Read ქართული ბიბლია, სრული ვერსია 2 Maccabees 2 Bible Online

2 Maccabees 2 - ქართული ბიბლია, სრული ვერსია bible

2 Maccabees 2

¹წინასწარმეტყველ იერემიას ჩანაწერებში ვპოულობთ, რომ მან უბრძანა გადასახლებულთ თან წაეტანათ ცეცხლი, როგორც აღვნიშნეთ.

²როგორც ამცნო წინასწარმეტყველმა გადასახლებულთ, სჯული რომ მისცა მათ, — არ დაევიწყებინათ უფლის ბრძანებები და გონება არ არეოდათ მაცთუნებელი ოქრო-ვერცხლის კერპებისა და მათი სამკაულების შემყურეთ.

³სხვასაც ამბობდა, ამის მსგავსს, და შეაგონებდა მათ, არ განდგომოდა სჯულს მათი გული.

⁴წერილში ისიც ეწერა, რომ ღვთივშთაგონებულ წინასწარმეტყველს უბრძანებია კარვისა და კიდობნისათვის, მე მომყევითო, როცა მთისკენ გაემართა, რომლის თხემზეც ასულმა მოსემ იხილა ღვთის სამკვიდრო.

⁵იქ მისულმა იერემიამ იპოვა გამოქვაბული, რომელშიაც შეიტანა კარავი, კიდობანი, სასაკმევლე საკურთხეველი და დაბეჭდა შესასვლელი.

⁶როცა შემდეგ მის მხლებელთაგან ზოგიერთიც მივიდა იქ გზის მოსანიშნად, ვერ იპოვეს ის ადგილი.

⁷ეს რომ გაიგო, იერემიამ ყვედრებით უთხრა მათ: უცნობი დარჩება ეს ადგილი, ვიდრე ღმერთი მოწყალებას არ მოიღებს და თავის ხალხს არ შემოკრებს აქ.

⁸მაშინღა გვიჩვენებს უფალი მას, და გამოჩნდება უფლის დიდებაცა და ღრუბელიც, როგორც მოსეს დროს გამოჩნდა, და როგორც ითხოვდა სოლომონი, რომ საგანგებოდ წმიდა ყოფილიყო ეს ადგილი.

⁹ისიც ცხადი შეიქნა, თუ როგორ შესწირა მსხვერპლი, სიბრძნით აღვსილმა, განახლებისა და ტაძრის დასრულებისთვის.

¹⁰როგორც მოსემ აღავლინა ლოცვა უფლის მიმართ, და ჩამოეშვა ზეცით ცეცხლი და შთანთქა მსხვერპლი, ისე ილოცა სოლომონმაც და ცით მოვლენილმა ცეცხლმა შთანთქა სრულადდასაწველი მსხვერპლი.

¹¹და თქვა მოსემ: რაკიღა ცოდვის მსხვერპლი არ იჭმევა, ამიტომაც შთაინთქა ცეცხლში.

¹²ასევე გაატარა სოლომონმაც რვა დღე.

¹³ნეემიას ჩანაწერებსა და მოგონებებშიც მოთხრობილია, როგორ დააფუძნა მან წიგნთსაცავი, შეკრიბა თქმულებები მეფეებზე, წინასწარმეტყველებსა და დავითზე, აგრეთვე მეფეთა წერილები წმიდა შესაწირავის თაობაზე.

¹⁴იუდამაც ასევე მოუყარა თავი ომიანობის ჟამს გაფანტულ წიგნებს, ასე რომ, ახლა ჩვენ გვაქვს ყველაფერი.

¹⁵თუ ამათგან რამე დაგჭირდათ, ხალხი გამოგზავნეთ და გაახლებთ.

¹⁶უკვე მოგწერეთ, რომ გვინდოდა განწმედის დღესასწაული გადაგვეხადა. კარგი იქნებოდა, თუ თქვენც ზეიმით აღნიშნავთ ამ დღეებს.

¹⁷ღმერთმა იხსნა მთელი თავისი ხალხი და ყველას დაუბრუნა სამკვიდრო, სამეფო სამღვდელოება და საწმიდარი.

¹⁸როგორც აღგვეთქვა სჯულით, ღვთის იმედი გვაქვს, რომ მალე შეგვიწყალებს და შეგვკრებს ცისქვეშეთში წმიდა ადგილას. აკი გვიხსნა კიდეც დიდი ბოროტებისაგან და განწმიდა ეს ადგილი.

¹⁹ხოლო იუდა მაკაბელისა და მისი ძმების ამბავს, დიდი ტაძრის განწმედას და საკურთხევლის განახლებას,

²⁰ისევევ, როგორც ანტიოქოს ეპიფანესა და მისი ძის — ევპატორის წინააღმდეგ გადახდილ ომებს,

²¹და ზეცით მათთვის მოვლენილ ხილვებს, რომელნიც ისეთი თავდადებით იბრძოდნენ იუდაელთათვის, რომ თავიანთი მცირერიცხოვნების მიუხედავად, მთელი ქვეყანა გაწმინდეს და განდევნეს ბარბაროსთა ურდოები,

²²და განწმიდეს საქვეყნოდ ცნობილი ტაძარი, გაათავისუფლეს ქალაქი და განამტკიცეს დასარღვევად განწირული სჯული, როცა უფალმა მოწყალება მოიღო და შეიწყნარა ისინი, —

²³ყოველივე ეს, იასონ კირენელის მიერ ხუთ წიგნში მოთხრობილი, ვეცდებით მოკლედ გადმოვცეთ ერთ წიგნში,

²⁴რაკიღა ვგრძნობთ, რა დიდ სიძნელეს შეუქმნის შინაარსის სიუხვე და ამბავთა სიმრავლე ისტორიულ თხზულებათა გაცნობის მსურველთ.

²⁵ამიტომაც ვეცადეთ სიამოვნება მიგვენიჭებინა კითხვის მოსურნეთათვის, მონათხრობი უფრო ადვილი დასამხსოვრებელი გაგვეხადა განსჯის მოყვარულთათვის და საერთოდ, სარგებლობა მოგვეტანა მკითხველისათვის.

²⁶თუმცა ამბის მოკლედ გადმოცემა დიდ ჭაპანწყვეტასა და ღამის თევას მოითხოვდა ჩვენგან.

²⁷ისევე, როგორც ძნელია ლხინის გადახდა სხვათა საამებლად. და მაინც, მრავალთა სასიკეთოდ ვიტვირთეთ ეს ძნელი საქმე.

²⁸წვრილმანთა ზუსტი გადმოცემა მემატიანეებს მივანდეთ, ჩვენ კი ვეცადეთ მოკლედ გადმოგვეცა ამბები.

²⁹როგორც ახლის მაშენებელ ხუროთმოძღვარს მთელ ნაგებობაზე ზრუნვა მართებს, ხოლო მომხატავ-მომჩუქურთმებელს — მარტოოდენ სამკაულებზე, მასვე ვფიქრობთ ჩვენზედაც.

³⁰ჩაღრმავება და ამბის გამოწვლილვით გადმოცემა იმ მემატიანის საქმეა, პირველად რომ იწყებს თხრობას,

³¹ხოლო სათქმელის დაწურულად გადმოცემა და წვრილმანებისთვის თავის არიდება შემმოკლებელს მოეთხოვება.

³²ახლა კი, ზემოთქმულიდან გამომდინარე, ვიწყებ თხრობას, რადგანაც უგუნურებაა თხრობამდე განავრცო სიტყვა, თვით თხრობა კი შეამოკლო.