Read ქართული ბიბლია, სრული ვერსია Jeremiah 37 Bible Online

Jeremiah 37 - ქართული ბიბლია, სრული ვერსია bible

Jeremiah 37

¹იეჰოიაკიმის ძის ქონიას ნაცვლად გამეფდა ცედეკია იოშიას ძე, რომელიც ბაბილონის მეფე ნაბუქოდონოსორმა, დასვა იუდას ქვეყანაში.

²და არ ისმინეს არც მან და არც მისმა მსახურებმა და არც ქვეყნის მოსახლეობამ უფლის სიტყვები, რომელთაც იერემია წინასწარმეტყველის პირით აცხადებდა.

³და გაგზავნა მეფე ცედეკიამ იეჰუქალ შელემიას ძე და ცეფანია მაყასეია მღვდლის ძე იერემია წინასწარმეტყველთან, რომ ეთქვათ: შეევედრეო ჩვენთვის უფალს, ჩვენს ღმერთს.

⁴იერემია კი მაშინ ჯერ არ იყო დაპატიმრებული და ხალხში თავისუფლად დადიოდა.

⁵ამასობაში გამოვიდა ფარაონის ლაშქარი ეგვიპტიდან; და ქალდეველებმა, იერუსალიმს რომ ადგნენ გარს, შეიტყვეს ეს ამბავი და უკუიქცნენ იერუსალიმიდან.

⁶და იყო უფლის სიტყვა იერემია წინასწარმეტყველის მიმართ:

⁷ასე ამბობს უფალი, ისრაელის ღმერთი: უთხარით იუდას მეფეს, რომელიც თქვენ გაგზავნით ჩემთან შესაკითხად: აჰა, ფარაონის ლაშქარი, რომელიც თქვენს დასახმარებლად გამოვიდა, უკანვე დაბრუნდება ეგვიპტეში, თავის ქვეყანაში.

⁸და კვლავ მობრუნდებიან ქალდეველნი, ალყაში მოიქცევენ ამ ქალაქს, დაიპყრობენ მას და ცეცხლით დაბუგავენ.

⁹ასე ამბობს უფალი: თავს ნუ მოიტყუებთ და ნუ იფიქრებთ, რომ წავლენ აქედან ქალდეველნი, რადგან არ დაგეხსნებიან.

¹⁰რადგან, კიდევაც რომ დაამარცხოთ ქალდეველთა ლაშქარი, რომელიც თქვენ გებრძვით, და დარჩნენ მახვილით დაკოდილი მათი მებრძოლები, ისინი წამოდგებიან თითოეული თავისი კარვიდან და ცეცხლით დაბუგავენ ამ ქალაქს.

¹¹და როდესაც ქალდეველთა ლაშქარი უკუიქცა იერუსალიმიდან ფარაონის ლაშქრის შიშით,

¹²გამოვიდა იერემია იერუსალიმიდან ბენიამინის ქვეყანაში წასასვლელად, რათა იქ დაედო წილი თავის ხალხში.

¹³ბენიამინის კარიბჭესთან რომ მივიდა, იქ დახვდა საყარაულოს უფროსი, სახელად ირია, ძე შელემიასი, ძე ხანანიასი, და მან შეიპყრო იერემია წინასწარმეტყველი და უთხრა: ქალდეველებთან აპირებ გაქცევას?

¹⁴და უპასუხა იერემიამ: ტყუილია, მე არ გადავდივარ ქალდეველებთან. მაგრამ ირიამ არ უსმინა მას, დააპატიმრა იერემია და მთავართან მიიყვანა.

¹⁵და განრისხდნენ მთავრები იერემიაზე და სცემეს და საპატიმროში დაამწყვდიეს, იონათან მწიგნობრის სახლში, რადგან საპყრობილედ აქციეს ის.

¹⁶და როცა იერემია შევიდა დილეგის მღვიმეში და იჯდა იქ მრავალი დღე, —

¹⁷კაცი გაგზავნა მეფე ცედეკიამ მასთან და მოაყვანინა; და თავის სახლში მეფე ფარულად შეეკითხა მას: არის რაიმე სიტყვა უფლისაგან? და უპასუხა იერემიამ: არის! და უთხრა: ბაბილონის მეფეს ჩაუვარდებიო ხელთ.

¹⁸უთხრა იერემიამ მეფე ცედეკიას: რა შევცოდე მე შენს წინაშე და შენს მსახურთა წინაშე და ამ ხალხის წინაშე, რომ საპყრობილეში ჩამაგდეთ?

¹⁹სად არიან თქვენი წინასწარმეტყველნი, რომლებიც ასე გიწინასწარმეტყველებდნენ: არ წამოვაო ბაბილონის მეფე თქვენს წინააღმდეგ და ამ ქვეყნის წინააღმდეგო?

²⁰ახლა კი, მისმინე, მეფე ბატონო, და შეიწყნარე ჩემი ვედრება, და ნუ დამაბრუნებ იონათან მწიგნობრის სახლში, რათა არ მოვკვდე იქ.

²¹და ბრძანა მეფე ცედეკიამ და გადასცეს იერემია ზედამხედველებს ყარაულთა ეზოში და აძლევდნენ მას ხაბაზთა რიგიდან დღეში ერთ პურის კვერს, ვიდრე ქალაქში პური მთლად არ გამოილია. და ასე იჯდა იერემია ყარაულთა ეზოში.