Read ქართული ბიბლია, სრული ვერსია Ezekiel 18 Bible Online

Ezekiel 18 - ქართული ბიბლია, სრული ვერსია bible

Ezekiel 18

¹და იყო სიტყვა უფლისა ჩემდამი თქმული:

²რას გულისხმობთ, ისრაელის მიწის შესახებ რომ ანდაზას ამბობთ: პაპის ნაჭამმა ტყემალმა შვილიშვილს მოსჭრაო კბილი?

³მე არ ვიყო ცოცხალი ღმერთი, — ამბობს უფალი ღმერთი, — თუღა გქონდეთ თქვენ მომავალში სათქმელად ეს ანდაზა ისრაელში!

⁴ყველა სული ჩემია, როგორც სული მამისა, ისევე სული ძისა. შემცოდე სული კი მოკვდება.

⁵და თუ კაცი მართალია და სამართლიანად და ჭეშმარიტებით იქცევა,

⁶სამსხვერპლო მაღლობებზე არ ჭამს და თვალი ისრაელის სახლის კერპებისაკენ არა აქვს მიპყრობილი, მოყვასის ცოლს არ ბილწავს და წიდოვან ქალს არ ეკარება,

⁷არავის ჩაგრავს და თავის მევალეს ვალს უბრუნებს; ძარცვით არავის ძარცვავს, თავის ლუკმას მშიერს უყოფს და შიშველ-ტიტველს ტანზე აცმევს.

⁸ვახშით არ არის გამსესხებელი და სარგებელს არ იღებს; უსამართლობისგან შორს არის მისი ხელი და კაცსა და კაცს შორის სწორ სამართალს აჩენს;

⁹ჩემი წესებით დადის და ჩემს სამართალს იცავს, რათა ჭეშმარიტება აკეთოს — ის არის მართალი კაცია და იცოცხლებს, — ამბობს უფალი ღმერთი. —

¹⁰მაგრამ თუ შეეძინება მოძალადე ძე, სისხლისმღვრელი, რომელიც თავის მოძმეს გაუკეთებს ისეთ რამეს,

¹¹რაც მის მამას არასდროს ჩაუდენია, და სამსხვერპლო მაღლობებზე ჭამს, მოყვასის ცოლს ბილწავს,

¹²ღარიბ-ღატაკს ჩაგრავს, მტაცებლობს, ვალს არ აბრუნებს და კერპებისაკენ უჭირავს თვალი, სისაძაგლეს სჩადის,

¹³ვახშით გასცემს სესხს და სარგებელს იღებს — უნდა იცოცხლოს? არ უნდა იცოცხლოს. ყოველივე ამ სისაძაგლის ჩამდენი უცილოდ მოკვდება და მისი სისხლი მის თავზე იქნება.

¹⁴და, აჰა, შვა ძე, რომელიც ხედავდა მამამისის ყოველ ცოდვას, რასაც ის აკეთებდა, ხედავდა და არ აკეთებდა მის მსგავს საქმეებს,

¹⁵სამსხვერპლო მალობებზე არ ჭამდა და თვალი ისრაელის სახლის კერპებისაკენ არ ეჭირა, მოყვასის ცოლს არ ბილწავდა,

¹⁶არავინ დაუჩაგრავს, გირაოს არ იღებდა და ძარცვით არავის ძარცვავდა, თავის ლუკმას მშიერ-მწყურვალს უყოფდა და შიშველ-ტიტველს აცმევდა,

¹⁷ღარიბის ჩაგვრაში მისი ხელი არ გარეულა, ვახშსა და სარგებელს არ იღებდა, ჩემს სამართალს ასრულებდა და ჩემი წესებით დადიოდა, ის არ მოკვდება მამამისის ურჯულოების გამო, ის იცოცხლებს.

¹⁸მამამისი კი, რადგან ჩაგრავდა, მოძმეს ძარცვავდა და ბოროტებას სჩადიოდა თავის ხალხში, თავის ურჯულოებაში მოკვდება.

¹⁹თქვენ ამბობთ: რატომ არ უნდა იტვირთოსო შვილმა მამის ცოდვა? თუ შვილი სამართალსა და სიმართლეს იქმს, ჩემს ყველა წესს იცავს და ასრულებს — ის იცოცხლებს.

²⁰ცოდვილი სული კი მოკვდება. შვილმა არ უნდა იტვირთოს მამის დანაშაული და არც მამამ — შვილის ურჯულოება. მართლის სიმართლე მასზევე იქნება და ბოროტის ბოროტებაც — მასზევე.

²¹ბოროტი კი, თუ მოიქცევა თავისი ცოდვებისგან, რაც ჩაუდენია და დაიცავს ყველა ჩემს წესს და იქმს სამართალსა და სიმართლეს, იცოცხლებს, არ მოკვდება.

²²ყველა მის დანაშაულს, რაც კი ჩაუდენია, არ გაუხსენებენ მას. თავისი სიმართლით, რომელსაც მისდევდა, იცოცხლებს.

²³განა მე ვისურვებ ბოროტის სიკვდილს? — ამბობს უფალი ღმერთი, — განა არ მინდა, რომ მოიქცეს თავისი გზიდან და იცოცხლოს?

²⁴მართალი კი, თუ მიიქცა თავისი სიმართლიდან და უსამართლობას სჩადის, ყველა იმ სისაძაგლის მსგავსს, რასაც ბოროტი სჩადის, განა იცოცხლებს? ყოველ მის სიმართლეს, რაც ადრე აკეთა, არ გაუხსენებენ. და მოკვდება თავისი მუხთლობით, რომლითაც მუხთლობდა, და თავისი ცოდვით, რომლითაც სცოდავდა.

²⁵და თქვენ ამბობთ: არ არისო სწორი უფლის გზა. მომისმინე, სახლო ისრაელისა, ჩემი გზა არ არის სწორი? ეს თქვენი გზებია, სწორი რომ არ არის?

²⁶თუ მართალი თავისი სიმართლიდან მიიქცევა და ჩაიდენს უსამართლობას, ამის გამო მოკვდება; თავისი უსამართლობის გამო, რომელიც ჩაიდინა, მოკვდება იგი.

²⁷და თუ ბოროტი თავისი ჩადენილი ბოროტებიდან მოიქცა და იქმს სამართალსა და სიმართლეს, ის თავის სულს თავად გაიცოცხლებს.

²⁸თუ შეიგნებს და მოიქცევა თავისი დანაშაულებებიდან, რაც ჩაუდენია, ის იცოცხლებს, არ მოკვდება.

²⁹ისრაელის სახლი ამბობს: არ არისო სწორი უფლის გზა. ჩემი გზა არ არის სწორი, ისრაელის სახლო? განა თქვენი გზები არის სწორი?

³⁰ამიტომ თითოეულს თავისი გზის მიხედვით განგსჯით, ისრაელის სახლო, — ამბობს უფალი ღმერთი, — მოინანიეთ და მოიქეცით თქვენი ყველა დანაშაულიდან და არ გექცევათ ურჯულოება დაბრკოლებად.

³¹მოიშორეთ ყველა თქვენი ცოდვები, რომლითაც სცოდეთ, და შეიქმენით ახალი გული და ახალი სული; და რატომღა უნდა ამოწყდეთ, ისრაელის სახლო?

³²რადგან მე არ მსურს მოსაკლავთა სიკვდილი, — ამბობს უფალი ღმერთი, — მაშ, მოიქეცით და იცოცხლებთ.