Read ქართული ბიბლია, სრული ვერსია Isaiah 16 Bible Online

Isaiah 16 - ქართული ბიბლია, სრული ვერსია bible

Isaiah 16

¹კრავები გაუგზავნეთ საჩუქრად ქვეყნიერების მბრძანებელს სელაყიდან უდაბნოს გზით სიონის ასულის მთაზე.

²ბუდემოშლილი ფრინველებივით იქნებიან მოაბის ასულნი არნონის ფონებთან.

³„მიეცი რჩევა, ქმენი სამართალი, გადმოაფარე შენი ჩრდილი შუადღის ხვატში, როგორც ღამით; დაიფარე ლტოლვილი, ნუ გასცემ დევნილს.

⁴შეიხიზნე მოაბის ლტოლვილნი; შეიფარე ყაჩაღებისაგან!“ ვიდრე არ შემწყდარა მძლავრობა, ვიდრე ბოლო არ მოღებია ყაჩარობას, ვიდრე არ გადაშენებულა დამთრგუნველი ამ ქვეყნიდან;

⁵და წყალობით არ დამყარებულა ტახტი, და მასზე, დავითის კარავში, სამარადისოდ არ დამჯდარა მსაჯული — რათა ქმნას სამართალი და ესწრაფოდეს მართალ განკითხვას.

⁶ვისმინეთ ჩვენ მოაბის მზვაობრობა, მეტისმეტი ზვიადობა, მისი ამპარტავნება, მისი მძვინვარება, ამაო ტრაბახი.

⁷ამიტომ მოუწია მოაბელს მოაბელის დატირება, — ქვითინებს მთელი მოაბი; უბედურნო, როგორ მოსთქვამთ კირ-ხარესეთის ტკბილეულზე!

⁸ხეშბონის ვენახები წახდა, წახდა სიბმას ვაზი! ოდესღაც ხომ ამ ვაზის ღვინით თვრებოდნენ ქვეყნის მეუფენი, იაყზერს რომ სწვდებოდა და იმას იქითაც — უდაბნოს აღწევდა. ზღვამდე იფურჩქნებოდა მისი რქები.

⁹იაყზერთან ერთად ვიგლოვებ მე სიბმას ვაზებზე. ჩემი ცრემლებით მოვრწყავ ხეშბონსა და ელყალეს! რადგან შენს რთველსა და ალოობაში აღარ გაისმის მხიარული ყიჟინა.

¹⁰შეწყდა მხიარულება და სიხარული ნაყოფიერ მიწაზე; ვენახებში აღარ მღერიან და აღარ ისმის მხიარული შემოძახილი; საწნახელში ღვინოს აღარ დაწურავს მეზვრე, რადგან მე შევაწყვეტინე მხიარული ხმები.

¹¹ამიტომაც ქნარივით კვნესის ჩემი გული მოაბზე და ჩემი სული — კირ-ხერესზე.

¹²გამოჩნდებიან მოაბელნი თავის საწმიდარში, ძალას არ დაიშურებენ; მივლენ თავის ტაძარში სალოცავად, მაგრამ აღარაფერი ეშველებათ.

¹³ეს არის სიტყვა, რომელიც რახანია წარმოთქვა უფალმა მოაბზე.

¹⁴ახლა კი ასე ამბობს უფალი: „სამი წლის შემდეგ, ქირავნობის წლების მიხედვით, შერცხვება მოაბის დიდება, მიუხედავად მათი დიდი სიმრავლისა; გადარჩება მხოლოდ მცირე ნატამალი — უმნიშვნელო და უძლური.“