Read ქართული ბიბლია, სრული ვერსია 1 Maccabees 16 Bible Online

1 Maccabees 16 - ქართული ბიბლია, სრული ვერსია bible

1 Maccabees 16

¹დაბრუნდა იოანე გაზარადან და უამბო სიმონს, მამამისს, რაც ჩაიდინა კენდებეოსმა.

²მაშინ სიმონმა უხმო თავის ორ უფროს ვაჟს: იუდას და იოანეს, და უთხრა მათ: „მეც, ჩემი ძმებიცა და მამაჩემის სახლიც დიდხანს ვებრძოდით ისრაელის მტრებს, სიჭაბუკიდან დღევანდელ დღემდე, და ბევრჯერ კეთილად წარიმართა ისრაელის ხსნა ჩვენი ხელით.

³მე მოვხუცდი, თქვენ კი, ღვთის წყალობით, სრულწლოვანებას მიაღწიეთ; მაშ, გასწიეთ ჩემი და ჩემი ძმის მაგივრობა, წადით და იბრძოლეთ ჩვენი ხალხისთვის. ზეცამ ნუ მოგაკლოთ შემწეობა.“

⁴აირჩია ქვეყნიდან 20 ათასი მეომარი, ქვეითი და მხედარი, და დაიძრნენ კენდებეოსის წინააღმდეგ. ღამე მოდეინში გაათიეს.

⁵დილით ადგნენ და დაბლობისაკენ დაეშვნენ. და, აჰა, გამოჩნდა მათ შესახვედრად მომავალი ქვეითთა და მხედართა მრავალრიცხოვანი ლაშქარი; მათ შორის კი მდინარე იყო.

⁶იოანე თავისი ლაშქრით დაიძრა მათ წინააღმდეგ. როცა დაინახა, რომ ხალხს ეშინოდა მდინარეზე გადასვილსა, თვითონ გადავიდა პირველი. მისი შემყურე მეომრები უკან მიჰყვნენ მას.

⁷დაყო ლაშქარი და მხედრები ჩააყენა ქვეითთა შორის. მტრის მხედრობა კი ურიცხვი იყო.

⁸ბუკსა ჰკრეს და უკუიქცა კენდებეოსი და მისი ლაშქარი; და დაეცა მათგან მრავალი დაჭრილი, დანარჩენებმა კი სიმაგრისკენ იბრუნეს პირი.

⁹მაშინ დაიჭრა იუდა, იოანეს ძმა. იოანე კი მტერს მისდევდა, ვიდრე არ მიადგა კედრონს, რომელიც მან ააშენა.

¹⁰მტერმა აზოტის მახლობლად მდებარე ციხე-კოშკებს შეაფარა თავი, მაგრამ მან ცეცხლს მისცა ისინი და დაეცა მათგან 2 ათასამდე კაცი, იოანე კი მშვიდობით დაბრუნდა იუდაში.

¹¹ხოლო პტოლემეოსი, ძე აბუბოსისა, იერიხოს ველზე იყო სარდლად გამწესებული; უამრავი ოქრო-ვერცხლი ჰქონდა,

¹²რადგანაც მღვდელმთავრის სიძე იყო.

¹³თავს გაუვიდა და განიზრახა ხელთ ეგდო მთელი ქვეყანა; მზაკვრულ გეგმებს აწყობდა სიმონისა და მისი ვაჟების წინააღმდეგ, რათა დაეღუპა ისინი.

¹⁴ხოლო სიმონი ამ დროს თავისი ქვეყნის ქალაქებს ათვალიერებდა და მათ საქმეებს არიგებდა. ასსამოცდამეჩვიდმეტე წლის მეთერთმეტე თვეს (რომელიც არის საბატის თვე) იერიხოში ჩავიდნენ სიმონი და მისი ვაჟები: მატათია და იუდა.

¹⁵აბუბოსის ძემ მზაკვრული ზრახვით მიიღო ისინი მის მიერ აგებულ პატარა ციხესიმაგრეში, რომელსაც ერქვა დოკი, და დიდებული სუფრა გაუშალა მათ; თან ხალხი ჰყავდა ჩასაფრებული.

¹⁶როცა სიმონი და მისი ვაჟები დათვრნენ, წამოიშალნენ პტოლემეოსი და მისი თანამზრახველნი, იარაღს დასტაცეს ხელი, ნადიმობისას შეუცვივდნენ სიმონს და მოკლეს ისიც, მისი ორი ვაჟიცა და რამოდენიმე მსახურიც.

¹⁷ასე მუხანათურად მოიქცა და ბოროტი მიაგო სიკეთის წილ.

¹⁸პტოლემეოსმა ეს ამბავი წერილით აცნობა მეფეს და სთხოვა, ლაშქარი მომაშველეო; სამაგიეროდ ჰპირდებოდა, რომ ჩააბარებდა ქვეყანას და მის ქალაქებს.

¹⁹თანაც გაზარაში იოანეს მოსაკლავად აფრინა ხალხი; ათასისთავებს კი წერილები დაუგზავნა, მეახელით და ოქრო-ვერცხლით აგავსებთო.

²⁰ზოგიც იერუსალიმისა და ტაძრის ასაღებად გაგზავნა.

²¹მაგრამ ვიღაცამ დაასწრო და გაზარაში აცნობა იოანეს, შენი მამა და ძმები დახოცეს და შენს მოსაკლავადაც გამოგზავნესო ხალხი.

²²ეს რომ გაიგო, იოანეს თავზარი დაეცა; შეიპყრო მის მოსაკლავად მოგზავნილნი და დახოცა ისინი, რადგანაც მიხვდა, რომ მისი დაღუპვა სურდათ.

²³იოანეს დანარჩენი ამბები, მისი ომები და საგმირო საქმენი, სახელოვნად რომ აღასრულა, გალავნთა მშენებლობა, თვითონვე რომ აღმართა, და მისი ყოველი ღვაწლი

²⁴მისივე მღვდელმთავრობის მატიანეშია აღწერილი, იმ დროიდან მოყოლებული, რაც მღვდელმთავრად დადგა მამამისის შემდეგ.