Read ქართული ბიბლია, სრული ვერსია Sirach (Ecclesiasticus) 8 Bible Online

Sirach (Ecclesiasticus) 8 - ქართული ბიბლია, სრული ვერსია bible

Sirach (Ecclesiasticus) 8

¹ნუ შეებრძოლები ძლიერ კაცს, იქნებ ოდესმე მის ხელში ჩავარდე.

²ნუ შეედავები მდიდარ კაცს, ვაითუ გძლიოს, რადგანაც ბევრი დაუღუპავს ოქროს და მეფეთა გული გადაუხრია.

³ნუ შეეჭიდები მოლაყბეს, მის ცეცხლს შეშას ნუ შეუკეთებ.

⁴ნუ ეხუმრები უმეცარს, რათა შენი წინაპრები არ შეურაცხყო.

⁵ნუ ჰყვედრი ცოდვისაგან მოქცეულ კაცს, გახსოვდეს, ყველას წყევლის სიმძიმე გვაწევს.

⁶ნუ შეურაცხყოფ ბებერ კაცს, ვინაიდან ჩვენც დავბერდებით.

⁷ნუ გიხარის კაცის სიკვდილი, გახსოვდეს, ყველანი მოვკვდებით.

⁸ნუ უგულებელყოფ ბრძენთა მონათხრობს და მათ იგავებს მიუგდე ყური, რათა მათი წყალობით შეიძინო ცოდნა და დიდებულთა სამსახური ისწავლო.

⁹ყურად იღე მხცოვანთა ნაამბობი, რადგან მათაც თავიანთ მამა-პაპათაგან უსწავლიათ; მათგან შეიძენ განსჯის უნარს და იმასაც, თუ ვის როდის რა მიუგო.

¹⁰ნუ გააღვივებ ცოდვილის ნაკვერჩხლებს, ვაითუ მისმა ცეცხლმა დაგდაგოს.

¹¹ნუ აღიძვრი თავხედის წინააღმდეგ, ვაითუ შენს სიტყვას ჩაუსაფრდეს.

¹²ფულს ნუ ასესხებ შენზე ძლიერ კაცს; თუ ასესხებ, დაკარგულად ჩათვალე.

¹³თავს ნუ იდებ, რაც შენს ძალას აღემატება; თუ თავს იდებ, მოიქეცი როგორც მოვალე.

¹⁴ნუ უჩივლებ მსაჯულს, რომელსაც მისი პატივისამებრ განსჯიან.

¹⁵ნუ დაემგზავრები თავგასულს, რადგანაც ისე მოიქცევა, როგორც ნებავს, და შეიძლება მისმა სიშლეგემ დაგღუპოს.

¹⁶ნუ შეედავები გულფიცხს და მასთან ერთად ნუ გადაივლი უდაბნოს, რადგანაც სისხლი არაფრად უჩანს და სადაც არავინ შეგეწევა, იქ დაგამხობს.

¹⁷რჩევას ნუ ჰკითხავ ბრიყვს, რადგან სიტყვას ვერ შეგინახავს.

¹⁸უცხოს წინაშე დასამალს ნუ ჩაიდენ რასმე, რადგან არ იცი, როგორ მოიქცევა.

¹⁹გულს ნუ გადაუშლი ყველას, რადგანაც არ დაგიმადლებს.