Read ქართული ბიბლია, სრული ვერსია Baruch 1 Bible Online

Baruch 1 - ქართული ბიბლია, სრული ვერსია bible

Baruch 1

¹ესაა სიტყვები წიგნისა, რომელიც ბარუქმა, ნერიას ძემ, მახსეიას, სედეკიას, ხასადიას, ხილკიას შთამომავალმა დაწერა ბაბილონში,

²მეხუთე წელს, თვის მეშვიდე დღეს, იმ დროიდან, როცა ქალდეველებმა იერუსალიმი აიღეს და ცეცხლს მისცეს იგი.

³წაიკითხა ბარუქმა ამ წიგნის სიტყვები იუდას მეფის — იექონიას — იოაკიმის ძისა და მთელი იმ ხალხის წინაშე, ვინც მის მოსასმენად მოვიდა.

⁴დიდებულების, უფლისწულების, უხუცესების და მთელი ხალხის, პატარებიდან დაწყებული და დიდებით დამთავრებული, მოკლედ, ყველას თანდასწრებით, ვინც კი ცხოვრობდა ბაბილონში, მდინარე სუდის პირას.

⁵ისინი კი ტიროდნენ, მარხულობდნენ და ლოცულობდნენ უფლის წინაშე.

⁶შეკრიბეს ვერცხლი, ვისაც რამდენი შეეძლო,

⁷და გაუგზავნეს იერუსალიმში იოაკიმს, ხილკიას ძეს და შალუმის ბადიშს — მღვდელმთავარს, მღვდლებს და მთელ ხალხს, ვინც მასთან ერთად იმყოფებოდა იერუსალიმში,

⁸როცა ბარუქმა მიიღო უფლის სახლიდან წამოღებული ჭურჭელი იუდას ქვეყანაში დასაბრუნებლად, სივანის თვის მეათე დღეს, — ეს იყო ვერცხლის ჭურჭელი, რომელიც გააკეთებინა იუდას მეფე სედეკიამ, იოშიას ძემ, —

⁹მას შემდეგ, რაც ბაბილონის მეფემ — ნაბუქოდონოსორმა იერუსალიმიდან ბაბილონში გადაასახლა იექონია, ისევე, როგორც მთავრები და ტყვეები, დიდებულები და იუდას ერი.

¹⁰და შეუთვალეს: აჰა, გიგზავნით ვერცხლს და ამ თანხით იყიდეთ საკლავი სრულადდასაწველისა და ცოდვის მსხვერპლისათვის, შეიძინეთ საკმეველი, გაამზადეთ ძღვენი და მიიტანეთ ჩვენი უფალი ღმერთის სამსხვერპლოზე.

¹¹ილოცეთ ბაბილონის მეფის — ნაბუქოდონოსორის სიცოცხლისათვის და მისი ძის — ბელშაცარის სიცოცხლისათვის, რათა იყოს მათი დღენი, როგორც დღენი ცისა დედამიწაზე.

¹²და უფალი მოგვცემს ძალას, გაგვინათლებს თვალებს და ვიცხოვრებთ ნაბუქოდონოსორის, ბაბილონის მეფისა, და ბელშაცარის, მისი ძის, ჩრდილქვეშ; დიდხანს ვეყმობით მათ და ვპოვებთ მადლს მათ წინაშე.

¹³ილოცეთ ჩვენთვისაც ჩვენი უფალი ღმერთის წინაშე, რადგანაც შევცოდეთ მას და დღევანდელ დღემდე გადმოდის მისი რისხვა და მძვინვარება ჩვენზე.

¹⁴წაიკითხეთ ეს წიგნი, რომელსაც გიგზავნით უფლის სახლში გამოსაცხადებლად დღესასწაულისა და საამისოდ განკუთვნილ დღეებში.

¹⁵და თქვით: სიმართლე ჩვენი უფლისა და ღმერთის ხელთაა, ჩვენ კი პირშერცხვენილნი ვართ, როგორც დღეს იუდასა და იერუსალიმის მკვიდრნი,

¹⁶ჩვენი მეფეები და ჩვენი მთავრები, ჩვენი მღვდლები, ჩვენი წინასწარმეტყველნი და ჩვენი მამები,

¹⁷რადგანაც ვცოდეთ უფლის წინაშე

¹⁸და არ დავემორჩილეთ მას, არ შევისმინეთ ჩვენი უფალი ღმერთის ხმა, რათა მივყოლოდით მის მიერ ბოძებულ მცნებებს.

¹⁹მას შემდეგ, რაც უფალმა ჩვენი მამა-პაპანი გამოიყვანა ეგვიპტის ქვეყნიდან, დღევანდელ დღემდე ვეურჩებოდით ჩვენს ღმერთს და უფალს, და ნაკლებად გვადარდებდა ის ამბავი, რომ ყურს არ ვუგდებდით მის ხმას.

²⁰ამიტომაცაა, რომ, დღევანდელი დღისა არ იყოს, გამუდმებით თანა გვდევს უბედურება და შეჩვენება, რაც აუწყა უფალმა მოსეს, მის მონამორჩილს, იმ დღეს, როცა ჩვენი მამა-პაპანი გამოიყვანა ეგვიპტის ქვეყნიდან, რათა მოეცა ჩვენთვის ქვეყანა, სადაც რძე და თაფლი მოედინება.

²¹არ შევისმინეთ ჩვენი უფალი ღმერთის ხმა იმ წინასწარმეტყველთა სიტყვებში, რომელნიც მან მოგვივლინა,

²²არამედ ყველანი ვიქცეოდით ჩვენი უკეთური გულის კარნახით, ვემსახურებოდით უცხო ღმერთებს და ბოროტებას ჩავდიოდით ჩვენი უფალი ღმერთის თვალთა წინაშე.