Read ქართული ბიბლია, სრული ვერსია Philemon 1 Bible Online

Philemon 1 - ქართული ბიბლია, სრული ვერსია bible

Philemon 1

¹პავლე, ქრისტე იესოს პატიმარი, და ძმა ტიმოთე, ფილიმონს — ჩვენს საყვარელ ძმასა და თანამშრომელს,

²და აფიას, საყვარელ დას, და არქიპოსს, ჩვენს თანამებრძოლს, და ეკლესიას შენს სახლში.

³მადლი თქვენ და მშვიდობა ჩვენი მამა ღმერთისა და უფალი იესო ქრისტესაგან.

⁴ყოველთვის ვმადლობ ჩემს ღმერთს, როდესაც გიხსენებ ჩემს ლოცვებში,

⁵რადგან მესმის შენი სიყვარულისა და რწმენის შესახებ, რომელიც გაქვს უფალი იესოსა და ყველა წმიდის მიმართ,

⁶ვლოცულობ, რომ შენი თანაზიარება რწმენაში ქმედითი იყოს ყოველი იმ სიკეთის შეცნობისათვის, რომელიც ჩვენშია ქრისტესათვის,

⁷რადგან ბევრი სიხარული და ნუგეში მომანიჭა შენმა სიყვარულმა, რადგან შენით მიეცათ შვება წმიდათა გულებს, საყვარელო ძმაო.

⁸ამიტომ, თუმცა ქრისტეში მაქვს უფლება მოგთხოვო იმის გაკეთება, რაც გევალება,

⁹ამის ნაცვლად სიყვარულით გთხოვ მე, პავლე, მოხუცებული, ახლა კი ქრისტე იესოსთვის პატიმარიც,

¹⁰ჩემს შვილზე, რომელიც ვშვი ჩემს ბორკილებში, ონისიმეზე,

¹¹ოდესღაც გამოუსადეგარი რომ იყო შენთვის, ახლა კი სასარგებლოა შენთვისაც და ჩემთვისაც,

¹²რომელსაც გიგზავნი უკან და ჩემი გულია იგი.

¹³ვფიქრობდი, ჩემთან მყოლოდა იგი, რათა შენს მაგივრად ემსახურა ჩემთვის სახარების ბორკილებში,

¹⁴მაგრამ შენი თანხმობის გარეშე არაფრის გაკეთება არ ვინდომე, რათა შენი კეთილი საქმე ნაძალადევი კი არ ყოფილიყო, არამედ ნებაყოფლობითი.

¹⁵რადგან, იქნებ იმიტომ დაგშორდა დროებით, რომ სამუდამოდ მიგეღო იგი,

¹⁶უკვე არა როგორც მონა, არამედ მონაზე მეტი, საყვარელი ძმა, განსაკუთრებით ჩემთვის და, მით უმეტეს, შენთვის ხორციელადაც და უფალშიც.

¹⁷მაშ, თუ თანამოზიარე ვარ შენი, მიიღე იგი, როგორც მე მიმიღებდი.

¹⁸თუ რამე გაწყენინა ან მართებს, მე მომკითხე.

¹⁹მე, პავლე, ვწერ ამას ჩემი ხელით. მე გადავიხდი, არ ვამბობ არაფერს იმაზე, რომ შენ შენი თავი გმართებს ჩემი.

²⁰და ასე, ძმაო, მეც მიბოძე სიხარული უფალში. მიეცი შვება ჩემს გულს ქრისტეში!

²¹შენი მორჩილების იმედით მოგწერე და ვიცი, რომ იმაზე მეტსაც გააკეთებ, ვიდრე ვამბობ.

²²ამასობაში გამიმზადე სასტუმრო ბინაც, რადგან იმედი მაქვს, რომ თქვენი ლოცვების მეშვეობით უკან დაგიბრუნდებით.

²³მოგიკითხავს ეპაფრასი, ჩემი თანატყვე ქრისტე იესოში,

²⁴მარკოზი, არისტარქე, დემა, ლუკა — ჩემი თანამშრომლები.

²⁵უფალი იესო ქრისტეს მადლი იყოს თქვენს სულთან.