Read ქართული ბიბლია, სრული ვერსია Baruch 5 Bible Online

Baruch 5 - ქართული ბიბლია, სრული ვერსია bible

Baruch 5

¹განიძარცვე, იერუსალიმ, სამოსი შენი გლოვისა და სიმძიმილისა და ღვთის დიდების მშვენება შეიმოსე სამარადისოდ.

²მოისხი ორმაგი მოსასხამი ღვთისმიერი სიმართლისა და თავს დაიდგი წარუვალი დიდების შარავანდედი.

³რადგანაც ღმერთი მთელს ცისქვეშეთს უჩვენებს დიდებას შენსას.

⁴და საუკუნოდ დაგერქმევა მის მიერ სახელი: დიდება სიმართლისა და მშვიდობა ღვთისმოსაობისა.

⁵აღსდექ, იერუსალიმ, შედექი ქედზე, გახედე აღმოსავლეთს და იხილე შენი ძენი, მზის დასავლიდან აღმოსავლამდე შეკრებილნი წმიდის სიტყვით, რომელნიც ხარობენ იმის გამო, რომ ღმერთმა გაიხსენა ისინი.

⁶ფეხით გავიდნენ შენი ბჭიდან, მტრების მიერ წარეკილნი, ღმერთი კი დიდებით დაგიბრუნებს მათ, როგორც სამეფო ტახტის მემკვიდრეთ.

⁷რადგანაც ღვთის განგებით ყველა მაღალი მთა და მარადი ბორცვი უნდა დადაბლდეს, ხევები კი ამოივსოს მიწის მოსასწორებლად, რათა ისრაელი მტკიცედ ვიდოდეს უფლის დიდებით.

⁸ხოლო ჭალები და ყოველი კეთილსურნელოვანი ხე ისრაელს უნდა უჩრდილავდეს ღვთის ბრძანებით.

⁹რადგანაც ღმერთი სიხარულით წარუძღვება ისრაელს თავისი დიდების ნათელში, თავისი წყალობისა და სიმართლის თანხლებით.