Read ქართული ბიბლია, სრული ვერსია Isaiah 22 Bible Online

Isaiah 22 - ქართული ბიბლია, სრული ვერსია bible

Isaiah 22

¹წინასწარმეტყველება ხილვათა ხეობაზე. რა დაემართათ შენს მცხოვრებთ, რომ მთლიანად ერდოებზე გამოშლილან?

²ხმაურით სავსე, მშფოთვარე ქალაქო, მოზეიმე ქალაქო! შენი დამარცხებულნი მახვილით არ დაცემულან და არც ბრძოლაში დაღუპულან.

³ყველა შენი მხედართმთავარი ერთად გაიქცა, მშვილდები დაყარეს, ტყვედ ჩაცვივდნენ; ყველა, ვინც გადარჩა, ერთად არიან დატყვევებულნი, თუმცა შორს გარბოდნენ ისინი.

⁴ამიტომ ვთქვი მე: პირი შემაქციეთ, მწარედ უნდა ვიტირო. ნუ შეეცდებით ჩემს ნუგეშისცემას, ჩემი ერის ასულის შემუსვრის გამო.

⁵რადგან აურზაურის, მარცხის და დაბნეულობის დღეა ცაბაოთ უფალისაგან ხილვათა ველზე! კედელს ანგრევენ და ყვირილი მთის მწვერვალამდე აღწევს.

⁶ყელამის მებრძოლებმა კაპარჭები მოიმარჯვეს, საომარი ეტლები და მხედრები გაემზადნენ ბრძოლისათვის, კირელმა[8] მებრძოლებმა ფარები ასწიეს.

⁷შენი ულამაზესი ველები სავსეა ეტლებით, მხედრები კარიბჭის პირდაპირ დაეწყვნენ.

⁸ახდილია იუდას საფარველი! იმ დღეს თქვენ შეხედეთ მაღნარის სასახლის საჭურველს.

⁹თქვენ იხილეთ, რომ მრავალი ნაპრალია დავითის ქალაქის კედლებში, და აგროვებდით წყალს ქვემო ტბორში;

¹⁰და ათვალიერებდით იერუსალიმის სახლებს და ანგრევდით ზოგიერთს გალავნის გასამაგრებლად.

¹¹და მოაწყვეთ წყლის საცავი ორ კედელს შუა ძველი საგუბრის წყლისთვის. მაგრამ არად აგდებთ მის შემქმნელს, ძველთაგან მის დამსახველს.

¹²მოუხმობს ცაბაოთ უფალი იმ დღეს სატირლად და საგლოვად, თმის გადასაპარსად და წელზე ჯვალოს შემოსასარტყლად.

¹³მაგრამ თქვენ ილხენთ და მხიარულობთ, კლავთ ზვარაკებსა და ყელს ჭრით ცხვრებს, ჭამთ ხორცსა და სვამთ ღვინოს. ამბობთ: ვჭამოთ და ვსვათ, რადგან ხვალ დავიხოცებითო.

¹⁴და ყურში გამიმხილა ცაბაოთ უფალმა: „არ მიგეტევებათ თქვენ ეს ურჯულოება სიკვდილამდე!“ თქვა მეუფემ, ცაბაოთ უფალმა.

¹⁵ასე თქვა მეუფემ, ცაბაოთ უფალმა: წადი და უთხარი ამ სამეფოს ეზოსმოძღვარს — შებნას:

¹⁶რა გაქვს აქ და ვინა გყავს აქ, რომ ამოგიკვეთავს შენთვის სამარხი? — ის კვეთს თავის სამარხს მაღლობზე, კლდეში ჭრის თავის სავანეს.

¹⁷აჰა, უფალი მოგისვრის შენ, როგორც მოისვრის ძლიერი კაცი და დაგჭმუჭნის,

¹⁸დაგგორგლავს და მოგისვრის ვრცელ ქვეყანაში. იქ იქნება შენი და შენი ბრწყინვალე ეტლების ბოლო, შემარცხვენელო შენი ბატონის სახლისა!

¹⁹გადაგისვრი შენი ადგილიდან და შენი მდგომარეობიდან დაგამხობ.

²⁰და იქნება იმ დღეს: მოვიხმობ ჩემს მონას ელიაკიმს, ხილკიას ძეს,

²¹და შევმოსავ შენი სამოსით, და შენს ქამარს შემოვარტყამ წელზე, და შენს ხელმწიფებას გადავცემ მას; და იქნება ის იერუსალიმის მცხოვრებთა და იუდას მოდგმის მამა.

²²გადავკიდებ მხარზე დავითის სახლის გასაღებს, დაკეტავს და ვერავინ გააღებს, გააღებს და ვერავინ დაკეტავს.

²³პალოსავით ჩავარჭობ მას მყარ ადგილზე, და იქნება ის თავისი მამისსახლისათვის დიდების ტახტი.

²⁴და ჩამოჰკიდებენ მას მამამისის სახლის მთელ დიდებას — მოდგმას და ნაშიერს, სახლის მთელ ჭურჭელს — თასიდან დაწყებული უკანასკნელ ჭინჭილამდე.

²⁵იმ დღეს, — ამბობს ცაბაოთ უფალი, — მოირყევა მყარ ადგილზე ჩარჭობილი პალო, გადატყდება და დაეცემა, და მოწყდება ტვირთი, რომელიც მას აწვა, რადგან უფალმა თქვა ეს.