Read ქართული ბიბლია, სრული ვერსია Baruch 4 Bible Online

Baruch 4 - ქართული ბიბლია, სრული ვერსია bible

Baruch 4

¹ესაა უფლის ბრძანებათა წიგნი და სჯული, რომელიც საუკუნოდ იქნება.

²მოიქეც, იაკობ, აიღე იგი და იარე ბრწყინვალებისაკენ მისი ნათლისა.

³ნუ მისცემ სხვას დიდებას შენსას და ნურც შენს სარგებელს — უცხო ხალხს.

⁴ნეტარი ვართ, ისრაელ, რადგანაც ვიცით, რა არის კეთილსასურველი ღვთისათვის.

⁵მხნედ იყავ, ჩემო ერო, ხსოვნავ ისრაელისა!

⁶დასაღუპად კი არ მიეყიდეთ ხალხებს, არამედ იმიტომ, რომ განარისხეთ ღმერთი;

⁷გააალმასეთ თქვენი შემოქმედი, რადგანც ეშმაკებს სწირავდით მსხვერპლს და არა ღმერთს;

⁸დაივიწყეთ თქვენი მასაზრდოებელი უკვდავი ღმერთი და დაამწუხრეთ თქვენი აღმზრდელი იერუსალიმიც.

⁹რადგანაც იხილა თქვენზე მოწეული ღვთის რისხვა და თქვა: ისმინეთ, სიონის მკვიდრნო, ღმერთმა მომივლინა დიდი მწუხარება;

¹⁰რადაგანც ვიხილე ძეთა და ასულთა ჩემთა ტყვეობა, რისთვისაც გასწირა ისისნი წარუვალმა.

¹¹სიხარულით ვზარდე ისინი და ტირილითა და ვაი-ვიშით კი განვუტევე.

¹²ნურავინ ხარობს იმის გამო, რომ ქვრივ-ოხერი ვარ და ყველას მიერ მიტოვებული; იმიტომ ვიქეც უდაბნოდ, რომ ჩემმა შვილებმა სცოდეს, რადგანაც აღარ მისდიეს ღვთის სჯულს;

¹³ვერ შეიცნეს მისი მართლგანაწესი, დააგდეს მისი მცნებების გზა და არც სწავლის ბილიკს გაჰყვნენ მისი სიმართლით.

¹⁴მაშ, მოდით, სიონის მკვიდრნო, გაიხსენეთ ძეთა და ასულთა ჩემთა ტყვეობა, რისთვისაც გასწირა ისინი წარუვალმა. (საუკუნომ)

¹⁵რადგანაც შორიდან მოუვლინა მათ ხალხი, ურცხვი და უცხოენოვანი, რომელსაც არც მხცოვანის რიდი აქვს და არც ყრმის სიბრალული.

¹⁶წაჰგვარეს ქვრივს საყვარელი ძენი და მარტოხელას აღარ შეარჩინეს ასულნი.

¹⁷მე კი რით შემიძლია შეგეწიოთ?

¹⁸რადგანაც მტრების ხელიდან მხოლოდ ის თუ გიხსნით, ვინც თავს დაგატეხათ ამდენი უბედურება.

¹⁹მაშ, წადით, შვილებო, წადით, რადგანაც მე უდაბნოდ ვიქეც.

²⁰განვიძარცვე მშვიდობის სამოსი და შევიმოსე ძაძა ჩემი ვედრებისა; მთელი ჩემი დღე და მოსწრება არ მოვიშლი ღაღადისს წარუვალის მიმართ.

²¹გამხნევდით, შვილებო, ღმერთს უხმეთ და ის დაგიხსნით მძლავრებისგან და მტრების ხელიდან.

²²რადგანაც წარუვალისაგან ველოდი თქვენს ხსნას და წმიდამ მომივლინა სიხარული შეწყალებისა, რომელსაც მალე თქვენც მოგივლენთ წარუვალი მხსნელი.

²³მე ტირილითა და გლოვით განგიტევეთ, ღმერთი კი სიხარულითა და შვებით დამიბრუნებს თქვენს თავს სამარადისოდ.

²⁴ვინაიდან, როგორც დღეს იხილეს სიონის მკვიდრთა თქვენი ტყვეობა, ასევე მალე იხილავენ თქვენს ხსნასაც, რაც გეღირსებათ დიადი დიდებითა და წარუვალის ბრწყინვალებით.

²⁵შვილებო, დაითმინეთ თქვენზე მოწეული ღვთის რისხვა; უწყალოდ გდევნა შენ მტერმა, მაგრამ მალე იხილავ მის დამხობას და ფეხით შესდგები ქედზე.

²⁶ჩემი ნებიერნი ნარ-ეკლიან გზას დაადგნენ; ისე წაასხეს მტრებმა, როგორც მოტაცებული ფარა.

²⁷გამხნევდით, შვილებო, და შეჰღაღადეთ ღმერთს, რადგანაც გაგიხსენებთ ის, ვინც ამ დღეში ჩაგყარათ.

²⁸როგორც განზრახული გქონდათ ღვთისგან განდგომა, ახლა ათმაგად უფრო მძაფრი იყოს თქვენი სურვილი მისკენ მიქცევისა და მისი ძებნისა.

²⁹რადგან ვინც თავზე დაგატეხათ უბედურება, საუკუნო სიხარულსაც მოგივლენთ თქვენივე ხსნის მეოხებით.

³⁰გამხნევდი, იერუსალიმ, ნუგეშს გცემს შენი სახელმდებელი.

³¹ვაი, შენს ბოროტისმყოფელთ, რომელნიც ხარობდნენ შენი დამხობით!

³²ვაი, ქალაქებს, რომელთაც ემონენ შენი შვილები! ვაი, ქვეყანას, რომელმაც მიიღო შენი ძენი;

³³ვინაიდან როგორც ხარობდა შენი დაცემით და ილხენდა შენი დამხობით, ისევე ივაგლახებს თავისი დაქცევის გამო.

³⁴წავართმევ მას ხალხმრავლობის სიხარულს და გლოვად ექცევა თავისი სიქადული.

³⁵რადგანაც დიდი ხნით გადმოვა მასზე ცეცხლი წარუვალისგან და კიდევ უფრო დიდ ხანს ეშმაკთა სამკვიდროდ იქცევა იგი.

³⁶გახედე აღმოსავლეთს, იერუსალიმ, და იხილე სიხარული, ღვთისაგან მომავალი შენსკენ.

³⁷აჰა, მოდიან შენი ძენი, შენს მიერ განტევებულნი; მოდიან აღმოსავლეთიდან დასავლეთამდე წმიდის სიტყვით შეკრებილნი და ღვთის დიდებით გალაღებულნი.