Read ქართული ბიბლია, სრული ვერსია Numbers 22 Bible Online

Numbers 22 - ქართული ბიბლია, სრული ვერსია bible

Numbers 22

¹აიყარნენ ისრაელიანები და დაბანაკდნენ მოაბის ველებზე, იორდანეს გადაღმა, იერიხოს გაღმა.

²და იხილა ბალაკმა, ციფორის ძემ, ყველაფერი, რაც უყო ისრაელმა ამორეველებს.

³ძალზე შეეშინდა მოაბს ამ ხალხისა, რადგან იგი მრავალრიცხოვანი იყო. და დაფრთხა მოაბი ისრაელიანთა წინაშე.

⁴და უთხრა მოაბმა მიდიანის უხუცესებს: „ახლა გააჩანაგებს ეს ხალხი ყველაფერს, რაც ჩვენს ირგვლივაა, როგორც ხარი აჩანაგებს მინდვრის ბალახს.“ იმჟამად მოაბის მეფე იყო ბალაკი, ძე ციფორისა.

⁵გაუგზავნა მან მოციქულები ბალაამს, ბეყორის ძეს, ფეთორში, რომელიც მდინარე ევფრატთანაა, ამავის ქვეყანაში, რათა მოეწვიათ იგი და ეთქვათ: „აჰა, ხალხი გამოვიდა ეგვიპტიდან. უკვე დაფარა მიწის პირი და ის ჩემს პირდაპირ დამკვიდრდა.

⁶და ახლა, მოდი, დამიწყევლე ეს ხალხი, რადგან იგი ჩემზე ძლიერია. ეგების შევძლო და განვდევნო ამ ქვეყნიდან, რადგან ვიცი, რომ ვისაც აკურთხებ, კურთხეული იქნება, და ვისაც დასწყევლი, წყეული იქნება.“

⁷და წავიდნენ მოაბისა და მიდიანის უხუცესები. მათ ხელთ ჰქონდათ სამისნოს საფასური და მივიდნენ ბალაამთან და გადასცეს მას ბალაკის სიტყვები.

⁸უთხრა მათ ბალაამმა: „გაათიეთ ეს ღამე აქ და გაგცემთ პასუხს, რასაც უფალი გამომიცხადებს. და დარჩნენ მოაბის თავკაცები ბალაამთან.“

⁹მივიდა ღმერთი ბალაამთან და ჰკითხა: „ვინ არიან ეს კაცები შენთან?“

¹⁰და უთხრა ბალაამმა ღმერთს: „მოაბის მეფეს, ბალაკს, ციფორის ძეს, გამოუგზავნია ისინი ჩემთან და შემოუთვლია:

¹¹აჰა, ხალხმა, რომელიც ეგვიპტიდან გამოვიდა, დაფარაო მიწის პირი. ახლა მოდი, დამიწყევლე ის; ეგების შევძლო შებრძოლება მასთან, რომ განვდევნოო.“

¹²უთხრა ღმერთმა ბალაამს: „არ წაჰყვე მათ, არ დაწყევლო ის ხალხი, რადგან კურთხეულია იგი.“

¹³და ადგა ბალაამი დილით და უთხრა ბალაკის თავკაცებს: „წადით თქვენს ქვეყანაში, რადგან უფალს არ სურს, რომ თქვენთან ერთად გამომიშვას.“

¹⁴და ადგნენ მოაბელი თავკაცები, და დაბრუნდნენ ბალაკთან და უთხრეს: არ ნებავსო ბალაამს ჩვენთან წამოსვლა.

¹⁵კვლავ გაგზავნა ბალაკმა თავკაცები, უფრო მეტი და მათზე უფრო სახელოვანი.

¹⁶მივიდნენ ბალაამთან და უთხრეს მას: „ასე თქვა ბალაკმა, ციფორის ძემ: ‘ნუ იტყვი უარს ჩემთან მოსვლაზე,

¹⁷რადგან ძალიან დიდ პატივს გცემ, და ყველაფერს, რასაც მეტყვი, გავაკეთებ; წამოდი, დამიწყევლე ეს ხალხი.’“

¹⁸და უპასუხა ბალაამმა ბალაკის მსახურებს: „თუნდაც ოქრო-ვერცხლით ავსებული მთელი თავისი სახლი მომცეს ბალაკმა, ვერ გადავალ უფლის, ჩემი ღმერთის ბრძანებას, ვერც ნაკლებს ვიზამ და ვერც მეტს.

¹⁹ახლა დარჩით თქვენც აქ ამაღამ, და მე გავიგებ, რას გამომიცხადებს უფალი.“

²⁰მოვიდა ღმერთი ბალაამთან ღამით და უთხრა მას: „თუ შენს მისაწვევად მოვიდნენ ეს კაცები, ადექ, გაჰყევი მათ; ოღონდ რასაც მე გეტყვი, მხოლოდ ის გააკეთე.“

²¹ადგა ბალაამი დილით და შეკაზმა თავისი ჭაკი ვირი და წაჰყვა მოაბელთა თავკაცებს.

