Read ქართული ბიბლია, სრული ვერსია 1 Maccabees 8 Bible Online

1 Maccabees 8 - ქართული ბიბლია, სრული ვერსია bible

1 Maccabees 8

¹ესმა იუდას რომაელთა დიდება: რომ ისინი ძლიერნი არიან და ძლევემოსილნი, კეთილგანწყობილებას იჩენენ მათი მოკავშირეების მიმართ და ვინც კი მისულა მათთან, ყველასთვის სამეგობროდ გაუწვდიათ ხელი.

²მათ ძალას და ძლიერებას ისიც მოწმობდა, რასაც ყვებოდნენ მათ მიერ გადახდილ ომებსა და გმირობაზე, გალატელებთან ბრძოლაში რომ გამოიჩინეს, რომლებიც დაიმორჩილეს და მოხარკეებად გაიხადეს.

³და ისიც, რაც ესპანეთში მოიმოქმედეს, რათა იქაური ვერცხლისა და ოქროს საბადოები ჩაეგდოთ ხელში.

⁴თავისი გონიერებითა და სიმტკიცით დაეპატრონნენ მთელ მხარეს, თუმცა ის ძალზე შორს იყო მათი ქვეყნიდან, ხოლო მეფეებს, დედამიწის კიდიდან რომ დაიძრნენ მათ წინააღმდეგ, სძლიეს და სასტიკი მარცხი აგემეს.

⁵ასევე სძლიეს და ქედი მოახრევინეს ფილიპესა და პერსევსს, მაკედონელთა მეფეს, და სხვებსაც, ვინც კი აღიძრა მათ წინააღმდეგ.

⁶ანტიოქოსიც, აზიის დიდი მეფე, ასოცი სპილოთი, მხედრებით, ეტლებით და დიდძალი ლაშქრით რომ გაილაშქრა რომაელებზე, ძლეულ იქნა მათგან.

⁷ცოცხლად შეიპყრეს და აიძულეს დიდძალი ხარკი და მძევლები ეძლია მათთვის, — მასაც და მის შემდგომ მეფეებსაც, — და სამეფო დაექუცმაცებინა.

⁸ჩამოართვეს ყველაზე უკეთესი ქვეყნები: ინდოეთი, მიდია, ლიდია და მეფე ევმენესს მისცეს ისინი.

⁹ხოლო როდესაც ბერძნებმა განიზრახეს რომაელებზე გალაშქრება და მათთვის მუსრის გავლება,

¹⁰რომაელებმა გაიგეს ეს ამბავი და ერთი მხედართმთავარი გაგზავნეს მათ წინააღმდეგ საომრად; ბევრი ბერძენი დაეცა ბრძოლის ველზე, ტყვედ წამოასხეს მათი ცოლ-შვილი და გაძარცვეს ისინი, ხელთ იგდეს მათი ქვეყანა, დააქციეს მათი ციხესიმაგრენი და დღემდე დამონებული ჰყავთ ისინი.

¹¹დანარჩენი სამეფოები და კუნძულები, ოდესმე რომ აღძრულან მათ წინააღმდეგ, ასევე დაარბიეს და დაიმონეს.

¹²დაიმორჩილეს ახლობელი თუ შორეული სამეფოები და მათი სახელის ხსენებაც კი შიშის ზარს სცემდა ყველას.

¹³ვის შეწევნასა და მეფედ დასმასაც ინებებენ, კიდევაც ამეფებენ, ხოლო ვისი დამხობაც სურთ, იმას ამხობენ, ძლევემოსილებით აღზევებულნი.

¹⁴და მაინც არც ერთს არ დაუდგამს თავზე გვირგვინი და არც ძოწეული შეუმოსავს დიდების ნიშნად.

¹⁵არამედ საბჭოს იწვევენ და საბჭოს 320 წევრი ყოველდღიურად ბჭობს იმაზე, რაც ხალხსა და მის კეთილდღეობას ეხება.

¹⁶ყოველწლიურად ერთ კაცს ანდობენ მთავრობას და ქვეყნის პატრონობას, ყველანი მას ემორჩილებიან და არ არის შური და ეჭვი მათ შორის.

¹⁷მაშინ იუდამ ამოირჩია ევპოლემოსი, ძე იოანესი, ძისა აკოსის, და იასონი, ძე ელეაზარისა და წარგზავნა ისინი რომში მეგობრობისა და კავშირის დასამყარებლად,

¹⁸და კისრიდან უღლის გადასაგდებად, რადგანაც ხედავდნენ, რომ ბერძენთა სამეფოს სურდა საბოლოოდ დაემონებინა ისრაელი.

¹⁹წარგზავნილნი რომის შორეულ გზას დაადგნენ; საბჭოში შევიდნენ და შეკრებილთ ასე მიმართეს:

²⁰იუდა მაკაბელმა, მისმა ძმებმა და იუდაელმა ხალხმა წარმოგვგზავნეს, რათა სამოკავშირეო და სამშვიდობო ხელშეკრულება დავდოთ თქვენთან და თქვენს მეგობრებად შეგვრაცხოთ.

²¹და მოეწონათ ეს სიტყვა.

²²აი, პირიც წერილისა, ბრინჯაოს დაფაზე რომ დაწერეს და იერუსალიმში გაგზავნეს, რათა დარჩენილიყო იქ მშვიდობისა და კავშირის ნიშნად:

²³სიკეთე ნუ მოშლოდეთ რომაელებსა და იუდაელ ხალხს ზღვასა და ხმელზე უკუნისამდე; მტერი და მახვილი არიდოთ.

²⁴თუ პირველად რომს ან მის მოკავშირეებს დაემუქრათ ომი მთელს მათ სამფლობელოში,

²⁵იუდაელმა ხალხმა დახმარება უნდა გაუწიოს მათ მთელი გულით, როგორც ვითარება მოითხოვს;

²⁶მოკავშირეთა მეომრებს არ მისცემენ და არც მოამარაგებენ პურით, იარაღით, ფულითა და ხომალდებით, რადაგნაც ასე ინება რომმა; უანგაროდ უნდა ასრულებდნენ თავიანთ ვალდებულებებს.

²⁷ხოლო თუ პირველად იუდაელ ხალხს დაემუქრება ომი, რომაელები სულით და გულით დაეხმარებიან მათ, როგორც მოითხოვს ვითარება;

²⁸მოკავშირეებს იუდაელნი არ მისცემენ არც პურს, არც იარაღს, არც ფულსა და არც ხომალდებს, რადგანაც ასე ინება რომმა; მოკავშირენი უზაკველად უნდა ასრულებდნენ თავიანთ ვალდებულებებს.

²⁹ამ პირობით შეკრეს კავშირი რომაელებმა იუდაელ ხალხთან.

³⁰თუ ან ერთი, ან მეორე მხარე მოისურვებს რაიმე მიუმატოს ან გამოაკლოს ამ პირობებს, ეს საერთო ნებით უნდა გადაწყდეს, და მხოლოდ მაშინ ექნება ძალა იმას, რასაც მიუმატებენ ან გამოაკლებენ.

³¹ხოლო იმ ბოროტებისათვის, რაც მეფე დემეტრიოსმა თავს დაატეხა მათ, ასე მივწერეთ მას და შევუთვალეთ: „რატომ დაადგი ესოდენ მძიმე უღელი იუდაელებს — ჩვენს მეგობრებს და მოკავშირეებს?

³²თუ კვლავაც საჩივრით მოგვმართეს შენს გამო, ჩვენ ვიქმთ მათთვის სამართალს და ომს გამოგიცხადებთ ხმელსა თუ ზღვაზე.“