Read ქართული ბიბლია, სრული ვერსია Deuteronomy 19 Bible Online

Deuteronomy 19 - ქართული ბიბლია, სრული ვერსია bible

Deuteronomy 19

¹როცა მოსპობს უფალი, შენი ღმერთი, ხალხებს, რომელთა ქვეყანასაც შენ გაძლევს, და განდევნი მათ და დასახლდები მათ ქალაქებში და მათ სახლებში,

²სამი ქალაქი გამოყავი შენს მიწაზე, რომელსაც უფალი, შენი ღმერთი, გაძლევს დასამკვიდრებლად;

³განიმზადე გზა და სამ ნაწილად გაყავი შენი ქვეყნის მიწა-წყალი, რომელსაც გიწილადებს უფალი, შენი ღმერთი. და ის ქალაქები[3] იქნება თავშესაფარი მათთვის, ვისაც უნებლიე კაცისკვლა შეემთხვევა.

⁴და აი, რომელ მკვლელს შეუძლია თავი შეაფაროს იქ და გადარჩეს: იმას, ვისაც უნებლიეთ შემოაკვდება თავისი მოყვასი, რომლის მტრობაც არ ჰქონია არც გუშინ და არც გუშინწინ;

⁵ანდა ვინც თავის მოყვასთან ერთად ტყეში წავიდა შეშის მოსაჭრელად და, ცული რომ მოუღერა ხეს მოსაჭრელად, ცულს ტარი გასძვრა, მოხვდა მის მოყვასს ნაჯახი და მოკლა; ის კაცი უნდა გაიქცეს ერთ-ერთ იმ ქალაქში, რათა გადაირჩინოს თავი,

⁶რომ შორი გზის გამო მესისხლე ცხელ გულზე არ გამოეკიდოს მკვლელს, არ მიეწიოს და არ მოკლას; ის კი სიკვდილს არ იმსახურებს, რადგან არ ჰქონია თავის მოყვასთან მტრობა არც გუშინ და არც გუშინწინ.

⁷ამიტომ გიბრძანე: სამი ქალაქი გამოყავი-მეთქი.

⁸და როცა გააფართოებს უფალი, შენი ღმერთი, შენს საზღვრებს, როგორც შეჰფიცა შენს მამებს, და მოგცემს მთელ ქვეყანას, რომლის მიცემაც აღუთქვა მათ,

⁹თუ დაიცავ ყველა ამ მცნებებს, რომელთაც გიბრძანებ დღეს, რომ შეიყვარო უფალი, შენი ღმერთი, და იარო მისი გზებით მთელი სიცოცხლე, იმ სამ ქალაქს კიდევ სხვა სამი ქალაქი მიუმატე.

¹⁰და ნუ დაიღვრება უცოდველი სისხლი შენს მიწაზე, რომელსაც უფალი, შენი ღმერთი, გაძლევს სამკვიდროდ, და არ იქნება შენზე სასისხლო ცოდვა.

¹¹ხოლო თუ ვინმე შეიძულებს თავის მოყვასს და ჩაუსაფრდება მას, აღდგება მის წინააღმდეგ, სცემს და მოკლავს, და თავს შეაფარებს ერთ-ერთ ამ ქალაქთაგანს,

¹²კაცები გაგზავნონ იმ ქალაქის უხუცესებმა, და მოაყვანინონ ის იქიდან, და გადასცენ მესისხლეს, რათა მოკლან.

¹³წყალობის თვალით ნუ შეხედავ მას, და ჩამორეცხე ისრაელს ის უცოდველი სისხლი[4] და კარგი იქნება შენთვის.

¹⁴არ გადაწიო შენი მოყვასის მიჯნა, წინაპრებმა რომ დასვეს შენს სამკვიდროში, რომელსაც დაიმკვიდრებ ქვეყანაში, რომელსაც უფალი, შენი ღმერთი, გაძლევს.

¹⁵საკმარისი არ არის მხოლოდ ერთი მოწმე ვინმეს წინააღმდეგ რაიმე დანაშაულის დასამტკიცებლად, და რაიმე ცოდვისათვის, რითაც შესცოდავს; ორი მოწმის პირით ან სამი მოწმის სიტყვით გადაწყდეს საქმე.

¹⁶თუ გამოვა ბოროტი მოწმე ვინმეს წინააღმდეგ, რათა რაიმე ბრალი დასწამოს მას,

¹⁷წარდგეს ეს ორი მოდავე კაცი უფლის წინაშე, მღვდელთა და მსაჯულთა წინაშე, რომლებიც იმჟამად იქნებიან,

¹⁸და კარგად გამოიძიონ მსაჯულებმა. და თუ ეს მოწმე ცრუ მოწმეა და ცილი დასწამა თავის მოძმეს,

¹⁹გაუკეთეთ მას, რისი გაკეთებაც ჰქონდა განზრახული თავისი მოძმისათვის. და ასე აღმოფხვრი ბოროტებას შენი წიაღიდან.

²⁰და სხვა დანარჩენები რომ გაიგებენ ამას, შეშინდებიან, და აღარ ჩაიდენენ ამგვარ ბოროტებას შენს წიაღში.

²¹წყალობის თვალით ნუ შეხედავ მას: სიცოცხლე სიცოცხლის წილ, თვალი თვალის წილ, კბილი კბილის წილ, ხელი ხელის წილ, ფეხი ფეხის წილ.