²²და აღეგზნო რისხვა ღმერთისა, რადგან წავიდა იგი. და დადგა უფლის ანგელოზი გზაზე მის შესაჩერებლად. ხოლო იგი ამხედრებული იყო თავის ვირზე და თან ორი მსახური ახლდა.

²³დაინახა ვირმა გზაზე მდგომი უფლის ანგელოზი გაშიშვლებული მახვილით ხელში და გადაუხვია გზიდან, და წავიდა მინდორზე. ბალაამმა კი ვირს ცემა დაუწყო, რათა გზისკენ მოებრუნებინა.

²⁴და დადგა უფლის ანგელოზი ვენახების ორღობეში: ღობე იყო ერთ მხარესაც და ღობე იყო მეორე მხარესაც.

²⁵როცა დაინახა ვირმა უფლის ანგელოზი, კედელს აეკრა, და ზედ მიაჭყლიტა ბალაამის ფეხი. და მან კვლავ დაუწყო ცემა ვირს.

²⁶და კვლავ გაიარა უფლის ანგელოზმა და დადგა ვიწრო ადგილზე, სადაც არ იყო ასაქცევი გზა, არც მარჯვნივ და არც მარცხნივ.

²⁷დაინახა ვირმა უფლის ანგელოზი და ჩაიკეცა. და განრისხდა ბალაამი და ჯოხი დასცხო ვირს.

²⁸და გაუხსნა უფალმა ბაგე ვირს და უთხრა მან ბალაამს: „რა დაგიშავე, რომ უკვე მესამედა მცემ?“

²⁹უთხრა ბალაამმა ვირს: „იმიტომ რომ აბუჩად ამიგდე. ხელში მახვილი რომ მქონოდა, ახლავე მოგკლავდი.“

³⁰და უთხრა ვირმა ბალაამს: „განა შენი ვირი არა ვარ, რითაც დადიხარ მთელი შენი ცხოვრება დღემდე? განა მჩვევია შენთან ასე მოქცევა?“ და უპასუხა მან: „არა.“

³¹და აუხილა თვალი ბალაამს უფალმა, და იხილა მან გზაზე მდგომი უფლის ანგელოზი გაშიშვლებული მახვილით. და მუხლი მოიყარა ბალაამმა და თაყვანი სცა პირქვე დამხობილმა.

³²უთხრა მას უფლის ანგელოზმა: „რისთვის სცემ ვირს მესამეჯერ? მე გამოვედი დასაბრკოლებლად, რადგან არ არის სწორი ეს გზა ჩემს წინაშე.

³³დამინახა ვირმა და სამჯერ ამიქცია გზა. რომ არ გადაეხვია ჩემგან, მოგკლავდი, მას კი ცოცხალს დავტოვებდი.“

³⁴და უთხრა ბალაამმა უფლის ანგელოზს: „შევცოდე, რადგან არ ვიცოდი, რომ შენ იდექი ჩემს გზაზე. და ახლა, თუ ეს ბოროტებაა შენს თვალში, უკან დავბრუნდები.“

³⁵უთხრა უფლის ანგელოზმა ბალაამს: „წაჰყევი ამ კაცებს, ოღონდ ის ილაპარაკე, რასაც მე გეტყვი.“ და წავიდა ბალაამი ბალაკის თავკაცებთან ერთად.

³⁶და გაიგო ბალაკმა, რომ მოვიდა ბალაამი, და გამოვიდა მის შესახვედრად მოაბელთა ქალაქში, რომელიც არნონის საზღვართან მდებარეობს, ზედ საზღვარზე.

³⁷და უთხრა ბალაკმა ბალაამს: „ხომ გამოგიგზავნე მოციქულები მოსაწვევად? რატომ არ მოდიოდი ჩემთან? ნუთუ მართლა ვერ შევძლებ შენს პატივისცემას?“

³⁸და უთხრა ბალაამმა ბალაკს: „აჰა, მოვედი შენთან, მაგრამ განა შემიძლია ჩემით რაიმეს თქმა? რასაც ჩამიდებს ღმერთი ბაგეებში, იმას ვიტყვი.“

³⁹და გაჰყვა ბალაამი ბალაკს, და მივიდნენ კირიათ-ხუცოთში.

⁴⁰და დაკლა ბალაკმა ზვარაკი და ცხვარი და გაუგზავნა ბალაამს და მის თავკაცებს.

⁴¹და დილით წაიყვანა ბალაკმა ბალაამი და აიყვანა ბამოთ-ბაყალზე, და იხილა იქიდან ისრაელის ხალხის ნაწილი.