Read ქართული ბიბლია, სრული ვერსია Isaiah 46 Bible Online

Isaiah 46 - ქართული ბიბლია, სრული ვერსია bible

Isaiah 46

¹ჩაიღუნა ბელი,[21] მოიხარა ნებო;[22] მათი კერპები პირუტყვსა და სასაპანლე ცხოველებს აჰკიდეს; მძიმედ დააწვა თქვენი ტვირთი დაღლილ პირუტყვს.

²წელში გაწყდნენ, დაცვივდნენ; ვერ შეძლეს ტვირთის გადარჩენა, და თვითონაც ტყვეობაში წავიდნენ.[23]

³მისმინეთ, იაკობის ძენო, ისრაელიანთა ნატამალო, თქვენ, რომელთაც შობიდანვე მე გატარებდით, ხელში აყვანილს გატარებდით თქვენი დაბადების დღიდან:

⁴თქვენს სიბერემდე მე იგივე ვიქნები, გაჭაღარავდებით და მე კვლავ გატარებთ; მე შეგქმენით დ მე გატარებთ, მე დაგიფარავთ და გადაგარჩენთ.

⁵ვის მიმამსგავსებთ და შემადარებთ, ვის გამიტოლებთ, რომ მივემსგავსო?

⁶ოქროს და ვერცხლს წამოყრიან ქისიდან და სასწორზე წონიან; ქირაობენ ხელოსანს, რომ ღმერთი ჩამოუსხას მისგან, შემდეგ ქედს უხრიან და თაყვანს სცემენ მას.

⁷გაიდებენ მხარზე, ატარებენ, და მის ადგილზევე დადგამენ. დგას და არ იძვრის ადგილიდან, უყვირიან და პასუხს არ აძლევს ის მათ, ვერ იხსნის მათ გასაჭირში.

⁸გაიხსენეთ ეს და გულთან მიიტანეთ, ცოდვილნო.

⁹გაიხსენეთ, რა იყო თავდაპირველად, დასაბამიდან, რადგან მე ვარ ღმერთი და არ არის სხვა ღმერთი, და არ არის ჩემი მსგავსი.

¹⁰დასაბამიდანვე ვიუწყები, რაც ბოლოს უნდა მოხდეს, და ძველთაგანვე — რაც ჯერ არ მომხდარა, ვამბობ: ჩემი განაზრახი აღსრულდება, და ყოველ ჩემს ნება-სურვილს აღვასრულებ.

¹¹მზის აღმოსავლეთიდან მოვუხმე მტაცებელ ფრინველს — შორეული ქვეყნიდან მოვუხმე მას, ჩემი განზრახვის აღმსრულებელს;[24] მე ვთქვი და მოვაწევ კიდეც ამას, მე დავსახე და აღვასრულებ კიდეც!

¹²მისმინეთ მე, გულქვანო, სიმართლეს განშორებულნო:

¹³მე მოვაახლოვე ჩემი სიმართლე, შორს არ არის ის და ჩემი ხსნა არ დაახანებს. და მივაგებ სიონს ხსნას და ისრაელს — ჩემს დიდებას.