Read ქართული ბიბლია, სრული ვერსია Baruch 3 Bible Online

Baruch 3 - ქართული ბიბლია, სრული ვერსია bible

Baruch 3

¹უფალო, ყოვლისმპყრობელო, ისრაელის ღმერთო, სული ურვილი და სული შეჭირვებული შემოგღაღადებს შენ.

²შეისმინე, უფალო, და შეგვიწყალე, რადგანაც ვცოდეთ შენს წინაშე.

³ვინაიდან შენ საუკუნოდ დამკვიდრებული ხარ, ხოლო ჩვენ — სამუდამოდ დაკარგულნი.

⁴უფალო ყოვლისმპყრობელო, ისრაელის ღმერთო, შეისმინე ისრაელის მიცვალებულთა და მათი შვილების ვედრება, რომელთაც სცოდეს შენს წინაშე, არ შეისმინეს ხმა უფლისა, მათი ღმერთისა, და განუყრელი გახდა ჩვენგან უბედურება.

⁵ნუ გაიხსენებ ჩვენი მამა-პაპის უსამართლობას, არამედ, გახსოვდეს შენი ხელი და შენი სახელი ამჟამად,

⁶რადგანაც შენა ხარ უფალი ღმერთი ჩვენი, და გადიდებთ შენ, უფალო.

⁷მიტომაც ჩაგვინერგე შენი შიში გულებში, რომ ვუხმობდეთ შენს სახელს; შენი მაქებარნი ვიქნებით გადასახლებაში, რადგანაც განვდევნეთ ჩვენი გულებიდან ყოველგვარი უსამართლობა ჩვენი წინაპრებისა, რომელთაც სცოდეს შენს წინაშე.

⁸აი, დღეს გადასახლებაში ვართ, სადაც მიმოგვფანტე ჩვენს საგინებლად, შესაჩვენებლად და ნაცვლისგებად ყველა იმ უსამართლობის გამო, რაც ჩაიდინეს ჩვენმა წინაპრებმა, რომლებიც განუდგნენ უფალს, ჩვენს ღმერთს.

⁹ისმინე, ისრაელ, მცნებანი სიცოცხლისა და ყურად იღე, რათა შეიცნო სიბრძნე.

¹⁰რა ხდება, ისრაელ? რა გინდა მტრის ქვეყანაში? რამ დაგაბერა უცხო მიწაზე?

¹¹რად შეიბილწე მკვდრებთან ერთად და შეირაცხე ქვესკნელის მკვიდრთა შორის?

¹²იმიტომ რომ დაუტევე წყარო სიბრძნისა.

¹³ღვთის გზით რომ გევლო, მშვიდობით იცხოვრებდი სამარადისოდ.

¹⁴ისწავლე, სად არის სიბრძნე, სად არის ძალა, სად არის ცოდნა, რათა ამასთანავე შეიცნო, სადაა დღეგრძელობა და სიცოცხლე, სადაა თვალთა ნათელი და მშვიდობა.

¹⁵ვინ იპოვა სიბრძნის ადგილი და ვინ შევიდა მის საგანძურში?

¹⁶სად არიან ხალხთა მთავარნი და დედამიწის მხეცთა მეუფენი?

¹⁷ისინი, ცის ფრინველებით რომ იქცევდნენ თავს, ანდა ოქრო-ვერცხლის მხვეჭელნი, რომელთა იმედიც აქვს ხალხს და რომელთა ხვეჭასაც არ უჩანს ბოლო?

¹⁸სად არიან ვერცხლის მჭედელნი, რომელთაც სხვა საზრუნავი არა ჰქონდათ, და რომელთა ნახელავსაც ვეღარსად ჰპოვებთ?

¹⁹გაქრნენ, ჯოჯოხეთს ჩავიდნენ და სხვები მოგვევლინნენ მათ ნაცვლად.

²⁰ახალგაზრდებმა იხილეს ნათელი და დამკვიდრდნენ დედამიწაზე, მაგრამ ცოდნის გზა კი ვერ შეიცნეს.

²¹ვერც მის ბილიკებს მიაგნეს და ვერც მისი წვდომა შეძლეს; მათი შვილებიც შორს დარჩნენ ცოდნის გზიდან.

²²არც ქანაანში სმენიათ მისი სახელი და არც თემანში უხილავთ.

²³ვერც აგარის შვილებმა, მიწაზე რომ ეძებდნენ ცოდნას, ვერც მერანელმა და თემანელმა ვაჭრებმა, ვერც არაკთა მთხრობელებმა და ცოდნის მძებნელებმა ვერ მიაკვლიეს სიბრძნის გზას და ვერ შენიშნეს მისი ბილიკნი.

²⁴ო, ისრაელ, რა დიდია უფლის სახლი და რაოდენ ვრცელია მისი სამკვიდრო.

²⁵დიდია და უსასრულო, მაღალი და განუზომელი.

²⁶იქ იშვნენ ბუმბერაზები, დასაბამითვე ხელოვანნი, ტანად ბრგენი და ომებში გამობრძმედილნი,

²⁷მაგრამ არც ისინი გამოურჩევია ღმერთს და არც ცოდნის გზა უსწავლებია მათთვის.

²⁸ამიტომაც დაიღუპნენ, რადგანაც არ ჰქონდათ სიბრძნე, დაიღუპნენ თავიანთი უგუნურობით.

²⁹ვინ ავიდა ზეცად, ვინ დაეუფლა სიბრძნეს და ჩამოიტანა ღრუბლებიდან?

³⁰ვინ გავიდა ზღვის გაღმა, ვინ მიაკვლია მას და წამოიღო, წმიდა ოქროზე უმჯობესი?

³¹არავინაა მისი გზის მცოდნე და არც მისი ბილიკის გულისხმისმყოფელი.

³²მაგრამ ყოვლის მცოდნემ იცის იგი; თავისი გონებით მიაკვლია მან, ვინც საუკუნოდ განამზადა ქვეყნიერება და აავსო იგი ოთხფეხა ცხოველთა სიმრავლით;

³³ვინც ნათელს გვიგზავნის და მოდის ნათელი; უხმო მას და ისიც დაემორჩილა თრთოლვით.

³⁴გაბრწყინდნენ ვარსკვლავები თავიანთ სახმილავებში და აღივსნენ ლხენით.

³⁵უხმო მათ და მიუგეს — აქ ვართო, და სიხარულით აციმციმდნენ თავიანთი შემოქმედისთვის.

³⁶ესაა ღმერთი ჩვენი და არავინაა მისი სადარი.

³⁷მან მიაკვლია სიბრძნის ყველა გზას და ასწავლა იგი თავის მონას — იაკობს და თავის საყვარელს — ისრაელს.

³⁸შემდგომ ამისა დედამიწაზე გამოჩნდა და ტრიალებდა კაცთა შორის.