე მღვდელს, მიეცი მას წილი, როგორც გებრძანა: ნათავარი, ცოდვის გამოსასყიდი, ბეჭთა ძღვენი და წმიდათა ნათავარი.

³²გლახაკს გაუწოდე ხელი, რათა სრულიქნას შენი კურთხევა.

³³მადლი მიაგე ყოველ ცოცხალს, მაგრამ მკვდარსაც ნუ მოაკლებ მადლს.

³⁴ნუ მოაკლდები მოზარეთ და მგლოვიარეებთან ერთად იგლოვე.

³⁵ნუ დაიზარებ სნეულის მონახულებას და ამის გამო შეგიყვარებენ.

³⁶ყველა საქმეში გახსოვდეს შენი აღსასრული და აღარასოდეს სცოდავ.